Uso eficiente y efectivo di recurso humano, financiero y material
E intenshon di e gobierno di coalishon pa trece tur actividad relashona cu desperdicio bao di e empresa estatal ‘sui generis’ Serlimar, cu ta cay directamente bao di ministro encarga cu infrastructura, ta contene tur elemento pa un fracaso, bao di cual tin principalmente esun di contene gasto. Manera por deduci di e prome parafo di e Introducshon di e ‘Memorie van Toelichting’ ‘e empresa’ desde su institushon na 2005 (14 aña caba anto!) ta lidia cu deficit financiero. Aparentemente un bon administrashon financiero ta ‘un paso mucho grandi’ pa ‘e empresa’ aki. E anterior introducshon algun tempo pasa di un tarifa general pa recoge desperdicio a resulta caba den un problema sin solushon pa ‘e empresa’. Entre 2015 y 2017 so caba ‘e empresa’ a resulta incapaz di cobra Afl. 41 miyon (!) na cobransa pendiente. Un cantidad di cliente cu sí a cumpli cu e cobransa, a bira victima di esaki. Raad van Advies (RvA) ta constata tambe anto bastante desafio den e setup proponi…
Un desafio adishonal ta e extra responsabilidadnan cu e proyecto di ley tin intenshon di otorga na ‘e empresa’. Esey ta posible solamente a traves di tuma mas personal na trabao. Esaki lo conduci na gasto adishonal di personal, cu na 2015 tabata Afl. 12,3 miyon, pero na 2018 ya a subi te na Afl. 14 miyon. Cu esaki gobierno ta hay’e den problema cu e acuerdonan cu CAft pa reduci gasto di personal. Ademas lo ta un pregunta si ‘e empresa’ lo por cumpli cu e rekisitonan di mantenimento. Esey lo pone e entidad den un posishon excepshonal den gobernashon. Tur e puntonan aki hunto ta trece bastante riesgo cu nan. E costonan cu ya ta calcula bastante halto por resulta di ta hopi mas halto ainda, pa via di e deficiencianan menshona den un fase mas laat, cu tur consecuencia di esaki.
Confiabilidad
Comunidad mester por confia cu gobernashon ta firme den su maneho. Asina e actual gobierno di coalishon a anuncia den su publicashon ‘Economic Policy, A strong and resilient economy 2019-2022’ cu lo adopta e principionan di economia circular. Esey ta encera entre otro cu mas tanto posible lo separa tur componente di ‘desperdicio’ y pone esey disponible pa re-uso. Esaki ta yuda combati agotashon rapido di materia prima, ta alivia medio ambiente y ta disminui e ‘carbon footprint’. E uso di un ‘incinerator’ cu ta kima tur desperdicio sin mas ta pone tur e principionan aki un banda y como tal ta bay linea recta contra e maneho gubernamental stipula.
Tambe invershonista mester por confia cu e gobierno(nan) ta cumpli cu nan compromiso y acuerdonan. Esaki ta di particular importancia den caso di invershon grandi. Empresa grandi hopi biaha ta tarda varios decada pa recupera nan invershon. Na 2008 MetaCorp a haya di gobierno e derecho di erfpacht pa un tereno grandi ‘pa procesamento di desperdicio’. A base di esaki e empresa subsidiario EcoTech/EcoGas en berdad durante varios aña a haci invershon considerable, prome pa separashon di desperdicio y seguidamente a expande cu un procesamento di desperdicio tecnologicamente avansa (pyrolyse) cu e posibilidad (cu te awor no a resulta) di producshon di gas pa suministra na e planta di awa y energia di Aruba. E proyecto di ley ta stipula den articulo 2, inciso 2 sin embargo cu Serlimar ta e unico entidad encarga cu maneho di desperdicio na Aruba. Cu esey gobierno no solamente ta condena e empresa na un destrucshon inmenso di capital, pero tambe ta kita di comunidad Arubano un experticio acumula importante.
Aki tambe ta bin dilanti e pregunta huridico si gobierno, di un momento pa otro, por reclama e derecho exclusivo riba un actividad economico cu pa decada caba di manera relativamente exitoso ta ser haci pa sector priva. Segun RvA esaki por tin un efecto negativo fuerte riba actividad empresarial y economia di Aruba y esaki lo por tin un impacto negativo riba clima di invershon.
