‘Postema’
Cu e menasa di POR pa laga gobierno cay si e moshon di desconfiansa contra su ministro no haya apoyo di su partner mas grandi den coalishon, el a pone su mes den mesun posishon cu OLA tabata haci den añanan ‘90. E partido ey tabata obliga partido AVP pa ‘entrega’ na varios momento y tabata mal-uza su posishon clave pa cumpli ampliamente cu su ‘obligashonnan’ cu su mes, su sponsor- y votadornan. Mescos cu awor ta e caso, y naturalmente contrario na tur posibel interes di nos Pais. Den e sentido aki, y sigur awor cu tur paña sushi a keda colga pafo extensamente, ta resulta cu POR ta un ‘postema’ cu ta haci un funcshonamento drechi di e gobierno di coalishon imposibel.
E problema clave
¿Di kico ta trata realmente? Segun e ministro di Husticia y e parlamentarionan di POR, comunicashon y colaborashon ta imposibel cu e ministro concerni. Pa e ministro ‘recalcitrante’, e cantidad di caso di nepotismo, conflicto di interes, violashon di tratado internashonal, negoshi cu tereno, etc. den cual e anterior y actual lider di POR y miembro di partido ta involvi den e tempo cortico cu nan ta funcshona, ta e causa principal. Y mientras e top di POR no por a produci mas cu algun keho vago tocante e ‘relashon dificil’, e MinIM por a concretisa su puntonan di forma detaya y documenta. Awor a bira cla tambe pakico su colega di partido y ministro di Husticia ta sigui blokea establecimento di e ekipo di investigashon ‘Team Bestrijding Ondermijning’ na Aruba.
Espada di Damocles
Pa e partner grandi den e coalishon, e crisis aki ta un problema grandisimo. Si e ignora e ‘ultimatum’ di POR, anto esey por nifica e caida di e gabinete, puramente pa motibo politico-oportunista di su partner di coalishon. Consecuentemente e liderazgo, di cual Aruba tin tanto mester den e crisis mas grave cu el a conoce, ta core peligro directo. Si scoge al contrario pa baha cabez pa e menasa di POR, anto ta scoge pa continuashon di colaborashon cu un partner cu obviamente a haci su mes culpabel na violashon di e puntonan clave di programa di gobierno, cu ta bon gobernashon y integridad. A cumpli sí cu e exigencia di transaparencia, awor cu a bira conoci con POR tabata envolvi den su propio ‘negoshinan’. Sin embargo, e ultimo escogencia aki lo tin consecuencia grave pa credibilidad di gobierno. Den e caso aki tambe lo ta trata di ‘kamikaze’. Lo mester purba bay anto den direcshon cu POR ta guli su exigencia awor y despues numa ta choca cune tambe. Mientras tanto e partido (POR) por sinta reflecshona si no ta e ministro kiboca e kier a obliga di tuma retiro.
Modus operandi
Manera e rapport investigativo ‘Een kwestie van mentaliteit’ di e Comishon di Berdad na 2002 a describi e ‘modus operandi’ maligno di e gobierno di AVP y empresario di e tempo ey den e caso di corupshon ‘Fondo Desaroyo Nobo San Nicolas’, asina aki e actual MinIM a expone e aparente manera di custumber di opera den politica, en todo caso den POR. Sin embargo, ta un pregunta te ki alcance nombrashon di hende di partido den e aparato publico y otro infracshon di e criterionan di bon gobernashon a tuma lugar den e ultimo tres añanan. ¿No ta asina cu e revelashonnan durante apenas un ora di e MinIM, cu solamente tabatin un par di luna den funcshon, ta solamente e punta di e ijsberg? Esey lo sali na cla solamente si mas mandatario kibra fila y cuminsa revela secreto.
Revelashon
Felizmente e publico por a saborea tambe otro revelashon confidencial di parti di miembro di parlamento. Remarcabel tabata por ehemplo e expreshon di e anterior ministro di Husticia di AVP. Den su discurso el a afirma cu patronahe politico y nepotismo ta forma di corupshon y por lo tanto inaceptabel. ¿Esaki tabata consecuencia di su actual papel den oposishon of di loke na Hulandes ta yama ‘voortschrijdend inzicht’ (siñamento na caminda)? Con cu ta, solamente e efecto real di e constatashon ey caba por conduci na eliminashon di un forma maligno di goberna na Aruba cu den e ultimo decadanan a costa miles di miyones.
Sigui riba e mesun pia?
E mas reciente ‘circo parlamentario’ ta e di tantisimo prueba cu e sistema di e actual ‘democracia partidario’ ta disfuncshona. Den ultimo – casi – 35 aña, cara nobo y partido nobo no a trece ningun mehorashon pa e multiple deficiencianan di e ‘funcshonamento politico’. Intento di mehorashon tabata parce mas bien purba lastra un cabay morto. E escala chikito di e sociedad ta preveni cu esey algun dia lo sucede. Mantene ‘cueste lo que cueste’ e sistema aki y pa falta di algo mihor (?) continua cu scoge ciegamente pa partido cu ta responsabel pa e situashon den cual Aruba tabata caba promer cu e crisis di Covid, finalmente lo conduci na un ‘kamikaze’ di pueblo di Aruba mes.