Intento fracasa
Den cuadro di un proyecto di stage, un studiante di economia empresarial a haya e tarea pa analisa e proceso y duna recomendashon pa mehorashon. Manera ta di custumber, gobierno a neglisha esaki por completo. Como cu e ‘red tape’ a keda un obstaculo grandi pa invershon nobo, a establece un grupo di trabou na aña 2013/14, consistiendo di representante di varios departamento di gobierno y di sector priva. Esaki a traha un analisis completo di e trayecto pa cuminsa un empresa, desde momento di e prome pasonan cerca notario te na e momento cu logra e ultimo permiso pa cuminsa. Pero e iniciativa aki tambe, mescos cu e recomendashonnan di OECD, Banco Mundial, IDB y FIAS no a hiba na algun adaptashon di e ‘red tape’. Aparentemente, te cu recien, no tawata existi ningun interes cerca ‘politica’ pa mehora e situashon aki. Esey a costa Aruba basta entrada.
COHO
Recientemente un comerciante a conta’mi cu e ‘red tape’ a bira hopi menos. Locual anteriormente sa tum’e dos aña pa vence tur e sutilezanan burocratico, awor a cost’e apenas 2 siman. E tawata totalmente babuca! Pero e motibo ta hopi simpel: e pakete di COHO ta pone hopi enfasis riba ‘optimalisashon di e clima di invershon’. P’esey ta necesario pa ‘adapta e sistema di permiso y pa elimina e burocracia (red tape)’. Aparentemente e conecshon di reforma cu sosten financiero di Hulanda a logra den apenas algun siman locual conseho bon intenshona no por a logra durante decada.
Pregunta y posibel contesta
Naturalmente pa hopi hende e pregunta ta si simpel amateurismo politico tawata e motibo principal di mantenshon di e ‘red tape’ pa tanto tempo, a pesar di tur e advertencia- y recomendashonnan. Pa varios motibo esey ta hopi improbable. Mas bien mester busca e motibo den un di e definishonnan di corupshon: ‘Corupshon ta e pago di soborno na funcionario publico pa evita e molester burocratico’. Esaki ta clarifica mantenshon di e ‘red tape’ como parti esencial di e ‘modelo di negoshi’ di ‘politica’. Mas pegahoso e ‘red tape’ ta, mas inversionista ta dispuesto pa paga e gobernante responsabel pa su coperashon pa ‘suavisa’ e tape (= acelera e proceso burocratico). No ta por nada e ministerionan cu ta otorga permiso ta asina popular ora di reparti cartera di ministro despues di elecshon!
Transformashon
E echo cu e transformashon di ‘red tape’ pa ‘red carpet’ a tuma luga den un tempo asina cortico tambe ta saca na cla cu en realidad tawata trata di un simpel adaptashon. Pues, ta parce cu no ta dje dificil pa regla permiso pa establecimento, director, estorbo, construcshon, tipo di empresa, devisas, candela, trabou y permanencia dentro di poco tempo. Indudablemente e urgencia pa kita tur obstaculo posibel pa inversionista den e circumstancianan actual di covid a hunga un papel importante. Esey ta duna e impreshon cu tur e añanan anterior no tawata cuestion di ‘Nos no por’, sino di ‘Nos no kier, pasobra e no ta den NOS interes (personal)’! Den e cuadro aki e pandemia di covid posiblemente tambe tin consecuencia positivo pa funcshonamento drechi di ‘politica’ y e reformashon financiero y social-economico pa Aruba riba termino largo.