‘Lucha interno’?
Na comienso (dos luna pasa!) a parce cu Prome Ministro (PM) tawata dispuesto pa acepta e condishonnan severo di Hulanda. Nan lo desvia masha tiki di e ley actual di CAft y e ‘propio intenshonnan’ pa reforma. E shete añanan cu Hulanda a premira pa ‘pone ordu’ tawata abarcable. Pero e resistencia fuerte di un gran parti di e elite politico di ataño y esnan actual a pone un paro n’esaki. E perdida di NAN autonomia a resulta di ta un sacrificio mucho grandi.
Malcomunicashon?
Segun PM, e ampliashon di e periodo (di tres pa cinco luna) cu e prestamo lo cubri a percura pa su cambio di postura. Esey tawata e gota conoci. Pero e declarashon di secretario di estado Knops ta duna un otro imagen: a hala e tres lunanan ‘pa atras’. Posiblemente pasobra Hulanda, a base di e declarashon di e propio gobierno di Aruba a sali for di e punto di bista cu Aruba mes tawatin ‘suficiente placa pa wanta un luna y mei pa dos luna mas’. Consecuentemente e prestamo di Hulanda no mester cubri e dos lunanan ey. Pues, segun e interpretashon aki ainda ta trata di tres luna.
Consecuencia di e ‘lucha interno’
Ta hiba e ‘lucha interno’ pa defende autonomia cueste lo ke cueste pa medio di un campaña feroz contra Hulanda, ademas di organisashon y persona na Aruba cu ta tribi di tin otro opinion. Asina a envolvi Conferencia Permanente de Partidos de America Latina y el Caribe (COPPPAL), cu na su turno ta keha Hulanda pa su ‘comportashon neocolonial bergonsoso’. E organisashon aki, ta bou di liderazgo di entre otro partido politico manera Partido Revolucionaria Institucional cu durante varios decada caba ta hiba un maneho hopi corupto na Mexico; Partido Socialista Unido bou di liderazgo di presidente Maduro cu a transforma Venezuela den un estado criminalisa; Frente Sandinista de Liberashon Nacional cu pa hopi aña caba ta hiba un maneho represivo na Nicaragua y Partido Comunista de Cuba cu tambe ta bon conoci pa su violashon structural di e derechonan humano fundamental y integridad (“Mustra’mi ken ta bo amigonan pa mi bisa’bo ken bo ta”!). E grupito aki mester convence Hulanda cu e no ta tuma e derechonan constitushonal di su partnernan den Reino mucho na serio! Na Aruba ta ataca Arubiano cu otro opinion personalmente y na forma ofensivo (pa falta di argument valido!) entre otro como ‘spion, paga pa Hulanda’.
Consecuencia di malcomunicashon
E malcomunicashon cu Aruba ainda ta dispone di algun medio financiero, di un banda ta hiba na terminashon completo di eventual reserva financiero cu Aruba lo por tin ainda. Como cu, te unda cu sa, no (tawa)tin ningun reserva, ta mas logico cu gobierno a hala su obligashonnan di pago na sector comercial pa mas atras. Esey lo pone sector comercial mas ainda den problema. Pero tambe e buskeda pa posibel financiador (internashonal) lo por a irita Hulanda. Pasobra for di unda por haya den e mundo aki y bou di e circumstancianan dificil actual, instancia/pais dispuesto pa duna Aruba, cu en realidad ta bancarota, mas o menos dos biyon (dos mil miyon!) florin na prestamo y regalo (!) cu 0% di interes y bou di condishon cu mester sigui mantene un elite politico cu a causa hopi desaster? Ademas, cualke prestamo di otro parti lo aumenta inecesariamente e pago obligatorio di interes, cu ya caba ta gigantesco y practicamente impagable.
Argumento
E defensornan di ‘autonomia’ ta defende nan posishon cu opinion di varios profesor cu ta critica e actitud di Hulanda. Den esey nan ta actua oportunista como cu pa mas di 30 aña nan a neglisha structuralmente tur advertencia y recomendashon pa mehora calidad di gobernashon, hincando comunidad di Aruba asina den hopi problema. Esnan pro aceptashon di e condishonnan Hulandes ta expone cu a bira tempo pa ‘hende ta central’ y cu ‘politica’ por lo pronto mester haci un paso patras. Ta na ‘politica’ pa dicidi si di berdad e tambe por fin lo pone ciudadano Arubiano central.