Sin berguensa
E kier a uza e tereno pa construcshon di un compleho di apartamento. Al fin y al cabo e no tawatin suficiente placa. Pues el a bende e tereno y a pidi -cu exito- un otro tereno. P’e no tawata existi un lista di espera. Pa mi esey no tawata ningun sorpresa. Ya pa decada esaki ta e modus operandi di ‘politica’: “Yuda’mi yega na poder y mi ta percura pa bo haya bo recompensa”. Pero e recompensa ey no ta sali for di e saco di e politico concerni of di e partido. No, sin ningun tipo di berguensa nan ta haci uzo di e propiedadnan di Pais Aruba di cual nan ta pretende di por dispone di nan libremente.
Negoshi di cambio
Como consecuencia, hende cu sí ta/mester tene nan mes na e regla- y proceduranan prescribi, por keda warda pa añanan largo riba nan tereno. Esnan cu no tin un relashon personal cu e ‘tumador di decishon’ y tampoco tin suficiente placa pa ‘influencia’ decishon, mester para patras den rij y spera cu e politico lo mira nan petishon poco prome cu e siguiente elecshon. Pasobra e ora ey net lo contrario por tuma luga: otorgamento di tereno a cambio di voto: “Rasga mi lomba pa mi rasga esun di bo”.
Mercado
E negoshi aki a tuma luga riba varios tereno, specialmente na unda sa otorga permiso. Permiso pa (fuera di e proceduranan normal) logra tereno (grandi); pa logra (lihe!) permiso pa construcshon; pa por importa (riba termino corto!) personal pa construcshon di specialmente hotel (grandi!); pa personal cu tawata necesario pa traha den hotel, etc. Y regularmente sa pasa cu empresa no sa haya un permiso definitivo, sino uno temporal. Sa renov’e den tempo di elecshon, despues cu e empresa a duna un aporte (substancial) na e caha di campaña di e partido na mando.
Negoshi
Pa hopi hende esaki aparentemente tawata normal. No ta por nada cu un ministro a declara algun aña pasa: “Mi a bira ministro pa mi haci negoshi”. Pa hopi aña esey tawata posibel, tanten cu economia a produci suficiente pa tuma hende sin limitashon den servicio; tanten tambe cu tawatin suficiente tereno disponibel; tanten cu practicamente no tawatin control riba funcshonamento di funccionario di gobierno y tanten cu ciudadano no tawata tribi mucho pa ta abiertamente critico. Awor cu entrada di impuesto por lo pronto ta limita y cu no por sigui cubri gasto excesivo mas, cu tin un maneho di tereno mas estricto, cu ta vigila funcshonamento di gobierno mas frecuente cu un lupa y cu hende ta bira mas asertivo, ‘negoshi-manera-semper’ ta bira cada bes mas dificil.
Pregunta
E patronahe politico y e ‘negoshi cu propiedad/servicio di gobierno’ cu pa hopi tempo a hunga un papel predominante, ya no ta sostenible mas. E pregunta ta si e partidonan politico cu a hunga un rol asina determinante den esaki, por sigui hunga un papel politico di importancia. Pasobra, dor di nan ‘maneho’, un pio cu otro, Aruba ya caba prome cu e pandemia di covid, tawata den un sitiuashon hopi penoso. Riba dje, hopi biaha gobernante a hiba mal gobernashon bou di ‘supervishon’ di parlamento. Pesey nos mester puntra nos mes si e sistema politico actual ta ofrece suficiente garantia pa para e ‘gobernashon tradishonal’. Finalmente e pregunta ta si (organisashon di) ciudadano y e gremionan comercial y sindical por/kier demostra e curashi necesario pa hunga un papel significativo pa cu mehorashon di gobernashon. Al fin y al cabo esey tambe ta den nan propio interes. E contesta riba e preguntanan aki ta determina e futuro di ‘politica’ y di comunidad di Aruba.