E esfuersonan exitoso -bou di preshon fuerte di Hulanda- di e gobierno actual pa cambia e rumbo financiero a haya un sla duro pa motibo di e pandemia di Covid. E caida pa tempo largo di un gran parti di e entradanan di turismo y impuesto, por lo pronto lo haci Aruba completeamente dependiente di e benevolencia di otro pa sobrebibi. E sosten di Hulanda cu Aruba ta ricibi den combinashon cu condishon rigido ta haci posibel pa elimina structuralmente, pa awor y ohala pa semper, e fayonan principal cu a caracterisa gobernashon durante e ultimo tres decadanan. Di otro banda mester vigila cu no por pone tur exigencia sin mas den practica. Mehorashon di e compreshon y confiansa mutual mester hiba na e miho balansa entre exigencia y posibilidad.

Conflicto

Mientrastanto, manera ta di custumber na Aruba, tin un conflicto serio andando, e biaha aki entre esnan pro y contra e condishonnan hulandes en cambio pa e sosten financiero. Specialmente esnan ‘di ataño’ cu tawata na cuna di Status Aparte, ta protesta fuerte contra cualke ‘metemento di Hulanda den asunto di Aruba’. Segun nan, esaki ta ‘traicion di autonomia’! Pero nan ta lubida cu ta NAN mes a debilita ‘autonomia’ seriamente cu nan malgobernashon di tal forma cu na e momento aki no por sigui manten’e como tal. Pues di berdad mester cambia hopi!

Por fin…

Gobierno tambe a yega na e conclushon ey. Den su “Nota pa reforma Aruba’ di 15 di juni 2020, cu a skirbi na prome instancia riba petishon di Hulanda pa duna un bista riba e propio intenshonnan pa reforma, gobierno di Aruba a duna di conoce cu “nos pais no por sigui pospone reforma: e mester reforma riba escala grandi”. Esaki ta bisa bon cla cu 1. ta trata di hopi reforma necesario; 2. cu e reformanan tawatin hopi tempo caba wardando ehecushon y 3. cu ta mas cu tempo pa por fin concretisa ehecushon.

Task Force

Pero e ‘Nota pa Reforma’ simplemente tawata e prome paso. Despues, un gran cantidad di Task Force a sigui elabora e liñanan grandi. Cada un riba un tereno specifico a analisa e problemanan principal y nan solushon. E resultado final a duna un imagan impresionante di recomendashon cu ta duna gobierno un guia importante pa concretisa reforma riba hopi tereno. Den esey a presenta un solo ‘PERO’ grandi…

E problema nucleo

Varios Task Force a descubri den nan analisis di documento cu hopi problema cu nan a constata y e solushonnan cu nan a sugeri, ya caba a keda menshona hopi aña y asta decada prome. Esey a yena nan cu e temor cu nan esfuersonan no lo tin ningun efecto “pasobra atrobe no lo haci nada cu nan”. Pero esaki tambe a hiba na e reconocimento cu, si di berdad kier logra algo, PROME CU TUR OTRO COS, e reforma principal mester tuma luga den e ‘sistema politico’ mes! Pasobra ta esey ta e causa cu nunca a concretisa tur bon recomendashon, conseho etc. Pesey tambe problema por a sigui desaroya y bira pio.

Sistema politico

Den e cuadro aki nos ta compronde bou di ‘sistema politico’: e manera con ta hiba politica. Caracterisitca importante na Aruba ta patronahe politico (nombrashon di personal, otorgamento di tereno y proyecto a base di e color politico), administrashon financiero deficiente intenshonal y ‘proyecto sospechoso’. E enfoke principal ta riba interes personal y di partido. Esaki ta un problema cultural cu por combati solamente cu un campaña intensivo pa un cambio di mentalidad y reforma di e manera con nos sistema democratico ta funcshona a base di partido politico. Tanten cu esaki no ta cambia, tur e bon intenshonnan simplemente ta keda…bon intenshon, locual ta duna e ‘aspirashonnan di autonomia’ ningun credibilidad. E ora ey reforma necesario riba tereno importante solamente por tuma luga pa medio di ‘intervenshon di afo’.