Desde comienso di añanan ’90 di siglo pasa, specialmente e dos partidonan grandi cu alternativamente tawata responsabel pa gobernashon di Aruba, a practica politica, c.q. hiba gobernashon di tal forma cu a viola e criterianan di bon gobernashon structuralmente. Tawata trata e.o. di e siguiente caracteristicanan:

  1. Structuralmente a viola ley (p.e. Constitushon, Ordenansa di Contabilidad)
  2. Structuralmente a neglisha e criterianan di bon gobernashon (p.e. transparencia)
  3. Structuralmente a neglisha advertencia/recomendashon (p.e. di Conseho Consultativo, Controlaria General, Conseho Socio Economico, Camara di Comercio, Banco Central,Fondo Monetario Internashonal)
  4. Structuralmente a hiba un administrashon financiero deficiente (caos, control deficiente/ausente)
  5. Structuralmente a neglisha e consecuencianan financiero di maneho (debe y interes gigantesco)
  6. Structuralmente no a responsabilisa maneho (p.e. pa medio di Cuenta anual)
  7. Structuralmente a marginalisa e sistema di checks & balances
  8. Indiferencia structural pa bienestar di comunidad (no a cumpli cu e ‘obligashon di cuido’)
  9. Enfoke structural riba e interes propio y di partido (e ofishi di gobernante ta ‘pa haci negoshi’)
  10. Aprobashon structural di parlamento pa mal maneho

Di e manera aki, structuralmente a viola e estado di derecho, mescos cu e sostenibilidad financiero di autonomia. En realidad, riba tur dos tereno tawata trata di minamento sistematico. Tumando tur esaki den considerashon, no por conclui nada otro cu structuralmente, desde comienso di añanan ’90, tawata trata di criminalidad gubernamental.

A base di lo anterior por deduci cu e partidonan politico a abusa grandemente di nan poder: cu nombrashon inecesario/ilegitimo di personal; e aparente implementashon deficiente intenshonal di tecnologia efectivo pa baha gasto pa mehora e procesonan; e manera dudoso cu a trata proyecto cosotoso di gobierno (incluso e falta di mantenshon!); e negligencia di e deber di cuido di gobierno, tur esaki cu consecuencia financiero y social-economico serio pa Pais. Cu tur e actonan ilegitimo y structural aki, nan a comete un inhusticia grandi na comunidad.