1. Statuut ta keda e vestibulo pa independencia total riba cierto termino
Den e caso aki Reino no ta funcshona mas como siguridad y no ta garantisa mas e derecho- y libertadnan humano fundamental, ni e siguridad legal ni e calidad di gobernashon. Tur pais ta riba nan mes y ta carga nan mesun responsabilidadnan (pues tambe pa nan asuntonan financiero!). Sinembargo, e Statuut actual no ta provee un procedura explicito pa sali for di Reino. For di e preambulo ta sali na cla cu e paisnan a acepta Reino como orden legal a base di nan propio boluntad. Consecuentemente nan por sali tambe a base di nan propio boluntad. Un decishon pa haci tal mester refleha deseo di pueblo, por ehempel pa medio di un referendum.
2. Ta transforma Reino pa un Mancomunidad (Gemenebest) di pais independiente
Pais independiente por forma un Mancomunidad Hulandes cu eventualmente por comparti e hefe di estado (segun modelo di e Mancomunidad Britanico). Miembrecia di e Mancomunidad ta a base boluntario. Teoricamente e lo por ta habri pa pais cu actualmente ya no ta forma parti (mas) di Reino. E pregunta importante ta kico ta uni e paisnan den un Mancomunidad, ademas di un cabes di estado comun y un historia comparti. E contesta lo por ta: un manifiesto comun di norma y balor, manera esun di e Mancomunidad Britanico. E manifiesto aki ta describi cu e miembronan di e Mancomunidad Britanico ta comparti e balornan di democracia, derecho humano y un estado di derecho. Sinembargo, den un Mancomunidad no por obliga ningun pais pa pone e norma- y balornan aki den practica. Den un construcshon di Mancomunidad no tin un solo nashonalidad, ni un maneho exterior y/of defensa comun. Tampoco ta existi automaticamente e trafico liber di hende y mercancia. Segun ta spera, un construcshon di Mancomunidad den e realidad politico no necesariamente lo libera Hulanda di su responsabilidadnan. E comunidad internashonal –pensa riba pais manera Merca of Francia- lo por sigui mustra Hulanda moral- y politicamente- riba e desaroyonan den e paisnan Caribense. Pues, un Mancomunidad lo ta basa riba balor comparti, pero e ta kita practicamente tur posibilidad di e paisnan participante pa obliga otro pa cumpli cu e palabrashonnan.
3. Ta transforma Reino den un union structural, na unda a explicita e principionan di derecho y libertad humano fundamental, siguridad legal y calidad di gobernashon den Statuut. Ademas lo mira ki otro aspecto mester di mas atenshon.
Den caso cu e paisnan di Reino ta scohe pa keda permanentemente den Reino, anto e ora ey nan ta scohe pa un fundeshi nobo di coperashon. Esey ta nifica un Reino basa riba balor y norma comun cu e posibilidad pa obliga otro cu instrumento efectivo pa cumpli cu nan. Esey ta nifica mas, en bes di menos Reino. E ta nifica mas bien un ‘Reino Uni’. Como punto di salida pa e fundamento renoba lo por scohe pa elabora e puntonan importante di articulo 43 di Statuut, esta derecho- y libertad humano fundamental, siguridad legal y calidad di gobernashon. Ademas ta mira cua aspecto ta falta pero cu sí ta necesario. Tambe lo por considera pa pone banda di asunto manera relashon exterior y defensa como asunto di Reino, otro tema manera siguridad legal.
Den cuadro di e ‘comienso nobo’ aki nos lo por papia e ora ey di un ‘Manifiesto di Reino’. Den caso cu ta explicita y ehecuta e puntonan di enfoke, mester duna contenido tambe na cumplimento (y control riba esaki) di e pakete nobo y comun di norma y balor. Instituto existente por hunga un tarea di Reino of mester crea instituto nobo. Ta importante pa esakinan di berdad ta bira instituto comun. Den e cuadro aki, e Comite di Relashon di Reino ta pensa na creashon di un Secretariado di Reino y/of un (of mas) instancia independiente pa cu reglamento di conflicto.