Transparencia (no intenshona)
E proyecto di ley ta trata di duna un imagen di e costonan di recolecshon y maneho di desperdicio y e manera con tin pensa pa financia esaki. Cu esey ta bira transparente cu ainda tin varios bashi den e propuesta di ley; cu e cobransanan pa recoge desperdicio no ta logra ni yega cerca na cubri e costonan di recoge desperdicio y cu por lo tanto lo ta necesario pa tin otro tipo di cobransa. Como tal lo tin un caso di ‘kruissubsidie’. Como cu segun e Memorie vanToelichting (Introducshon) “otro empresa lo ta liber pa recoge desperdicio”, gobierno ta crea cu esaki un ‘unlevel playing field’. E asina yama kruissubsidie aki, di cual otro empresa no por dispone, ta haci cu Serlimar por ofrece tarifa mas abao. Aki anto ta trata di competencia desleal cometi pa gobierno.
Mes tanto transparante ta e argumento di e ministro concerni na ocashon di e firmamento di e MOU entre e empresa priva Ecotech/Gas y e empresa productor di cement Colombiano Argo. E ‘envirobales’ cu actualmente ta dera den suelo Arubano, por ser usa como combustible pa e empresa di cement aki. Cu esey Aruba tin un producto di exportashon cu ta reduci te na un grado importante e acumulashon di desperdicio riba e isla. E ministro responsable a resisti esaki fuertemente cu e argumento cu gobierno ta doño di e desperdicio y como tal lo no permiti ‘cu e desperdicio aki contribui na contaminashon na un otro pais’. Un intenshon por cierto aplaudible, si esaki no tabata algo ridiculo dentro di e contexto Arubano-Colombiano. E residuo di desperdicio den e envirobales ta representa un cantidad cu ta igual na esun di un bario den un ciudad di tamaño mediano na Colombia. Banda di esey ta usa esaki directamente como combustible den producshon di cement, na lugar di kima azeta, cu ta hopi mas dañino. Hasta esaki por conduci na un situashon unda e procesamento di desperdicio por bira mas barata y por pasa e beneficio aki pa e cliente. Esaki sigur lo ser aprecia den un situashon unda ciudadano ta haya nan mes continuamente confronta cu aumento di gasto, entre otro pa subsidia e costonan di desperdicio cu ta keda aumenta.
Interes general?
E transparencia (no intenshona) menshona aki riba ta mustra tambe claramente cu e ministro ‘cueste lo que cueste’ kier realisa un incinerator na Aruba. Esey posiblemente ta trece cune cierto efecto negativo pa interes general! Tambe en vista di desaroyo mundial den direcshon di economia circular, mas y mas pais ta pasa pa deshaci di nan incinerator(nan). Re-uso di desperdicio gradualmente ta birando e principio di guia. Pero tambe e emishon continuo di gran cantidad di huma cu tur tipo di elemento desconoci (pasobra: ta kima TUR cos!), cu por forma un peligro pa salubridad publico, ta hunga un papel importante aki. Empresa ta gasta suma grandi na filter pa por cumpli cu rekisito ambiental di e paisnan envolvi.
Na Aruba, pa motibo no bon conoci, te awe ainda no tin un ley ambiental actualisa. Pa un supercontaminador manera un ‘upgrader’ esaki lo ta e paraiso na mundo, pero tambe pa un empresa cu un incinerator cu ta desea di corta gasto y cu ta haya un gobierno ‘di bon voluntad’ na su banda. Pa e bisiña y turista (Renaissance Island) esaki ta trece riesgo di salud inaceptable cune.
Pero tambe na e banda di costo tin cierto riesgo envolvi den un incinerator. Aparentemente gobierno a haci compromiso na e empresanan interesa di un cantidad minimo di 90.000 ton di desperdicio pa aña. Calculashon haci di producshon di desperdicio na Aruba ta duna sin embargo alrededor di 70.000 ton. Esey por implica cu gobierno lo mester duna e empresa permiso pa importa desperdicio di otro pais pa permiti e empresa opera na un nivel rentable. Loke nos no kier haci cu otro pais, nos ta haci cu nos mes si!
