Destrucshon structural di capital
E obligashon pa mantenshon a resulta di ta un condishon esencial. En berdad a mantene e compleho deportivo regularmente locual a resulta cu ya pa basta tempo e ta funcshona debidamente, a pesar di e uzo intensivo. Esey ta un contraste enorme cu casi tur infrastructura y servicio bou di responsabilidad exclusivo di gobierno. Eseynan a decaï den corto tempo of a keda apenas ‘na bida’. Centro di bario den mal estado; edificio di corte y scol cu mester a desocupa y cu a resulta den gasto enorme pa motibo di huur di acomodashon caro y hopi biaha inapropia; truck di sushi cu tawata sirbi so pa tira na dump; truck di bombero den asina mal estado cu servico di bombero no por a garantisa cu por a sali den caso di incendio; e propio ambulancenan den cuido intensivo; biblioteca cu despues di cada awacero mester a tira un cantidad di buki y tabla di plafond afo; caminda cu pa motibo di aumento di buraco tawata sirbi bon pa comete aborto; estadia pa drogadicto cu lek y beskein cuantioso y peliger pa cortocircuito; polis cu por a enfrenta atracador solamente danki na donashon di chaleco antibala pa un banco; prizon desaproba locual a conduci na fuga di varios criminal y un denuncia di parti di e Comite Europeo pa Prevenshon di Tortura y trato Inhumano of Humiyante; fundashon cu mas y mas a keda sin subsidio di gobierno y consecuentemente mester a para nan actividadnan.
Etcetera
No solamente polis, bombero y fundashon, pero tambe otro departamento esencial manera esun di Asunto Social a sufri seriamente. No ta por nada su Directora a declara recientemente cu e Plan Social di Crisis no por deshaci den dos aña locual a neglisha structuralmente durante mas di 30 aña. Asta oficina di impuesto cu ta cobra tur aña centenares di miyon florin mester a busca otro edificio despues di un tempo relativamento cortico mientras mester a desocupa e ‘propio cas di gobierno’ pa motibo di decadencia total. Tambe e tereno valioso cu LAGO a regala pa Afl. 1,- a decaï den tempo record, mescos cu e casnan na Seroe Colorado cu a bende na amigo di partido pa prijs di baca flaco. A resulta cu e gobiernonan (= partidonan politiconan) consecutivo no tawata capas pa mantene ni un solo propiedad di gobierno (=pueblo) di un manera drechi. Asina nan a desprecia centenares di miyon florin na balor.
‘Solushon’
Parke Wilhelmina tambe a sufri mesun destino. Pa hopi aña e tawata ofrece un bista tristu cu hopi mata di coco y otro tipo di vegetashon morto. Esey a cambia drasticamente ora cu e hotel den cercania a ofrece pa cuid’e riba su propio gasto. Mescos ta conta pa e edificio di aduana. Despues di varios aña di keho di e usuarionan cu tambe tawata yena e caha di gobierno tur aña atrobe cu centenares di miyon florin, tampoco por a sigui uza e edificio aki despues di un tempo relativamente corto. Pa motibo di falta total di placa y posibilidad pa presta, e gobierno actual a ‘forsa’ un oficina nobo: un contratista ta haya e edificio desaproba y e tereno valioso pa construi un compleho di vivienda pa Afl. 45 miyon. A cambio e ta traha un oficina pa douane nobo na Barcadera pa Afl. 9,5 miyon. Segun un parlamentario entusiasma, ‘esaki ta un situashon cu tur dos ta gana, inventa pa un gobierno creativo’.
Mientrastanto ta parce cu gobierno mes a bira conciente di su incapacidad/incompetencia total riba tereno di mantenshon. Pesey el a acudi desde specialmente 2010 na ‘solushon’ (manera SOGA y PPP) na unda e contratista ta responsabilisa su mes pa mantenshon di e proyecto te ora cu gobierno a caba di paga e proyecto completamente. Claro cu esaki ta un ‘solushon’ hopi mas caro pa e pagador di impuesto cu ya caba mester paga pa tur e otro fayonan di maneho di gobierno.
Enigma
Hopi hende na Aruba no ta logra comprende ta con bin cu gobierno consecutivo, a pesar di un economia florecente cu -e tempo ey- entrada continuamente creciente(!)- aparentemente no por a logra cumpli cu e principionan mas elemental di mantenshon. Cu tanto consehero y coordinador mester tawata un asunto simple pa diseña un programa di mantenshon y invershon pa tur infrastructura y departamento. Pesey por conclui cu atenshon serio pa e funcshonamento drechi di departamento y e mantenshon na infrastructura no ta(wata) ningun prioridad. Esey (t)a costa comunidad un dineral. Di otro banda e ‘maneho’ aki ta cuadra perfectamente den e ‘modelo di negoshi’ di gobernante. Pasobra nan por (a) gana bon placa pa medio di un destaho no-publico of contractashon directo pa un proyecto nobo como remplazo pa por ehempel un edificio cu a bay perdi. Como e cherry riba e bolo di fruta e ta percura tambe pa e propaganda necesario pa siguiente elecshon.