Den e aspirashon di gobierno di varios pais na mundo pa pidi ‘ayudo’ di ‘pueblo’ pa decishon dificil di interes nashonal, (s)a haci uzo di e instrumento di referendum. Pero experencia recien a mina e confiansa pa cu esaki. Manera critico sa trece dilanti: den un referendum ta simplifica un problema complica masha hopi mes cu un contesta simpel di ‘si’ of ‘no’. Den esey, hopi votador no ta realisa e consecuencianan di nan contesta. E ora ey, un decishon ‘emoshonal’ por tin consecuencia desastroso p’e pais.

Cabes of curazon

Hopi biaha sa resulta cu den practica e informashon necesario pa un desishon bon pensa pa medio di un voto, di ningun sentido ta yega tur esnan cu derecho di vota. Sea pasobra e informashon ta mucho limita of mucho compleho pa un bon entedimento, of pasobra e interes p’e tema di parti di e votador simplemente no tey. Pero asina mes ta vota al respecto. No tanto riba un base racional, sino emoshonal.

Alternativa

Di mes no por obliga tur hende pa informa nan mes debidamente tocante cierto tema, ni con importante e ta. Pesey, pais a busca alternativa cu ta cumpli cu e exigencia pa envolvi un parti mas grandi y representativo di pueblo na e toma di decishon. Den esey e participantenan mester ta asina interesa den e tema pa envolvi nan mes hopi mas ainda. E instrumento cu a resulta di esaki a haya e nomber ‘Panel/Foro di Ciudadano’ of ‘Citizen Counsil’.

Motibo

E motibo directo pa e ‘inovashon democratico’ aki tawata e consecuencianan di e crises di credito cu a percura na Islanda pa bancarota serio y na Irlanda pa un receshon pisa. Pero na Merca tambe a envolvi anteriormente ciudadano pa ‘delibera’ cu ‘politica’ pa mehora e sistema politico. Na Canada y Australia a instala panel di ciudadano tambe pa profundisa nan mes tocante e fayonan den constitushon y pa propone cambio. E ‘experimento’ mas recien a tuma luga na Francia, na unda e gobierno a haci bon uzo di e ‘instituto’ aki pa ‘controla’ e ‘revolushon di e chaleconan gel’. Tur e ‘experimentonan’ aki tawata enfoca na aumenta e envolvimento di ciudadano den e proceso politico y pa genera confiansa bek na ‘politica’. ¿Con tur esaki a tuma luga?

Composishon

Den liña grandi e selecshon di participante sa tuma luga den tres paso. Pa medio di un ‘random sample’ a sortea ciudadano for di e registro di voto. Nan a ricibi un invitashon. Despues a sigui un proceso di propio-selecshon: esnan interesa por a bay un reunion informativo y por a pone nan mes candidato pa e siguiente parti. Na final a saca lot atrobe entre tur e candidatonan pa forma e ekipo final. Den esey a percura pa un repartishon balansa di edad, sexo, etc.

Manera di opera

Una bes forma, e participantenan a haya e oportunidad pa informa nan mes debidamente den e tema pa medio di documentashon y informashon di experto. Despues nan a dialoga cu otro ciudadano y entre nan mes den grupo. Na final nan a formula un proposishon concreto pa un ‘solushon’. Por ehempel, un constitushon of ley di votashon nobo.

Experencia

Remarcabel tawata e grado di nuance cu cual a formula alternativa. Asina mes, no semper a aproba e resultado. Motibo: den algun caso mester a tuma e decishon final pa medio di un referendum. Den varios caso a resulta cu e opinion bon-informa a perde di e opinion no-informa. Pero na Francia a ‘evadi’ e problema aki cu e palabrashon cu gobierno y parlamento lo acorda e resultado di e panel di ciudadano mas tanto posibel. Esey a pasa tambe cu mas di 90% di e proposishonnan.

Bentaha

Generalmente, parlamento no tin e tempo pa profundisa su mes debidamente den un tema. Ademas interes/motibo politico sa hunga un papel negativo den e decishon final. Envolvimento di ciudadano ‘neutral y interesa’ den e toma di decishon ta aumenta e aceptashon den comunidad.

Fuente importante: ‘Tegen verkiezingen’ di David van Reybrouck