National Integrity System Assessment
E ‘National Integrity System Assessment (NIS-A) ta un analisis extenso pa midi e efectividad di e sectornan concerni di pais pa combati corupshon como elemento di mal gobernashon. Ta investiga e riesgonan di corupshon tanto dentro di e propio ‘pilarnan importante’ como den nan contribushon pa combati corupshon en general den comunidad. Ta trata di e siguiente pilarnan:
E NIS-A ta analisa tanto e cuadro/funcshon formal di cada pilar y con e ta funcshona den practica. E analisis pues ta trece na cla discrepancia cu tin entre e ‘intenshon formal’ y e realidad pa clarifica na unda tin espacio pa mehorashon. Mas tanto ta haci uzo di e instrumento di entrevista, na unda ta envolvi e ‘agentenan anti-corruptivo’ den sector gubernamental, comercial, sindical, ciudadanía, prensa, etc.
Resultado di tur esaki ta publica den un rapport cu ta sirbi pa stimula e boluntad politico y e preshon di grupo civil pa bin cu iniciativa pa reforma relevante. Reforsando e Sistema di Integridad Nashonal ta promove bon gobernashon y consecuentemente ta contribui na un sociedad mas husto.
Ehecushon
E analisis lo cuminsa for di principio di 2020 bou di guia di mr. dr. W. Slingerland, cu desde 2009 ta docente riba tereno di derecho internashonal y Europeo, ademas di etica y integridad na SAXION University of Applied Sciences, Academy of Governance, Law & Urban Development. Na 2018 el a ricibi un doctorado a base di su investigashon di ‘corupshon den red social’. Sra. Slingerland a ricibi training special di Transparency International pa lidera e NIS-A na Hulanda na 2012. Como tal e tin amplio experencia.
Realisashon
E proyecto di NIS-A ta uno costoso. Pesey tambe FGCA a busca financiamento di varios partner pa realisa e proyecto aki. Gobierno ta asumi mitar di e gastonan mientras cu aporte di parti di Aruba Bank, Caribbean Mercantile Bank, Banco Central y VNO a percura pa e otro mitar. Arubaanse Investeringsbank lo supervisa administrashon di e fondonan pa garantisa su bon uzo. Pa medio di esaki FGCA kier extende un gradicimento special pa tur e instancianan aki y gobierno di Aruba pa nan tremendo colaborashon!
Ideal
Mescos cu ta e caso cu e Ley pa financiamento di partido politico y Ombudsman, den Reino Hulandes Aruba ta e unico pais cu no a ehecuta un NIS-A. FGCA ta spera cu tur esakinan lo keda realisa durante aña 2020. Esey lo nifica un adelanto importante riba caminda pa bon gobernashon. Esaki sin mas lo cumbini henter comunidad di Aruba!