Desde algun tempo e ‘Team Bestrijding Ondermijning’ (TOB) esta e Team pa combatimento di actividad cu ta mina e estado, ta encarga cu investigashon y persecushon di criminalidad internashonal cu ta mina e pais. E ta haci esey entre otro cu investigashon financiero internashonal riba tereno di labamento di placa, fraude (di impuesto) y corupshon. TBO ta consisti di agente di polis nashonal, FIOD (Servicio Fiscal di Informashon y Investigashon) y Ministerio Publico y e ta traha hunto cu recherche local. E ta cay bou di autoridad directo di Procurador General (PG). TBO ta activo na Corsow, Sint-Maarten y e islanan BES, pero…no na Aruba!
Fin di maart 2018 tawatin un encuentro entre e partnernan di Reino tocante e posishon di RST. A resulta cu Aruba, Corsow y Hulanda ta diferencia pa principio tocante e papel di RST. Hulanda ta partidario di un RST cu mas tanto posibel ta opera autonomo. Al cambio, Aruba y Corsow hustamente kier limita su competencianan. Segun e islanan aki, husticia ta un asunto autonomo. E hefe di polis local lo mester carga e responsabilidad final y lo mester duna cuenta na su propio ministro di husticia. E punto di bista aki ta e di tantisimo cu, den caso mas positivo, ta muestra di un imagen exagera di e propio capacidadnan.
Propio imagen falso
Durante decada, e islanan di Aruba y Antia a rechasa interferencia di Hulanda cu nan asuntonan financiero interno a base di nan ‘ autonomia’ riba e tereno aki y bou di e lema “Nos mes por”. E resultado ta bon conoci. Gracias na intervenshon di Hulanda, anke hopi lat, a scapa pueblo di tur e islanan di un derumbe completo di nan pais pa motibo di mal administrashon financiero serio di parti di e gobiernonan consecutivo. Pero e mal administrashon aki a percura sí cu practicamente tur servicio na e islanan ta funcshona bastante defectivo pa motibo di falta structural di placa. Ta trata entre otro di enseñansa, asunto social y infrastructura. Siguridad tambe ta cay aki bou, como punto di enfoke di husticia. Pero…aki, otro asunto tambe ta hunga un rol.
Corsow y Sint-Maarten
Algun decada pasa, e lider di VVD di e tempo ey, esta Frits Bolkestein, a cualifica e ‘islanan Hulandes den Caribe’ como un neishi di bandido. Den e articulo ‘’Curaçao, het Caribische rovershol van het Koninkrijk der Nederlanden’ di De Tijd (9-9-2015), e ministro di Husticia di Corsow di e tempo ey a declara entre otro cu e baho mundo na Corsow cada bes mas ta tene e ‘mundo normal’ den su gara. Cu tur razon Ministerio Publico y Hulanda tin miedo cu criminal kier uza un Corsow autonomo como luga liber pa labamento di placa criminal. E mundo di gamble lo financia partido politico pa nan haya tur libertad pa actua.
Apenas na april 2018 e ‘International Narcotics Control Strategy Report’, un publicashon anual di US State Department, a informa cu na Corsow, organisashon cu ta laba placa por haci mal uzo di e disponibilidad di dollar Mericano, banco di off-shore, dos zona liber, un waf di container y e refineria mas grandi den region di Caribe, ademas di un cantidad grandi di resort y casino riba e isla. Segun e investigadornan, e practicanan di labamento di placa ta tuma luga entre otro pa medio di cumpramento di cas y edificio via transferencia bancario y transporte di placa entre Corsow, Hulanda y e islanan den Caribe Hulandes.
Segun e mesun raport, na Sint-Maarten tambe “labamento di ganashi criminal ta tuma luga pa medio di invershon den empresa y esondite fiscal internashonal. E sector di gobierno ta keda vulnerabel pa crimen relata cu integridad”.
Aruba
E raport ‘Veiligheid en Integriteit van Aruba: context en perspectief’ (Siguridad y Integridad di Aruba: contexto y perspectiva) di Departamento di Inteligencia di Aruba (VDA), publica na 1995 ta mustra riba un relashon estrecho entre integrante importante di e dos partidonan politico cu organisashon di droga na Aruba. Pesey tambe VDA ta bisa cu “e echo cu conflicto di interes y sensibilidad pa corupshon ta practicamente normal, ta aumenta e influencia riba politica y e actividad gubernamental”. Sinembargo, esey no ta algo di pasado so.
E mesun raport di US State Department ta constata: “Pa motibo di su ubicashon, Aruba ta un punto di transferencia pa droga for di Sur-America pa EEUU y Europa, ademas pa placa cu ta core den direcshon contrario”. Y: “Contrabanda masal di placa ta forma un riesgo grandi pa motibo di e ubicashon di Aruba entre EEUU y Sur-America. Labamento di placa pa mayoria di caso ta pa motibo di ganashi di droga ilegal cu organisashon criminal ta produci y cu ta tuma luga via compra di cas y edificio”.
Apenas recientemente a resulta cu e gabinete berde a cuminsa e negociashonnan en cuanto Green Corridor cu un ex-gobernador na Colombia cu mientrastanto ta den prizon pa motibo di asesinato y corupshon. Mayoria di esnan cu a negosha cu e ultimo gabinete di AVP tocante Citgo tambe ta cera pa motibo di corupshon na gran escala.
Protecshon di Husticia
Pues ta parce cu riba e nivel mas halto di gobernashon di e islanan di Caribe Hulandes, relashon cu figura y organisashon criminal ta lo mas normal di mundo. Un k’e otro cu aparente conocemento y/of coperashon di e ministronan di Husticia. Tawata trata entre otro di permiti y/of protecshon di figura criminal y di colega ministro cu no tawata tene nan mes mucho na ley y cu mas bien a ocupa nan mes cu ‘ actividad cu ta mina e estado’.
Den e cuadro aki ta inaceptable cu instancia importante di investigashon manera RST lo mester somete nan mes na e caprichonan di politica local. Pasobra esaki frecuentemente tin otro interes na pecho cu e interes general. Pues, mas nos ministronan ta resisti un RST autonomo, mas ta parce cu nan kier sigui proteha e baho mundo contra investigashon y persecushon mucho fuerte. Riba dje un RST autonomo por percura tambe pa nos propio ministronan cuminsa cuida nan mes miho y cu por fin nan lo bay goberna drechi. Pesey tambe, e responsabilisashon di RST na PG ta e miho caminda di core. Pasobra den su contactonan cu ministro, e ta dispone di suficiente garantia pa tene politikeria pafo di porta. Di e manera aki tin un conecshon bunita entre e autonomia local y calidad.