Esaki por significa tambe cu gobierno mester duna e empresa permiso pa haya e placa cu falta via un aumento di e cobransanan pa desperdicio. Ningun di e dos opshonnan ta alternativa atractivo pa Aruba. Ta bin acerca cu Aruba por haya daño enorme pa fayo di e incinerator pa motibo di falta di mantenimento adecua (na Aruba un problema general real!) manera na e momento aki ta sucede na Amsterdam pa varios luna caba, siendo cu nan ta hopi mas rico. Esaki por trece consecuencia financiero cu ta sobrepasa capacidad di Aruba considerablemente, mientras cu esaki ya caba ta na un punto minimo.
Tambe pa posible invershonista e incertidumbrenan aki ta forma un problema grandi. No ta pornada a resulta cu ningun di e 17 empresanan cu a duna un ‘muestra di interes’ tabata dispuesto di participa den e destaho publico.
Aumento di debe nashonal
De hecho e modelo ‘DBOOT’ (Design-Build-Own-Operate-Transfer) cu e ministro ta propone ta un forma di financiamento ‘PPP’ (Private Public Partnership). E total di compromiso financiero ta suma actualmente casi Afl. 1 biyon. Pa un pais chikito manera Aruba esaki ta nifica un compromiso sumamente grandi cu ta sobrecarga e presupuesto cu ya ta bao preshon cu mas di Afl. 80 miyon pa aña extra. Hunto cu e compromisonan di pago di interes di mas di Afl. 220 miyon pa aña esaki ta implica un compromiso permanente di presupuesto di Afl. 300 miyon ( 20% di e presupuesto total!) pa e proximo 20 añanan. E incinerator cu ta considera esun mas ideal pa e situashon di Aruba mester costa, incluyendo ‘finder’s fee’ (?!), alrededor di Afl. 300 miyon. Den e caso mas faborable esaki ta e costonan maximo. Pero… e lo no ta e prome proyecto cu ta fracasa: algun aña pasa a logra deshaci, de hecho a traves di sabotahe di indole politico-partidario, di e proyecto di Bouldin & Lawson pa procesamento di desperdicio.
Di e manera aki e pagador di belasting Arubano a mira casi Afl. 30 miyon desaparece manera huma riba dump, mientras cu e empresa no a funcshona ni un aña. Y tambe e siguiente iniciativa (priva) pa atende e problema di desperdicio na Aruba cu instalashon nobo (Pyrolyse) no a resulta (ainda) pa cumpli cu e expectativanan. E opshon pa un incinerator na e momento aki lo contribui na un di dos destrucshon di capital cu no por responsabilisa, mientras cu no a agota tur posibilidad di mehorashon.
Banda di esaki ta existi e posibilidad cu e proyecto aki finalmente ta resulta mas caro ainda, manera recientemente tabata e caso cu otro proyecto PPP, esta hospital. Ey e costonan a aumenta cu alrededor di 60% (Afl. 150 miyon?) pa motibo di ‘eror humano’. Den e caso aki hasta RvA no por haci un prueba di cumplimento cu proposito, pasobra “e fundamentashon financiero ta faya gravemente.” Pero… ya caba sin aumento di costo no premira e proyecto di ley nobo aki ta nifica un peso adishonal considerable riba cartera di tanto ciudadano como empresa cu pa e ultimo 6 añanan a haya basta peso adishonal pa carga caba.
E aumento di 30% di e total di compromiso PPP ta trece cune tambe cu e total di compromiso PPP di un solo golpi (a traves di un solo proyecto!) ta aumenta te na alrededor di Afl. 1,3 biyon. E situashon actual sin embargo ta considera pa CAft como un compromiso maximo cu ya caba ta stretch e capacidad financiero di Aruba te na su extremo. Ta bin acerca cu gobierno subsiguiente di Aruba a scoge pa administra e compromisonan aki ‘off-balance’. Pero… segun e reglanan di ‘International Public Sector Accounting Standards’ (IPSAS) no mag haci esaki (mas) y mester pone esaki como debe riba balans. Esaki ta aumenta inmediatamente e corelashon debe/GDP bastante negativo caba, di casi 90% te mas di 100%. Esey ta haci un situashon financiero cu ya caba ta insostenible, critico.
Oportunista
Mirando cu ta trata di un proyecto di ley, Raad van Advies (RvA) mester duna su conseho riba e propuesta aki. Esey a sucede algun tempo pasa tambe pa loke ta trata e convenio cu sindicato di duanero cu a ser firma pa e ministro di finanzas di e tempo ey na juli 2017, poco prome cu elecshon. RvA y otro instancia consultivo a reacshona – cu tur nan razon – negativamente ya cu esaki lo a crea un precedente. E sistema nobo lo a aumenta e gastonan di personal di gobierno cu ya ta demasiado halto, cu mas di Afl. 50 miyon. E actual ministro di finanzas y asunto economico a gara e conseho aki duro pa rechasa e exigencianan di e sindicato di Aduana.
