Ciere di refineria
E motibo principal di e ciere tawata e capacidad di mas di crudo den mundo. Esaki tawata consecuenia di construcshon di refineria supergrandi y supermoderno na p.e. Rotterdam y Arabia Saudita. Al fin y al cabo, den curso di 35 aña, a cera tur cuater refineria grandi den region di Caribe. Ta trata di Lago na Aruba (1985), Shell na Corsow (1985), e refineria gigantesco Hovensa na St. Croix (2012) y asta esun na Trinidad & Tobago (2018). E ultimo aki ta remarcabel como cu e por conta cu su propio fuente di crudo y un provishon ilimita di gas.
Reapertura
En bista di e interes economico grandi, e diferente islanan a haci tur esfuerso pa mantene ‘nan’ refineria habri. Asina Corsow a logra basta lihe na interesa e compañia Venezolano PDVSA pa asumi refinamento, mientras cu ta parce cu despues di e colapso actual di PDVSA, e grupo Klesch lo asumi e trabou. Esun di St. Croix ta den man di Limetree Bay Refining, mientras cu e sindicato di empleado di e refineria di Trinidad & Tobago ta spera di mantene e empresa bibo bou di nan propio maneho y cu un inyecshon considerable di placa stranhero (di Surnam!). Aruba tambe a logra un reapertura di su refineria, anke tawatin mester di 3 empresa: Coastal, El Paso y Valero. E ultimo aki a cera e refineria definitivamente na 2012. E perspectivanan pa un reapertura di e refineria di Aruba awor sí ta hopi malo.
Realidad di Aruba
E refineria di Aruba no solamente ta esun di mas bieu (cu excepshon di esun di Corsow), tambe e ta esun cu mas tempo fo’i uzo y pues sin mantenshon. Esaki ta desastroso en bista di e nivel halto di salo di laman den aire. No ta por nada cu e conocido experto di refineria Nelson English a calcula e ‘rehabilitashon’ di e refineria na por lo menos US$2 biyon. Cu e invershon aki e refineria lo por funcshona na e mesun nivel limita cu na 1991. Pa motibo di e falta di e ‘cracker-unit’ desde mitar di añanan ’80, e refineria ya no por a bende producto final mas manera gasolin y diesel. Un rehabilitashon completo, incluyendo capacidad di refinahe di diesel y gasolin cu un percentahe abou di sulfur, lo rekeri un invershon di minimal US$ 3 biyon. Riba dje Aruba no tin su propio fuente di crudo, ni un mercado interesante di benta di crudo, mientras cu e provishon di gas tambe ta forma un problema. Como tal, Aruba no tin mucho chens riba un invershon asina cuantioso pa su reapertura. Asta e invershon relativamente modesto di US$ 1 biyon pa un upgrade limita pa refina e crudo diki Venezolano, ya caba a forma un obstaculo no-atractivo pa motibo di e desaroyo inpronosticable di e situashon politico Venezolano y pues di su industria petrolero.
MEP: un oportunidad perdi
En realidad Aruba a perde su ultimo oportunidad pa un renovashon exitoso na 2007/2008. E tempo ey, e refineria tawata den man di Valero cu tawata dispuesto pa inverti mas di US$ 2 biyon pa haci e refineria competitivo atrobe. Pero e gobierno (di MEP) di e tempo ey a impone exigencia absurdo, e.o. un B.B.O di 1% riba exportashon. Pa Valero esaki tawata inaceptable: no solamente impuesto riba exportashon tawata absurdo den perspectiva internashonal, pero e percentahe lo tawatin un efecto mucho grandi riba e margen di ganashi (pa motibo di e competencia feroz den e negoshi di crudo: ta haci ganashi riba nivel di cen). Esaki a haci cu no por a sigui bou di e condishonnan aki. Pues ta resulta cu e gobierno di MEP di e tempo ey a torpedea e intenshon di Valero pa renova e refineria debidamente. Manera ta conoci, despues di esey Valero a desisti di e invershon planea. E refineria a sigui bay atras te cu poco despues el a cera su portanan definitivamente.
