Na 2017 e partido cu e tempo ey a forma gobierno a pone preshon riba Conseho Electoral y e servicionan di sosten pa desvia di e luga prescribi pa ley pa entrego di lista di candidato. Entre otro lo por dificulta coperashon di polis si e Conseho no lo duna su coperashon na deseo of exigencia di gobierno. Tambe tawata deseo di gobierno pa determina for di su ministerio ken lo bira miembro di e stemburonan, anke normalmente sa prepara esaki den deliberashon cu Conseho Electoral. E mesun partido aki recientemente -pero awor for di oposishon- a acusa Conseho Electoral di fraude electoral pasobra e lo kier a introduci na un momento laat un sistema di scan ‘pa reduci e posibilidad di contagio y pa acelera e proceso di conteo’. Y awor e ta haci hopi buya atrobe pa motibo di decishon di e gobierno actual riba recomendashon di Conseho Electoral pa no pone e registro di votador na disposishon mas di partido politico. Esaki ta viola articulo 10 inciso 2 di e Ordenansa di Elecshon di mas o menos 60 aña pasa. Pero e pregunta ta si esaki tin mas valides cu e violashon di tratado internacional hopi mas recien riba tereno di privacidad.

E ultimo(nan)

Den ex-Antia Hulandes e ley concerni pa hopi tempo a hunga un papel importante. Teoricamente e tawata necesario ‘pa controla si votador tawata aparece den e registro di votador y pues por a vota legalmente’. Pero den practica tambe sa uz’e pa busca votador -cu no a bin vota ainda- na su cas pa bin tira su voto. Durante e biahe den auto sa pone preshon pa su selecshon di partido. Pero tambe sa pasa cu di antemano sa busca informashon cerca afiliado di partido na servicio di impuesto y banco pa ricibi informashon, importante pa convence votador, por ehempel di e posibel coperashon di e partido pa solushona su eventual debe (di impuesto). Ya caba pa e posibel riesgo aki e pregunta grandi ta si por sigui mantene entregamento di registro di votador na partido politico. No ta por nada cu tur pais di Reino -cu excepshon di Aruba y Corsow- ya caba a elimina e ley aki. Cu introducshon di tratado tocante privacidad algun aña pasa, esaki ta(wata) inevitable.

Tur voto ta conta

E aperente miedo di e partido concerni pa perde voto pa motibo di no por dispone di e registro di votador por ta valido, pero e ta conta mescos pa tur otro partido. Pesey, miho e por acudi -hunto cu e otro partidonan- na un campaña intensivo di concientisashon, den cual ta mustra tur esnan cu derecho di voto di e importancia di bay vota y haci esey na un manera corecto. Den esey, e siguiente informashon por ta util:

  1. E importancia y determinashon di e ‘kiesdeler’/restzetel. Despues cu a cera stemburo ta conta tur voto valido(!). Despues ta dividi esaki pa e cantidad di asiento (21). Esey ta resulta den e ‘kiesdeler’. Imagina cu 63.550 voto ta valido, e ora ey e ‘kiesdeler’ ta 63.550 : 21 = 3026. E partido cu a ricibi e cantidad di voto valido aki of un multiple di esaki, tin 1 (of mas) asiento. Un partido cu a logra 12.450 voto valido, consecuentemente ta haya 4 asiento ‘limpi’ (12.450 : 3026 = 4,11). Ademas e partido ta bin na remarca pa e ‘lucha’ pa un of mas restzetel.
  2. E efecto di esnan cu no ta bay vota riba ‘kiesdeler’/restzetel. Hende cu a fada di e manera cu sa hiba politica y (pesey) no kier duna nan voto na ningun partido, no ta aporta na determinashon di e ‘kiesdeler’. E consecuencia ta sí cu nan no ta contribui na cambio di e panorama politico como cu nan voto no ta bay pa posibel partido alternativo. En realidad nan ta aporta asina na mantenshon di e sistema politico cu tanto nan ta detesta.
  3. Pakico y con ta vota ‘blanco’ y cual ta su efecto? Ora ta vota ‘blanco’, e votador no ta yena ningun bola. Mescos cu esun cu no ta vota, esaki no ta influencia e ‘kiesdeler’. Pero aki tambe un ‘voto potential pa cambio’ ta bay perdi.
  4. Ki ora ta trata di un voto invalido y cual ta su efecto? Un voto ta invalido ora no solamente a yena un bola, pero tambe a skirbi of pinta riba e ‘stembiljet’ of por ehempel a pasa un cruz dor di tur otro lista di partido. Den e caso aki tampoco e voto ta conta pa determina e ‘kiesdeler’.
  5. E influencia di partido (mucho) chikito riba ‘kiesdeler’. Ora un partido ta haya mucho tiki voto pa un asiento, e ta perde e votonan ey. Como tal e no por participa tampoco na e ‘lucha’ pa un restzetel. Pero e votonan ta conta sí pa e ‘kiesdeler’. Consecuentemente esaki ta bira mas halto locual ta haci mas dificil ainda pa partido (mucho) chikito logra esaki. Pa e partidonan mas grandi esaki ta un bentaha, pasobra asina nan tin mas chens riba un of mas ‘restzetel’.
  6. Partishon di restzetel. E partido cu ta ricibi mas voto di locual ta necesario pa un of mas asiento, ta bin na remarke pa un of mas restzetel, dependiendo di su ‘averahe’. Pa e partido di e ehempel den punto 1, ta dividi e cantidad total di voto cu e partido a logra, pa e cantidad di asiento ‘limpi’ + 1. Esaki ta nifica 12.450 : (4 + 1) = 2.490. Si esaki ta mas halto cu e cifra ‘averahe’, pues calcula di mesun manera, di e demas partidonan cu tambe ta bin na remarke pa haya restzetel, e partido aki ta ricibi un restzetel. Si tin mas restzetel pa parti, e ‘averahe’ di e partido awor ta 12.450 : (5+1) = 2.075. Esaki ta sigui te ora cu a parti tur restzetel.

Di e manera aki SDBA ta spera di a yuda partido politico cu suficiente informashon pa yuda informa votador pa nan vota masal y conciente. Ta di spera cu e miho partidonan lo gana!