Di totalmente otro indole ta e actitud pa cu e conseho di RvA mayoritariamente negativo relashona cu e proyecto di ley encuanto procesamento di desperdicio. Ta trata esaki di un manera laconico, aparentemente pasobra e no ta cuadra cu ‘maneho di e ministro’.
Parlamento tambe ta ambivalente pa loke ta trata sigui e consehonan di RvA. Esun parlamento ta ignora un conseho pa cu LAft; e otro ta sigui e mesun conseho integralmente…
E otro banda di e medaya
Naturalmente no ta gobierno so cu ta comete ‘eror’. Segun e ministro, EcoTech/Gas den e ultimo añanan
a haci nan mes culpable di diferente violashon di ley; nan ta orienta riba e mercado comercial cu ta duna e ‘placa grandi’; nan no ta cumpli cu acuerdo; nan no a cumpli suficientemente cu expectativa pa loke ta procesamento di desperdicio y nan ta duna comunidad un imagen robes. E proyecto di ley nobo segun e mandatario no lo afecta nan posishon competitivo significantemente.
E impreshon ta existi sin embargo, cu e actual proyecto di ley presenta ta consecuencia tambe di un conflicto ente e ministro concerni y e propietarionan di EcoTech/Gas. Ta hiba esaki entre otro via lomba di e empleadonan cu hasta ta ‘hala garoshi’ pa nan pa duna nan argumento mas forsa.
Tur esaki por conduci na daño grandi pa comunidad Arubano. Aceptashon y implementashon di e proyecto di ley segun e empresa priva por conduci na eliminashon di tur competencia di ‘e empresa’ (Serlimar). E temor cu ‘e empresa’ (Serlimar) pa loke ta diferente aspecto lo no cumpli cu expectativa, ta, a base di e experiencianan hopi reciente di ‘e empresa’, como tambe manera general di operashon den gobernashon, ta hustifica. Den combinashon cu e destrucshon di capital na gran escala y e eliminashon di experticio acumula, e riesgo y costonan programa (y imprevisto!) di e conflicto aki pa comunidad di Aruba ta anto totalmente no-responsable.
Complementario
Den practica a keda demostra cu tanto Serlimar como EcoTech/Gas ta eherce nan tarea actual di recoge y maneha desperdicio di bon manera y cu nan por funshona fraternalmente banda di otro. Den cierto sentido nan ta hasta empresa complementario. Ta sensato anto pa crea un modelo den cual ambos empresa por keda opera banda di otro di un manera saludable. Esey ta exigi consulta continuo entre ambos partido. Mirando e tenshon cu a aumenta, ta sensato pa laga e consulta ey tuma lugar prome hunto cu y via un comishon independiente y obhetivo, cu e conocimento necesario. Esaki lo por consisti di mediador di gobierno, un experto financiero y/o economico y un experto huridico cu conocimento al caso, cu pa cuminsa mester duna comunidad di forma transparente un presentashon corecto (obhetivo!) di e asunto. A base di e consula aki por adapta e proyecto di ley di tal forma cu ta surgi un ‘level playing-field’ y por mantene e costonan di procesamento di desperdico a largo plazo na un nivel controlable.
Parlamento
Finalmente parlamento ta e institushon cu ta dicidi definitivamente si e proyecto di Serlimar di e ministro encarga cu Infrastructura y Medio Ambiente mester continua. Ta di spera cu nan ta ser guia na prome instante pa criterio di bon gobernashon, integridad, transparencia y interes general, pa cual nan a hura na aceptashon di nan oficio. Sin embargo, si interes partidario y/o di coalishon haya prioridad, anto ta existi gran probabilidad cu ta scoge pa un proyecto cu lo aumenta mas ainda e peso financiero, grandi caba, pa poblashon di Aruba. Cu esey parlamento ta bira nada mas cu un extenshon di e parlamento cu apenas 3 aña pasa, tambe pa considerashon di indole partidista, ciegamente a aproba un acuerdo cu Citgo cu tabata totalmente intransparente, cu consecuencia negativo grandi a largo plazo pa Aruba.