Codicioso
Dia 14 di juli 1997, nos parlamentarionan unanimamente a aproba ley cu nan mes a concipia den hopi pura pa mehora nan posishon financiero-huridico excesivamente. Entre otro casi a redobla nan salario mientras cu por a cobra un penshun completo cu 50 aña despues di apenas tres termino como parlamentario. A regla esaki den nochi scur, scondi for di comunidad di Aruba y contra e consehonan di literalmente tur (!) instancia di conseho y control manera Servicio Central di Accountant, Directie Personal y Organisashon, Controlaria General, Conseho di Consulta, Directie Wetgeving y Banco Central. Durante hopi tempo a neglisha completamente e protestanan feroz di comunidad y e critica fuerte pa cu e biahenan di placer costoso y completamente inutil pa reunion di Parlatino. Ta te 2014, tempo cu a aumenta edad di penshun pa empleado publico, a aumenta esun di parlamentario tambe pa 65 aña. Pero te ainda parlamentario por logra acumula un penshun completo den apenas 12 aña!
E practica parlamentario
Durante e añanan cu a sigui, e mehorashon di e posishon financiero-huridico inhusto y den cierto sentido asta ilegal di parlamentario no a conduci na ‘trabou productivo’. Al contrario, (mayoria di) Parlamento a sigui aproba ciegamente practicamente tur cos cu gobierno tawata dicta. Merecidamente a haya e apodo di Stempelparlement. Riba dje el a neglisha su tarea di control casi completo. E tantisimo biahenan aparentemente tawata un motibo importante pa e frecuencia limita di reunion. Por ta pesey Aruba te ainda ta e unico pais den Reino sin ley di financiamento di partido politico, ombudsman, credito pa consumidor y medio ambiente. Di e tareanan cu Constitushon ta prescribi pa Parlamento, ningun a keda (adecuadamente) concretisa. Pesey Parlamente sin mas ta co-responsabel pa e desaster financiero di Aruba y pues pa e echo cu Aruba a drenta e crisis di Corona como un paciente den coma den cuido intensivo.
Perspectiva
Sin duda e colapso di economia di Aruba tin consecuencia pa termino largo. E gran cantidad di desempleado den nos principal mercado di turismo, esta Estado Unido, ya caba ta monta na mas di 30 miyon. Esey a/lo baha e nivel di prosperidad considerablemente . Economia di Merca lo cay den un receshon serio cu posibilidad pa un depreshon. Bou di e circumstancianan aki un pronto recuperashon di economia di Aruba ta improbabel.
Pa sobrebibi, Aruba tin mester di hopi ayudo financiero (y probablemente pa hopi tempo largo). Pa motibo di e peso di debe cu ta hopi halto caba, un apelashon riba mercado di capital internashonal ta practicamente inalcanzabel. En realidad lo resulta cu solamente Hulanda por/’kier’ duna e ayudo necesario. Gran parti di e ayudo aki posiblemente lo ta prestamo cu lo aumenta a monton di debe enormemente. Cancelashon di e debe aki, ademas di pago di interes, pa e decadanan benidero lo forma un peso insuperable pa Aruba. Pesey ta inevitable cu Aruba lo mester sigui economisa. Tur esaki ta haci inaceptabel pa nos parlamentarionan recupera nan entrada y posishon huridico inhusto riba termino corto y asta mediano.
Corecshon general
Durante e ultimo decadanan, y entre otro pa motibo politico-partidista, a afecta e sistema salarial di gobierno negativamente, no solamente pa politico, pero tambe pa otro parti di sector publico. Specialmente a haci hopi (mal ) uzo di e fenomeno di ‘toelage’. Pero a pesar di ripitishon frecuente di advertencia y recomendashon, nunca a implementa corecshon. E ultimo intento di Directie Personal y Organisashon pa un reforma necesario di e ‘areglo di salario di Aruba’ ta data di 2006. Manera di custumber, ‘politica’ a neglisa esaki tambe y a laga e asunto pa su cuenta. E crisis actual cu ta rekeri adaptashon di ‘practicamente tur cos’ ta un oportunidad perfecto pa implementa aki tambe corecshon substancial y duradero! Ta di spera cu Parlamento lo uza e 18 lunanan benidero di estadia obligatorio na Aruba na un manera eficiente y efectivo pa recobra of coregi e atraso- y fayonan di e ultimo 34 añanan. Asina, gracias na e crisis di Corona, pa di prome biaha posiblemente lo por dispone di un Parlamento cu lo produci di berdad a cambio di e placa valioso cu comunidad di Aruba ta pone disponibel!