Dia 27 di augustus 2016 Dr. Antonito ‘Mito’ Gordiano Croes a fayece inesperadamente pa motibo di un atake di curazon. Durante e siman cu a pasa cu tur razon a dedica hopi atenshon na su consehonan, e funcshonnan cu el a ocupa y su producshonnan cientifico, tur a base di su experticio riba tereno di ley estatal.

A pesar di su acercamento cientifico, Mito Croes no a produci teoria so. Un di su producshonnan mas importante tawata raport Calidad cu a traha bou di su presidencia huntu cu mr. H. Fransen (hurista), mr. N. Henriquez (hurista) y sr. F. De Kort (registeraccountant). A skirbi e raport aki pa e practica real. Y ki sorto di practica!

Ya pa hopi aña caba e calidad di gobernashon na Aruba y Antia Hulandes a laga hopi di desea. Pa Mito Croes esaki tawata asina problematico cu e, como ministro plenipotenciario, a tuma e iniciativa pa un simposio di Reino na 1995 cu e tema ‘Bon gobernashon na pais chikito’. E meta tawata pa yega na ‘cambio fundamental y mehorashon di calidad riba nivel di gobernashon na unda lo salbaguardia bon gobernashon den nos comunidad di escala chikito’.

Na fin di e simposio, ministro-presidente di Aruba a propone pa forma un comishon mixto den contexto di Reino cu e tarea pa –usando tambe resultado di e simposio- formula proposishon concreto pa acshon cu lo mehora calidad di gobernashon na Aruba y Antia Hulandes. Na principio di 1997 esaki a conduci na instalashon di e grupo di trabou ‘Calidad di gobernashon’ bou di presidencia di mr. A. G. (Mito) Croes. Ya caba na oktober 1997 a publica e raport Calidad.

Raport Calidad no ta describi excplicitamente a fayonan di politica di Aruba, pero mas bien ta duna recomendashon pa mehorashon di diferente aspecto di gobernashon. For di e recomendashonnan aki sí ta bira cla ki fayo tawatin cu mester a coregi urgentemente segun e grupo di trabou. E gobierno (di AVP) di e tempo ey a ricibi e raport y a dicidi di ehecuta e recomendashonnan integralmente den ley nobo. P’esey asta a haci palabrashon cu sindicato, locual e diferente organisashon di dunador di trabou tambe a acorda den Protocol 2000 cu mientrastanto tur hende a lubida.

Anke a cuminsa cu hopi entusiasmo, ya caba na 2001 a para tur actividad. E calidad dudoso di gobernashon di e gobierno di e tempo ey tawatin consecuencia serio pa su credibilidad. Ademas formashon di un gobierno nobo di un otro color politico y cu otro prioridad posiblemente tambe a contribui n’esey. Di e 20 recomendashonnan a realisa apenas un parti hopi chikito. E recomendashonnan principal cu tawata enfoca riba financiamento di partido politico, maneho di personal, administrashon financiero y control no a sobrebibi.

Consecuentemente patronahe politico, un administrashon financiero pesimo y proyecto dudoso a keda determina e imagen politico. Mientrastanto esakinan a conduci na un debe nashonal gigantesco cu tur su consecuencianan y cu duda funda riba integridad di gobernante y parlamentario. Pesey tambe gobernashon di calidad ya no mas ta un simpel cuestion di moral of etica, pero un necesidad urgente.

Esnan cu a traha raport Calidad tawata masha bon na haltura di e practica politico. Ademas (mayoria di) e recomendashonnan te dia di awe tin hopi balor pa realisashon di bon gobernashon. Esaki ta hopi necesario mes. Pesey tambe Fundashon Gobernashon di Calidad Aruba (FGCA) cu hopi agradecimento lo haci uzo efectivo di e herencia lubida aki di Mito Croes, mescos cu di e palabrashonnan –cu no a cumpli ainda- di Protocol 2000.

Realisashon di e ideal di Mito Croes pa bon gobernashon na Aruba, den coperashon cu entre otro ciudadano, manera organisa den FGCA, lo ta e miho muestra di honor di e alumno di Mito Croes y su partido, na homenahe di nan gran arkitecto, especialmente despues di e ultimo 19 aña, na unda solamente a presta servicio di lip na dje.

17-8-2016