Inhusto?
MinHus ta irita pa motibo di mi ‘ponencia inhusto cu relashon cu figura y organisashon criminal riba e nivel di mas halto den e parti Caribense di Reino tawata lo mas normal na mundo, un k’e otro cu aparente conocemento/coperashon di minHus’. Recientemente US State Departmente a publica su (International Narcotics Control Strategy Report’ tocante e lucha contra labamento di placa. E biaha aki tambe a dedica atenshon na e islanan Caribense di Reino. Den su descripshon tocante e practica di labamento di placa riba nivel mundial y e lucha contra esaki, ta menshona e persecushon penal y e condenashon di un ex-prome ministro di Corsow. Knipselkrant di Corsow a duna un analisis extenso di e colaborashon entre mundo baho y esun ‘normal’ (http://www.knipselkrant-curacao.com/kkc-blog-machtsstrijd-curacao-ontbrandt-de-onderwereld-infiltratie-in-de-vdc/). E dos ‘incidentenan’ aki ta duna un indicashon di e situashon actual, pero den pasado tipo di ‘incidentenan’ asina tambe sa pasa. Na Hulanda esey a conduci na e denominashon di Antia Hulandes como un neishi di bandido. Naturalmente e pregunta ta keda si ta trata di excepshon of regla…
General
E situashon na Sint-Maarten di ningun manera ta miho. Al contrario. E situashon aki ya ta asina pa decada y ta forma parti di e cultura politico tradishonal. Aruba tampoco tawata forma un excepshon di su partnernan Caribense. No ta por nada cu dos di su prome minHusnan (y un prome ministro) a keda describi extensamente na un forma negativo den e raport ‘Veiligheid en integriteit van Aruba: context en perspectief’ di Servicio di Siguridad Arubano (AVD). Riba dje dos minHus di dos gabinete consecutivo di color politico diferente a ricibi un ‘instrucshon’ (aanwijzing/KB) di parti di gobierno di Reino pa motibo di ‘maneho dudoso’. Pero e ultimo gabinete di AVP tambe a negosha riba ‘e nivel di mas halto’ cu partner/empresa/pais corupto tocante contracto importante. Finalmente, un colega actual di minHus t’ e cu apenas algun tempo pasa tawatin ‘relashon amistoso’ cu un exponente di nos ex-partner di Reino cu mientrastanto ta wordu cualifica dor di investigador como estado criminalisa. Awendia e partner ey ta sinta su castigo den prison na EEUU pa motibo di entre otro traficashon di droga (http://werkgroepcaraibischeletteren.nl/wordpresssite/wp-content/uploads/2017/03/SME-A-Criminalized-State.pdf). Pues ta trata di un gran mayoria di nos añanan di Status Aparte. Pa ningun minHus esaki tawata desconoci. Pues sin mas ta trata di conocemento, mientras cu por culpa varios ministro tambe di coperashon.
Transparencia
Den tur esaki, financiamento (for di fuente dudoso) di partido politico a hunga un papel importante. Den esaki, e minHus actual por efectua un cambia grandi dor di publica e financiamento extenso di su propio partido durante e ultimo elecshon. Pesey e no tin mester di warda introducshon di e ley pa financiamento di partido politico cu tur partido grandi ta bin primintiendo ya caba pa algun decada. Riba dje, anke sea pa kita tur duda tocante integridad di su predecesornan, e lo por boga pa duna un bista den (parti di) e raportnan di AVD. Como cu no ta na interes general pa (keda) proteha ministro dudoso, no por sigui sconde esaki pa wowo di pueblo a base di e pretexto di ‘secrecia’.
Generalidad y Autonomia
Pero no ta trata solamente di algun caso di por ehempel e gabinete Mike Eman-2 of di algun caso of di minHus individual, sino di fayo constante di gabinete completo durante e ultimo tres decadanan.
Nan a faya riba un escala grandi y den tur sentido cu daño enorme pa comunidad. Te leu cu nos sa, ningun minHus a opone contra esaki.
Di e manera aki, Aruba a prueba di no ta cla (ainda) pa carga su autonomia cu el a lucha asina duro p’e. Di ningun manera esey kier men cu awor e lo mester entrega esaki anto. Locual sí e ta nifica ta, cu gobierno/gobernante lo mester posishona su mes mas modesto, mester realisa su mes su fayonan y a base di un identificashon di e fayonan mester compone un plan cla y ehecutable pa desaroyo di un autonomia responsabel riba tur tereno di maneho. Si ta resulta necesario pa pone e responsabilidadnan di e diferente partner- y structuranan p’esey ‘on-hold’ of pa limita nan temporalmente na interes di comunidad (manera ta e caso awor cu finansas bou di supervishon di Caft), anto lo mester haci esey.
