Regla y excepshon
Segun articulo 25 di CV ‘por otorga un trabou, suministro of servicio di cual e gasto calcula ta suma na Afl. 100.000,- of mas, solamente si un destaho publico a tuma luga’. Motibo di esaki ta pa duna comerciante un oportunidad husto y alabes pa realisa e miho prijs pa Pais. Articulo 26 ta duna cuater posibilidad pa desvia di articulo 25. Den e casonan ey mester tuma luga un destaho no-publico of mester otorga e proyecto cu contractashon directo. E ministro concerni ta determina den e dos casonan aki completamente independiente ta ken e ta duna e proyecto. E resolushon ministerial mester clarifica pa ki motibo a scohe pa e forma diferente di destaho.
Conclushon di Controleria General (CG)
Segun CG, desviashon di e stipulashonnan di articulo 25 sa pasa regularmente. Pero hopi biaha no sa formalisa nan den un resolushon ministerial of sa haci’e despues di e echo. For di investigashon di CG ta resulta cu tur dos partido grandi a haci nan mes culpabel n’esey. Segun Ministerio Publico (MP), e ausencia di un motivashon (drechi) por ta un violashon di CV, cu ta indica como delito segun Codigo Penal. Segun MP, e practicanan aki por tin consecuencia perhudicial pa caha di gobierno, ta trata posiblemente di competencia inhusto, ta viola transparencia den maneho di gobierno y por surgi ‘fenomeno indesea’.
Precupashon di MP
E analisis di e gran cantidad di excepshon riba articulo 25 di CV cu clarificashon deficiente den e resolushonnan ministerial ta precupa MP masha, specialmente pasobra tawata trata frecuentemente di proyecto den cual hopi placa tawata envolvi. Como cu MP en principio no ta inicia persecushon tanten cu e delito cometi den funcshon publico no ta den combinashon di un ‘delito comun’ (manera robo of estafa), no sa entama un investigashon di e eventual delito cometi den funcshon publico como tal. Pesey e PG di e tempo ey a tuma e iniciativa pa motiva parlamento pa entama un investigashon di e practicanan aki. Pasobra parlamento mester vigila ‘e ehecushon corecto di autoridad di ministro cu CV a dun’e’. Tal investigashon ta na beneficio di un uzo eficiente di placa di pueblo, mescos cu competencia husto, transparencia den maneho di gobierno y combatimento di ‘fenomeno indesea’.
Recordashon y reprimanda
Despues di dos luna cu no a ricibi ningun reacshon di parlamento, e PG interino a manda un carta recordatorio cu e pregunta si a ricibi su prome carta y den caso positivo, cual ta e reacshon. Pero parlamento no mester a contesta e preguntanan dificil aki pa motibo di e reprimanda di e sucesor di e PG en cuestion. El a plantea cu ‘den cuadro di e separashon di poder (Trias politica) como principio den un estado di derecho no ta corecto cu di parti di MP ta purba motiva parlamento na un eventual ehecushon di e autoridad menshona’. Asina e asunto a caba y ningun hende mas a menshona posibel infracshon (penal) di articulo 25. Di e manera aki ‘politica’ a mantene su campo liber y parlamento por a sigui recrea.
Negoshi
Ta un secreto publico cu sa otorga proyecto tambe a base di patronahe politico y e modelo di negoshi di ‘politica’ na amigo politico y financiador di campaña, evadiendo e reglanan di destaho. Como cu esakinan por exihi cualke prijs sin ningun tipo di competencia, Pais (pueblo!) mayoria di biaha ta paga (hopi) mas di lo necesario. E balor adishonal ta cubri (mas cu suficiente) e contribushon na campaña y/of sa ‘reparti honestamente’ entre e gobernante concerni y e comerciante. Como cu e ‘practica di destaho’ aki a tuma luga durante decada, sin ningun duda Aruba a perde hopi miyon!
Promesa bashi
E pregunta ta pakico parlamento no a haci ningun esfuerso pa defende interes di e pueblo votador. E contesta ta simpel: tanten cu ministro y parlamentario ta procedente for di mesun partido, ta trata di conflicto di interes. Pesey parlamentario no lo haci nada pa dificulta nan gobernante. Al contrario: nan ta proteh’e ferozmente contra tur atake. Como tal, parlamento ta comporta su mes ya caba pa decada como complice di gobernante cu structuralmente ta neglisha stipulashon di ley pa enrikece su mes na un manera ‘legal’, pues cu aprobashon di parlamento. Aparentemente e ganashi ta asina atractivo cu promesa pa mehorashon ta keda…promesa. Mescos cu tawata e caso cu e Ley di financiamento di partido politico cu a aproba apenas recien despues di casi 30 aña di cuantioso promesa ripiti, pero di tal forma cu e ta completamente deficiente/inutil.