Den su analisis di e concepto di Ley Presupuesto 2017, CC ta plantea cu e crecemento economico di 5,7% cu gobierno ta premira ta mucho rosado. CC mas bien ta para tras di e pronostico di Banco Central di Aruba (BCA) cu ta premira un crecemento mas modesto di solamente 0,4%. Consecuentemente PBN lo sali mas abou y e relashon entre debe y PBN lo aumenta den sentido negativo. Pa presupuesto esaki tin como consecuencia cu e entrada total di impuesto cu ta premira lo baha cu mas o menos Afl. 130 miyon. Ni sikiera tur e entradanan cu ta premira di ricibi for di e acuerdonan cu Citgo-Valero lo ta suficiente pa cubri e reducshon di entrada aki.
Pa gobierno esaki ta forma un problema grandi, mas ainda cu a bira cla cu su gastonan lo sigui aumenta cu Afl. 46 miyon, compara cu 2016. A pesar di tur promesa pa reducshon structural di gasto di personal, esaki ta sigui aumenta. Ademas AZV ta rekeri un aporte mas halto di gobierno, e gastonan di interes ta subi cu Afl. 6 miyon te un total di Afl. 215 miyon, mientras cu e gastonan di PPP ta rekeri Afl. 9 miyon extra.
Como problema adishonal CC ta menshona cu gobierno no a realisa su 7 medidanan di maneho (renoba) for di e ‘Calculo multi-anual adapta 2016-2020’ cu lo mester a genera medio financiero adishonal (suficientemente). Pues CC tin duda grandi si por logra e entradanan cu a presupuesta. Pero CC tambe ta premira problema grandi cu e Fondonan di Siguridad Social. Ademas di e ya menshona crecemento di e aporte financiero di parti di gobierno pa AZV den e añanan benidero, e ta menshona tambe e fayonan di SVB y e gastonan di administrashon hopi halto di diferente fondo bou di maneho di SVB.
CAft a adverti pa no laga e gastonan di proyecto di PPP subi mas cu 1,5-2% di e gastonan total di e sector publico colectivo di Aruba. Sinembargo, CC ta premira cu na 2019, e gastonan aki lo sali 2,5x mas halto y lo constitui 5,2% di e gastonan total di Aruba. Esaki lo ta a costo di e flexibilidad financiero y e espacio di gastamento di Aruba.
Tur esaki ta haci cu CC ta hopi pesimista tocante e capacidad di gobierno pa mantene e fayo presupuestal bou di e percentahe di 0,5% cu a determina pa ley, sin tuma mas medida structural di economisashon. A base di su propio calculashonnan, CC ta premira un fayo presupuestal cu ta casi 6x mas halto, esta 2,8% di PBN (sin inclui e resultado –desconoci- di ATA). Pues CC ta pronostica cu debe di gobierrno lo sigui subi y cu esaki solamente lo por baha dentro di un tempo razonabel si Aruba cumpli completamente cu e normanan di CAft. Solamente asina e lo bin na remarca pa refinanciamento di su debenan pa medio di Hulanda a base di un tarifa di interes mas razonabel.
TOCANTE STORIA… – 2
A pesar cu Aruba continuamente ta pone e ‘consehonan’ di Caft un banda y ta indica cu por logra e normanan di presupuesto manera stipula den ley ‘riba propio forsa y segun propio idea’, ta bira cada bes mas complica pa riba e base ey cumpli cu e normanan. Consecuentemente, e ultimo dos añanan a logra e normanan cu masha hopi dificultad, gracias na suerte incidental y triki di contabilidad. Esun di mas famoso ta e eliminashon definitivo di e Afl. 60 miyon cu pais Aruba ya caba pa 3 decada tawata debe fondo di SVB. Tawata trata di premie paga pa ciudadano rubiano na fondo di SVB di Antia Hulandes cu despues di Status Aparte pa motibo di separashon di bienes a entrega na gobierno di Aruba. E placa ey a desparce den e pos sin fondo di gobierno y nunca a yega na caha di SVB di Aruba.