Minamento (di estado)
Mi ta di mesun opinion cu minHus cu e pasonan cu el a tuma pa combati criminalidad ta prometedor. Ta lamentabel sí cu funcshonamento di un Ekipo pa Combatimento di Minamento (di Estado), manera ta e caso caba na e otro islanan, no a tuma luga ainda na Aruba. E pregunta ta si e argumento di ‘autonomia’ ta(wata) suficiente argumento p’esaki. Den e cuadro aki, e intenshon di mi prome articulo tocante RST ta bira cla. Mas y mas, investigashon di tipo di instancia asina ta enfoca riba ‘criminalidad gubernamental’ y ‘minamento di Estado’ di parti di funcionario di gobierno. Inevitablemente ta trata aki di miembro di partido/coalishon di minHus. Mester exlui di antemano y di un manero completo eventual metemento di minHus cu e proceso di investigashon pa motibo di interes/’capricho’ politico-partidista y/of protecshon di posibel finansista dudoso di partido. Pasobra lamentablemente esaki lo por resulta den ‘proteschon di baho mundo’, manera ya caba a tuma luga varios biaha den pasado. Specialmente den nos comunidad di escala chikito cu liña personal cortico, no por exlui ‘influencia ministerial’, no importa e bon boluntad y profesionalidad di e minHus concerni.
Conocemento y manteshon di ley
Mi ta completamente di acuerdo cu minHus cu mi conocemento di Statuut, nos Constitushon y demas ley ta laga (hopi!) di desea, sigur den comparashon cu su conocemento. Asina mes mi sa lo suficiente pa realisa mi mes cu ya caba for di comienso di nos Status Aparte, nos (partido) politiconan a viola structuralmente, aña aden, aña afo, yen di stipulashon di ley for di tur e fuentenan legal ey. Sinembargo, nunca mi a tende nos minHus al respecto. Mientras cu esey lo mester ta su prome punto di enfoke. Pasobra (bon) ehempel lo tin seguidor. Asina, segun Conseho di Consulta, e presupuestonan di 2018 di practicamente tur departamento, inclusive esun di minHus, tawatin varios fayo legal. Cu excepshon di e di dos departamento en cuanto enbergadura (esta di Enseñansa), cu por cierto ta bou di responsabilidad di un partido y un gobernante sin ningun experencia guberrnamental, pa di prome biaha den historia di Aruba, a cumpli cu e exigencianan legal. Esey no tanto ta bisa algo di e partido/gobernante en cuestion, sino mas bien di e otro partido-/gobernantenan cu ‘experencia gubernamental’ di asta algun decada. E caracter structural di tur e fayonan ey ta duna sospecho di intenshon premedita, locual ta un asunto serio.
Fata morgana?
Pues, mi alegato no a ‘cay completamente for di shelo’. Mi investigashonnan durante e ultimo añanan a base di tur e documentashonnan oficial di nos instancianan di conseho y control nashonal y internashonal a convence’mi cu integridad dentro y di nos gobiernonan desde Status Aparte te cu e ultimo gabinete Mike Eman-2, ademas di e otro islanan, no tawata un asunto logico. Al contrario! Funcionario cu mas expertico huridico y financiero-economico di instancia di conseho/control a constata cu nos raportnan ta duna un imagen apenas superficial pero cu ‘ e realidad ta hopi pio’! No solamente na Aruba, pero tambe na e otro islanan! Pesey tambe mi ‘ponencia di un imagen generico’ di e calidad di gobernashon den Reino Caribense. Den e cuadro aki mi ta haci un apelashon na minHus pa stimula terminashon di e ‘deber di secrecia’ di (ex-)funcionario y di e caracter secreto di
documentashon pa asina describi un imagen mas realistico di calidad di gobernashon na Aruba durante e ultimo 31 añanan.
Pa teremina
Den articulo anterior despues di comienso di e gabinete Wever-Croes, mi a indica cu mi ta contento cu bon gobernashon y integridad ta punto di enfoke di e maneho. Lamentablemente, segun mi, no ta pone e intenshonnan ey suficientemente den practica. Por ehempel, e resultadonan di e proceso di screening ta completamente opaco, mientras cu tawatin basta duda tocante e ministeriabilidad di candidato. Ta di spera cu minHus anke sea lat, por yena e vacio aki den cuadro di e transparencia cu a priminti. Ademas ta recomendabel pa minHus duna un declarashon tocante e incidencia halto di e tantisimo familiares (cercano) dentro di e circulonan di ministro. Pasobra di e manera aki ta rek e criterianan di bon gobernashon di tal forma cu a bira imposibel pa papia drechi locual ta full robes. Asta pa hende cu ta dispone di conocemento y calidad huridico special.