Pa hopi pais 2017 ta e aña di escogencia importante. E pueblonan di Hulanda y Francia a caba di scohe pa para e populismo cu a lanta tur caminda. Sur-Corea a scohe pa un presidente cu un posishon mas suave pa cu Norte Corea. Segun un politico Hulandes Corsow a vota contra mafia y pro un estado di derecho. Y mas lat e aña aki ta toca turno na pueblo di Aruba. ¿Ta scohe pa mantenshon di status quo y pues ta limita na scohe entre e partidonan tradishonal cu ta priminti monton di oro of ta scohe pa bon gobernashon? ¿Nos ta fiha nos mes mas tanto riba nos propio interes y nos ta na busca di privilegio cerca e diferente partidonan en cambio di nos voto of… eventualmente nos por considera tambe e ‘interes general’: kico ta miho pa nos pais y nos yiunan? ¿Den esey nos ta limita nos bista pa e 4 añanan benidero y nos isla chikito so of mas bien nos ta mira un generashon padilanti y den cuadro di nos relashonnan den Reino?

Cualke escogencia cu nos haci, e resultado di e grupo total di pueblo lo tin consecuencia grandi pa e añanan benidero. Pesey ta importante pa nos decishon personal no depende di solamente considerashon emoshonal (“Mi famia semper tawata AVP y pesey…”). Un momento di reflecshon tocante e relashon entre calidad di gobernashon di e ultimo (4-30?) añanan y nos situashon actual por trece claridad den esaki.

Mescos cu hopi otro pais chikito y grandi, e situashon financiero di Aruba no ta nada di gaba. Naturalmente e pregunta ta: con bin? Tin motibo simpel di cual tur tin di ber cu e manera con a goberna Aruba. Por ehempel con a anda cu nombrashon di personal y e placa disponibel y locual a fia. E dos partidonan grandi ta culpa otro di ta e causa di tur miseria pa motibo di a hiba mal gobernashon. ¿Pero…acaso e acusashonnan ta cuadra completamente of parcialmente cu berdad? ¿Y si tur dos tin razon, ainda nan ta merece nos voto? ¿Y si NAN no merece nos voto, ta KEN SÍ? ¿Partido nobo ta e solushon? ¿Di berdad tin diferencia entre e partidonan nobo entre nan y ‘esnan mas anticua’? ¿Cualnan anto ta e diferencianan y den kico nan ta distingui nan mes? ¿Hende ta drenta politica pa idealismo of mas bien pa saca probecho personal? ¿E partidonan mes tin suficiente knowhow pa logra un cambio real den gobernashon? ¿Y si esey no ta e caso, ta con nos ta haya esnan cu sí ta capacita pero no ta dispuesto pa drenta e arena politico?

¿Y con nos mes ta pensa tocante nos futuro relashon cu Hulanda y nos posishon den Reino? ¿Nos ta para tras di e partido cu ta grita cu mester termina e supervishon di CAft lo mas pronto posibel? ¿Of nos ta contento cu Hulanda a interveni y a scapa nos di un caida liber den un abismo financiero? ¿Nos ta di acuerdo cu algun ‘control’ riba nos gobernashon local di parti di nos partner mas grandi den Reino of nos te kere ciegamente den capacidad y bon voluntad di nos propio gobernantenan a pesar di tur prueba di lo contrario? ¿Nos mes tin suficiente hende capas pa tur funcshon importante of nos isla simplemente ta mucho chikito p’esey y ta necesario pa busca partner pa nos sigui desaroya?

Cualke escogencia cu nos haci, cada un tin consecuencia, manera pa un posibel cambio (necesario!) den nos orden legal, calidad di gobernashon, contenido y calidad di nos enseñansa, preservashon di nos medio ambiente y e desaroyo general di nos pais. Pesey ta importante pa pensa tur esaki bon den e lunanan benidero y si ta necesario, busca informashon.

Fundashon Gobernashon di Calidad Aruba kier duna un man den esey. Pesey e Fundashon ta publica e lunan benidero articulo cu ta duna un bista di e calidad di gobernashon di e ultimo añanan cu e consecuencianan pa nos pais. Asina e lector por determina si e diferente partidonan di berdad tawatin un balor adishonal pa nos pais manera nan ta gusta alega. Tambe lo duna un ehempel di un orden legal cu posiblemente ta duna mas contenido na democracia. Pero e serie ta cuminsa cu diferente opshon pa nos futuro relashon dentro di Reino. Pasobra e exigencianan mas severo cu e partner mas grandi den Reino ta/lo (por) pone na nos participashon, lo bay determina cada bes mas e practica di gobernashon na nos isla. Consecuentemente, e escogencia pa e opshon cu nos lo scohe, ta determina pa gran parti e tipo di gobernashon cu lo guia nos isla durante e añanan benidero. Asina tambe nos mes ta duna contenido na nos propio futuro y di nos yiunan.