Criminal?!
Pues amateurista? Como cu nos sistema democratico ta permiti cu e payaso di mas grandi por bira lider di nos pais of por lo menos deputado of parlamentario, sin dispone di algun cualificashon, esey tawata un opshon realista. Pero pa e motibo ya menshona por a compensa p’e fayo aki tambe. Pues mi por a elimina e opshon aki tambe. A resta: criminal! Pasobra ki otro cualificashon tin pa maneho di gobierno cu structuralmente ta neglisha tur advertencia, conseho, recomendashon di institushon y comishon cu a instala specialmente p’esey y cu ta haci lo ke ta dun’e gana mientras cu e consecuencianan dañino pa comunidad ta claramente visibel y riba dje sa present’e ripitidamente?
15 aña di Status Aparte
Esey tawata pues prome cu introducshon di Status Aparte. 15 aña despues di Status Aparte mi a skirbi e prome buki tocante e manera con a goberna Aruba a base di su autonomia recien: ‘Bon gobernashon & e realidad politico’ (75 pagina). Eyden m’a relata cu e gobierno di e tempo ey, cu rapport Calidad como su biblia elogia tur santo dia di siman, a viola TUR criteria di bon gobernashon y a tuma comunidad di Aruba haci sin misericordia.
25 aña di Status Aparte
M’a ‘celebra’ 25 aña di Status Aparte cu publicashon di e di dos buki: ’25 aña Status Aparte, un paraíso politico’ (207 pagina). Eyden m’a describi di ki manera nos lidernan politico tawata abusa na gran escala di nan posishon pa enrikece nan mes descaradamente. Tambe a describi e ambiente politico venena, e reducshon di e forsa di compra, e manera con a sakea e fondonan social y di ki manera e ‘falta di maneho’ a bira e maneho general. Y hopi otro asunto mas!
35 aña di Status Aparte
Dentro di poco Aruba lo ‘celebra’ su di 35 aniversario como pais ‘autonomo’. Pa recorda e momento historico aki mi a scohe pa traha un compilashon general a base di 6 rapport (di total 389 pagina) di e terenonan principal di mal maneho di parti di ‘politica’ cu consecuencia serio pa comunidad. Ta trata di e maneho di personal, administrashon financiero, transparencia, funcshonamento di parlamento, maneho socio-economico y (e falta di) integridad. Riba dje mi a publica durante hopi aña articulo tocante tema importante cu na e momento ey tawata actual (mira: ‘Publicashon’ riba www.deugdelijkbestuuraruba.org). E bista general ta conmovedor y ta confirma, awor a base di hopi mas documentashon, e conclushon di mi prome articulo di 35 aña pasa: aki ta trata structuralmente di criminalidad gubernamental!
Necesidad di reforma
Di mes e maneho aki no por a keda sin consecuencia: debe di Aruba den curso di aña a subi te bira practicamente impagable. Por a ‘paga’ debe solamente cu prestamo nobo. Pio ta cu e interes cu mester paga tur aña a bira asina halto cu Aruba no por a cumpli mas na exigencia di por ehempel maneho social responsabel y invershon necesario. Ademas e gastonan di gobierno a keda asina iresponsablemente halto, cu asina hopi consecuencia negativo pa comunidad, cu Hulanda a mira su mes obliga pa entreveni. A pone Aruba bou di curatela. Asina nos propio politiconan més a malbarata NAN autonomia! Riba dje ‘politica’ a perde confiansa di su propio publico. Entre otro pa e cantidad creciente di caso di corupshon den cual politico ta(wata) envolvi. Tur esaki ta suficiente motibo pa entama un discushon publico serio tocante nos ‘sistema politico’ y pa reforma esaki substancialmente. Eséy lo ta e regalo di mas bunita pa comunidad di un Aruba completamente bashi na ocashon di e di 35 aniversario di su Status Aparte/’autonomia’!