Ta cinico cu e gobierno actual ta cualifica e ‘traspaso’ definitivo di e premienan aki pa medio di e ley specificamente diseña pa e caso aki como un ‘regalo’ di parti di SVB cu por cierto financieramente ta pasando den tempo dificil. E tipo di ‘solushon’ aki no ta genera mucho confiansa pa pespectiva di un mehorashon structural di presupuesto y como tal di e sostenibilidad financiero di Aruba.
Den e cuadro aki ta remarcabel cu Conseho di Consulta (CC) no ta duna comentario tocante pago di e prestamo di Afl. 414 miyon cu ta madura na 2017. Di otro banda Caft ta declara cu gobierno ‘solamente por presta placa pa finansia e debe aki si presupuesto ta cumpli cu e normanan di e Ley di Ordenansa Aruba Supervishon Financiero’. No cabe duda cu esaki lo causa basta tenshon tempo cu mester regla esaki. Asina mes ta trata aki di ‘peanuts’: na 2023 mester paga otro prestamo di Afl. 545 miyon cu, hunto cu e pagonan di PPP lo suma mitar di e presupuesto di Aruba.
Pero reapertura di refineria cu a causa hopi hubilo den mundo politico sí ta causa precupashon pa CC. Entre otro ta trata di e riesgo di obligashon grandi y no-transparente pa cu Citgo, e gastonan futuro di desmantelashon, e consecuencianan di daño ambiental, ademas di areglo legal deficiente. E gastonan aki den curso di tempo por supera facilmente e fracaso di e acuerdo di hedging di WEB.
Den su evaluashon di e intenshonnan di maneho, CC ta descualifica e plannan di gobierno manera a presenta na apertura di e aña parlamentario. E medionan financiero cu a reserva ta asina tiki cu no tin ningun posibilidad di un ehecushon (cualitativo) di ombudsman (di mucha), e agenda di sostenibilidad, mehorashon di e coherencia social pa medio di e Acomodashonnan MultiFuncshonal, e mehorashon necesario di e sistema di enseñansa y infrastructura di varios departamento, restructurashon di e sistema salarial, upgrading di personal, etc. Ademas CC no ta permiti Ministro di Husticia tuma e organo aki haci cu observashon vago y insignificativo pa cu e propositonan di maneho manera ‘cu lo combati criminalidad cu forsa’ y cu ‘comunidad por conta cu e determinashon di Ministro di Husticia’. E descripshonnan aki asta ta forma un violashon di e exigencianan pa cu proposito di maneho segun Ley di Comptabilidad di 1989.
Pero tambe e intenshon di gobierno pa ‘traha schouder na schouder cu e partnernan social’ ta carece di credibilidad. E coperashon cu e partnernan social cu a duna speransa na comienso di e prome gabinete Mike Eman, na inicio di e di dos gabinete a keda remplasa pa desconfiansa pa cu intenshon di gobierno. Tur caminda tawata reina e sentimento cu gobierno so tawata determina e temanan di dialogo y a core pa asunto di maneho importante pero controversial. Consecuentemente a pone un fin na e ‘coperashon’.
Ademas gobierno mes ta viola su apelashon pa ‘duna e bon ehempel con pa discuti tocante tema comunal importante na un manera rashonal’ evitando como unico e dialogo cu Fundashon Gobernashon di Calidad Aruba. Gobierno ta nenga rotundamente pa ehecuta den ley concreto e recomendashonnan pa mehora calidad di gobernashon y e proceso politico di su consehero principal cu recientemente a fayece. Esey ta pone bon na cla cu su prioridadnan no ta den promoshon di interes general.
Pa comunidad di Aruba mientrastanto no tin duda ken ta presenta mas realidad den su storia. Asta despues di 30 aña di Status Aparte gobierno sin falta ta cera aña cu un presupuesto supletorio extenso’como corecshon’. Den su forma actual e ta asta ilegal pasobra gobierno ta gasta placa prome cu Parlamento a dun’e autorisashon. Consecuentemente, henter e proceder aki ta duna e impreshon cu aki ta trata di engaño. Pesey tambe ta recomendabel pa pone mas fe den e opinion di CC (y Caft) tocante e situashon real di Aruba.
Armand Hessels, Presidente di Fundashon Gobernashon di Calidad Aruba