Dentro di e tempo premira di 2 siman, Stichting Deugdelijk Bestuur Aruba (SDBA) a logra haya e 1000 firmanan pa e carta di agradecimento pa e sosten di Hulanda pa Aruba. Pesey SDBA kier gradici masha tur esnan cu a participa na e acshon aki! No ta trata solamente e sosten humanitario pa duna un gran cantidad di hende di come, pero tambe e prestamonan sin interes pa asisti salubridad publico cu ta bou di hopi preshon, duna gobierno di Aruba e posibilidad pa sigui paga su personal, incluso politico, laga departamento di gobierno sigui funcshona, apoya FASE, y subsidia empresa pa evita desempleo riba escala grandi. Ademas, e sosten den forma di donashon pa fortifica enseñansa, economia y cuido ta duna speransa pa un ‘Aruba autonomo mas resistente’. Pa SDBA, specialmente e ayudo cu a ofrece pa ‘haci finansas publico mas sostenibel y pa concretisa reforma necesario riba tereno di gobernashon’ ta un parti importante di e pakete total. Pasobra ambos ta forma factor esencial pa realisa bon gobernashon, cual ta e meta principal di SDBA.

CONTRA OF PRO ARUBA?

Tawata remarcable cu e acshon aki a causa basta discushon pro y contra den comunidad. A sugeri entre otro cu e iniciador (pues ami/SDBA) lo ta ‘contra Aruba’. Pa esnan cu sa lesa mi publicashonnan, e contesta mester ta cla: di ningun manera mi ta contra Aruba, pero sí contra e manera cu nos (partido) politiconan a goberna y perhudica Aruba durante decada. Esakinan aparentemente ta sugeri cu critica contra nan ta mescos cu critica contra Aruba. Nada ta mas leu di berdad! Pasobra NINGUN HENDE (!) por nenga cu durante mas di 30 aña tawatin structuralmente mal gobernashon, anke parti di pueblo lo atribui esaki, sin ningun base, solamente na ‘e partido opositor’. Combatimento door di mi/SDBA di mal gobernashon hustamente ta enfoca na transforma e decadencia cu Aruba a experencia bou di tipo di politico asina, den un desaroyo positivo. Por logra esey, si nos enfoca nos mes di berdad riba e terenonan esencial pa Aruba: enseñansa, economia, cuido, naturalesa, etc. Tur ta tereno cu ‘politica’ structuralmente a descuida e ultimo decadanan y cu por haya solamente e debido atenshon si tin bon gobernashon. Como tal, ami/SDBA ta completamente dedica na (desaroyo positivo di) Aruba!

AYUDO CONDISHONAL OF ‘SOLUSHON AUTONOMO’?

Tambe tawatin reacshon den sentido cu nos no mester asumi un posishon asina dependiente di Hulanda, pero pa solushona nos problemanan ‘cu nos propio forsa’. Remarcablemente e ponencia ey sa bin di hende cu (ainda) tin un entrada sigur y cu no a sinti den persona e hamber y falta general di tur cos locual un grupo creciente di Arubiano sí ta confronta. Probablemente nan no por imagina nan mes tampoco kico lo nifica si no ricibi ayudo di ningun manera y cu nan lo keda na merced di partido politico cu ta busca sosten cerca pais cu no solamente ta hopi corupto, pero tambe ta trapa e derechonan fundamental di hende y/of ta comete teror di estado. Naturalmente ta hopi bon, specialmente den e tempo aki, pa dispone di cierto idealismo, pero ta lamentabel si den esey ta perde realidad for di bista y/of e practica politico perhudicial di decada. Sinembargo, ta duna speransa  cu mas y mas ciudadano ta somete nan mes cada bes menos na e actitud arbitrario di (partido) politico y ta asumi un actitud mas critico.

SPERANSA

Mi deseo mas grandi (di SDBA) ta pa Aruba, mescos cu Corsow, cera un acuerdo rapido cu Hulanda pa asina duna comunidad e confiansa bek pa futuro. Esey mester ta posibel como cu nos ministro-presidente a declara recientemente cu ya caba un luna pasa tawatin un acuerdo similar. E ‘mal entendimento’ cu a surgi despues di e declarashon di gobierno di Aruba cu “ainda tin suficiente placa pa dos luna” y e reacshon di Hulanda riba esey di alarga e prestamo di tres pa cinco luna (pasobra pakico lo bo fia placa na un pais cu kier fia pa un cierto periodo si esaki mes ta bisa cu e tin suficiente fondo pa cubri esey???) no por ta un problema insuperable. Mi speransa/expectativa (di SDBA) ta cu e ora ey di berdad lo concretisa den un periodo razonable (6-7 aña) tur e promesanan pa reforma-no-cumpli cu gobierno consecutivo a yega di haci durante decada pa cu bon gobernashon, integridad y transparencia. Esey so caba ta rekeri lo maximo di un gobierno serio!