Manera di custumber den politica ‘tradishonal’, e ofishi di parlamentario no ta esun principal. Asina POR ya caba a dispensa su dos ‘votegetternan’ principal pa nan tarea di parlamentario, tumando na cuenta cu di tur manera nan lo haya un puesto di ministro. Pasobra ta esey ta e meta. Solamente como ministro por logra algo den nos ‘estado di derecho’, por haci y deshaci y por haci ‘negoshi’. Parlamento ta sirbi solamente como decorashon pa aparenta e ilushon di un estado di derecho y pa legalisa disparate di gobierno. Como recompensa, parlamentario por biaha durante e aña cu participashon na Par(anda)Latino como climax.
Aparentemente lo dura un tempo mas prome cu esnan prome riba lista y e votegetternan principal lo realisa nan mes cu en realidad nan luga ta den Parlamento. Di mes e excepshon riba esaki ta lider di e partido di gobernashon mas grandi cu ta bira prome ministro como identificashon di e maneho. Sinembargo, e lucha ferviente pa puesto di ministro cu casi tur otro ‘candidato di preferencia’ ta hiba, ta duna e impreshon fuerte cu e bentahanan tradishonal di e funcshon di ministro manera dunamento di privilegio como recompensa di e sosten cu a ricibi y ‘e negoshi’ ta sigui hunga un rol predominante.
Ya caba pa algun decada e debilidad y disfuncshonamento di Parlamento di Aruba ta forma un fuente di precupashon. Segun Constitushon e tin cinco tarea importante.
Na prome luga e mester defende nos Constitushon y bienestar di Aruba lo miho posibel. Pero si lesa raport di specialmente Conseho di Consulta (CC) y Controlaria General (CG), ta bira cla cu Parlamento a faya structuralmente pa cu e puntonan aki. Asina el a permiti Gobierno (casi) tur aña atrobe pa entrega presupuesto (algun biaha hopi) lat. Ademas el a acepta sin problema e falta di realismo y e cantidad di omishon, y el a legalisa tur fayo dunando su aprobashon ciegamente. Di e manera ey Parlamento mes a debilita su funcshonamento. Tambe e maneho di nombrashon discriminatorio di personal basa riba color politico y cu consecuencia financiero serio no a causa ningun disturbio den Parlamento.
Na di dos luga Parlamento mester huzga presupuesto, entre otro a base di e consehonan di CC. Pero a pesar cu a discuti presupuesto tur aña den Parlamento, a neglisha conseho, advertencia y recomendashon di CC sistematicamente. Pesey a resulta cu a ripiti esakinan durante decada y cu a aproba presupuesto irealista cu un cantidad di fayo legal y tecnico sin ningun problema.
Tur aña tambe Parlamento mester huzga e cuento anual cu ta duna cuenta di e entrada- y gastonan di nos pais. Cu e cuenta anual aki den man mester evalua e ultimo presupuesto y por haci adaptashon pa e siguiente presupuesto. Pero…desde Status Aparte Parlamento nunca a ricibi ni a exigi un solo cuenta anual aproba pa accountant. Consecuentemente nunca (!) por a huzga calidad di e administrashon financiero di Aruba. Di mes no por a probecha di un ‘efecto instructivo’ pa probecho di e siguiente presupuesto.
Finalmente Parlamento pa ley mester elabora e administrashon financiero mas aleu den ley di ordenansa pa por ehecuta su tarea di control na un manera responsabel. Ademas e mester fiha regla pa garantisa e legalidad di e gobernashon, garantizando calidad di gobernashon. Pero aki tambe ta discuti durante decada (!) riba e mehorashon necesario di Ley di Comptabilidad. Te ey ta keda! Y no a
haci nada na ponemento di regla pa garantisa legalidad di gobernashon, garantizando bon gobernashon.
Riba dje e cantidad y/of calidad di participashon di parlamentario na e diferente comishonnan di trabou aparentemente ta insuficiente. Di otro banda nan ta sobresali den reforsa e polarisashon entre e partidonan y consecuentemente den comunidad. Esey ta haci cla cu interes di partido ta hopi mas importante cu interes di comunidad. Consecuentemente e pregunta ta, ki balor agrega nos Parlamento tin pa nos estado di derecho democratico.
En realidad Parlamento ta e schakel di mas importante den henter e cadena di ‘checks & balances’. Entre otro a base di e conseho-, advertencia- y recomendashonnan di parti di e instancianan denomina pa ley, Parlamento ta huzga calidad, legalidad y efectividad di e maneho di gobierno. E ultimo 30 añanan, el a faya barbaramente di haci tal. Den practica, Parlamento tawata e schakel di mas debil. Como consecuencia, e cadena di ‘checks & balances’ no a funcshona debidamente, cu resultado devastador. Un causa di esaki tawata entre otro e cultura di silencio di comunidad cu no a hala atenshon di su representantenan. Pesey tambe por spera un mehorashon den funcshonamento di Parlamento solamente si pueblo sigui e trabou di gobierno na un manera critico y ta exigi acshon corectivo di parti di su represetantenan. Esey ta nifica pues cu pueblo ta haya e Parlamento tambe cu e ta merece!