AVP: un acto di desesperashon
E resto ta conoci. E gobierno di AVP cu a asumi e riendanan despues, durante e climax di su crisis financiero pa motibo di debe extravagante, a purba di traspasa e refineria na un set di delinquente na otro banda di lama di Caribe. Di mes, ehecushon di e acuerdo aki a faya. Consecuencia ta cu a blokea desaroyo di Aruba y specialmente di San Nicolas pa hopi aña. Motibo: e obligashon di e ultimo empresa pa desmantela e refineria y limpia e tereno riba su gasto, a pasa pa Citgo-Aruba cu no tin ningun cen preto. Consecuentemente mester pasa e gasto aki pa pagador di impuesto di Aruba, cu ya caba ta carga e consecuencianan financiero extravagante di decada di malgobernashon. Tumando na cuenta e situashon financiero di Aruba, di mes no tin bista riba un solushon rapido di e situashon aki.
Competencia di mustra dede
Mientrastanto AVP ta culpa MEP di a torpedea ‘renacemento’ di e refineria. MEP ta culpa e fiasco entre otro na e sancshonnan mericano pa cu Citgo y e compañia madre PDVSA. Riba dje e empresa nunca lo a pidi un licencia pa e proyecto di renovashon, locual ta duna e impreshon cu nunca tawatin e intenshon serio pa ‘upgrade’ e refineria. En realidad, a pesar di multiple promesa, nunca Citgo/PDVSA por a percura pa e financiamento necesario pa e trabou di ’upgrade’ di e refineria pa e crudo pisa di Orinoco. E actividadnan riba e tereno di e refineria nunca (ni tampoco den tempo di gobierno di AVP!) a bay mas leu cu e nivel di inspecshon di antemano. Asta financiamento di e apartamentonan simple pa e personal di construcshon a resulta di ta un dolor di cabes. E sancshonnan a bin aña despues.
Un chens perdi
Pa Aruba, e situashon aki ta desastroso. E escogencia pa sigui cu Citgo tawata fatal pa e futuro posibilidadnan di desaroyo pa e tereno immenso. Despues di desmantelashon y limpiesa dor di Valero, lo por a uz’e bon pa establece un compleho di energia grandi cu tanto molina di biento como parke solar pa cubri gran parti di e necesidadnan energetico di Aruba. Hunto cu un maneho pa haci compra di auto y camion electrico atractivo, esaki por a nifica pa Aruba cu por e baha e necesidad grandi di combustibel pa WEB, gasolin y diesel drasticamente. Esaki lo a reduci ‘exportashon’ di divisas considerablemente y pues lo a mehora grandemente e balance di pago. Asina al fin y al cabo hopi mas medio lo por a bin disponible pa desaroyo di Aruba. A perde e chens aki, na prome luga pa motibo di e gran incapacidad di politico Arubano.
Sentido di realidad
Mientrastanto Aruba a ricibi e yabinan di e refineria bek y Parlamento a aproba e acuerdo di terminashon cu Citgo. Di mes, en cambio di desisti di eventual claim contra Citgo, manera e obligashon pa desmantela e refineria y un bon limpiesa. Di otro banda, gobierno ta insisti cu e tin 25 interesado pa tuma e refineria y renov’e (parcialmente). Esey, ningun experto a tribi di pronostica. Specialmente en bista di e estado penoso di e refineria, e prijs di crudo actual cu a baha te un record absoluto y e perspectivanan negativo pa un recuperashon rapido di economia mundial. Riba dje e intenshon di e gobierno actual pa rebiba e industria hopi sushi aki, cu e efectonan mas dañino posibel pa tera, laman y aire, no ta duna credibilidad na su intento pa realisa un ‘economia nobo’ cu mas atenshon pa e hende y su medio ambiente.