Surseance
E pregunta ta si Aruba ta posishona su mes di manera realista. Pasobra en realidad e ta den un situashon similar cu Serlimar. Tur dos no tin manera di sobrebibi bou di e circumstancianan actual sin e coperashon di ‘hende/pais di afo’. Y mescos cu Serlimar por sigui solamente a base di un surseance di pago, na unda un abogado encarga ta tuma tur decishon en cuanto asunto financiero, ta evita Aruba cay full den otro tambe pa medio di entre otro ayudo humanitario y presupuestario di Hulanda. E ultimo aki tambe ta desea supervishon completo di e fondonan cu e ta proporciona pa medio di un organo propio.
Cambio di palabrashon?
Un parti importante di e conflicto pa gobierno di Aruba ta ‘e cambio unilateral pa Hulanda di e periodo cu e prastamo mester cubri di 3 pa 5 luna’. E pregunta ta si esaki ta un interpretashon corecto di e ‘cambio di posishon di Hulanda’. Por ta bon posibel cu e anuncio publico di parti di Aruba na fin di juni ultimo cu e mes tin suficiente fondo pa wanta dos luna mas sin acudi na e prestamo ofreci pa Hulanda, tawata e motibo di e ‘adaptashon explicito’ di e periodo. Pasobra pakico lo duna un prestamo pa dos luna di cual gobierno di Aruba mes a bisa cu “e por cubri cu propio fondo”? Ta despues numa a resulta cu e placa aki no a sali for di un reserva secreto di gobierno. Tawata trata di placa cu gobierno tawata debe sector comercial y pues a pone esaki riba termino mas largo. Asina gobierno a complica e situashon dificil di sector comercial mas ainda!
Terco
E postura di ‘politica’ pa nenga firma e acuerdo tin mas consecuencia serio pa e sector comercial. Esaki ta perde mas y mas e confiansa necesario pa fungi como e motor principal pa saca nos economia for di e abismo. Igualmente e escogencia di gobierno pa apela riba e mercado financiero local pa un suma maximo di Afl. 400 miyon pa mas tanto prestamo consumptivo no ta duna confiansa. Pasobra no solamente e interes cu mester paga ta bin riba e interes ya caba practicamente impagable cu Aruba mester paga tur aña. Pero tambe sacamento di asina hopi captial for di e mercado local ta haci cu despues ta bon posibel cu tin insuficiente capital disponibel pa invershon comercial necesario (‘crowding out’).
Golpi di gracia
E reducshon serio di entrada di gobierno riba termino corto y largo por trece e peliger cu dentro di algun tempo Aruba no por cumpli mas cu su obligashonnan. E credo gasta cu Aruba semper a tene su mes na obligashon di pago y pues ta goza di un bon imagen den mundo financiero, no ta consecuencia di su propio credibilidad, sino di esun di su partner mas grandi den Reino. Si esaki lo ‘retira’, lo cualifica Aruba di biaha como junk. Pero tin otro peliger. Ta facil pa imagina cu Hulanda no tin ningun intenshon pa warda te fin di siglo pa firma un acuerdo. Anke e por djis laga e ‘negociashon’ manera e ta y sinta warda te cu gobierno di Aruba a agota tur su posibilidadnan di prestamo y finalmente ta firma ‘n’e cruz’, e por dicidi tambe cu e ta harta y lo uza su energia y placa di un manera mas productivo. E ora sí Aruba lo yora malay! Por resulta bon posibel cu e daño cu e ultimo gobierno di AVP a causa na Aruba lo ta minimo compara cu e golpi di gracia cu e coalishon actual lo causa comunidad di Aruba cu su postura. Di otro banda, gobierno lo tene su mes na e tradishon cu cada siguiente gobierno ta causa mas daño na nos pais cu esun anterior.