Desde e ultimo aña partido politico ta bira mas conciente di e termino ‘bon gobernashon’. Ta uz’e mas frecuente pa crea e impreshon cu di berdad e partido ta opera segun norma estricto y cu e tin solamente bon intenshon pa cu comunidad. Hasta sa uz’e pa indica cu e partido a goberna den pasado segun e normanan di bon gobernashon. Nada ta mas leu di e berdad. Esey ta conta specialmente pa e dos partidonan grandi cu e ultimo 30 añanan a goberna Aruba alternativamente.

Asina e maneho di personal durante e diferente gabinetenan sin excepshon tawata caracterisa pa mal gobernashon. No solamente a nombra demasiado empleado, pero regularmente esaki a tuma luga contra stipulashon di ley. Ningun partido a yega di sigui e conseho- y advertencianan di instancia di conseho y control local y internashonal en cuanto e maneho di personal. E consecuencianan di e maneho ey y e echo cu gobernante a nenga consistentemente pa trece cambio den esey a hunga un papel importante den aumento di e problemanan financiero di Aruba. Na e momento aki gasto di personal ta forma e obstaculo principal pa un mehorashon structural di finansas publico. Mientrastanto personal di mas a costa comunidad di Aruba biyones di florin.

Pero a administrashon financiero tambe tawata tur putri. Asina e calidad di cada presupuesto sin excepshon tawata hopi bou di nivel. A resulta cu no sa siña di eror. Tanto Consulta di Conseho (CC), como Controlaria General (CG) tur aña (!) a expresa nan desaprobashon pa motibo di e calidad inferior, e nivel frecuentemente irealistico y e echo cu sa entrega presupuesto (cu algun excepshon) (mucho) lat. Di e manera aki structuralmente a viola nos Constitushon.

Mientras cu sa entrega presupuesto mucho lat, NUNCA a entrega cuenta anual aproba cu tambe ta rekeri pa ley! Desde añanan ’60 nunca a ofrece parlamento un cuenta anual aproba pa accountant. Asina a viola durante e ultimo 57 añanan e exigencia di ley cu mester controla presupuesto pa medio di cuenta anual. No ta por nada cu CC y CG ta ripiti den tur nan raport cu esaki ta mina e derecho (of deber!) di budget di parlamento. Pero mescos cu tawata e caso riba tereno di maneho di personal, tur gobierno, irespecto e color politico, a neglisha e consehonan pa mehorashon y e advertencianan pa e consecuencianan na un manera sistematico. Esey a conta tambe pa e recomendashon di CG pa diseña un plan di mehorashon di e administrashon financiero y pa pon’e den practica. Durante 28 aña a neglisha e conseho aki. Danki na intervenshon di gobierno di Reino pa medio di e instrumento di C(A)ft, pa di prome biaha concretamente ta implementa mehorashon. E echo cu no por produci un cuenta anual prome cu 2020 ta un bon indicashon di e estado deplorabel di e administrashon financiero di Aruba.

Na mesun manera entre otro CC, CG, SER, IMF y Comishon van Lennep desde siglo pasa a duna recomendashon tras recomendashon pa simplifica e sistema compleho y anticua di impuesto di Aruba. Asina lo aumenta e entrada di impuesto y lo dificulta evashon di impuesto cu tawata hopi simpel pa haci. Ni AVP ni MEP a sigui e recomendashonnan aki. Consecuentemente Aruba a perde di gana centenares di miyones di florin y posiblemente hopi mas. Mesun serio tawata e echo cu a pesar di tur e nombrashonnan di personal cu a tuma luga durante decada, hustamente esunnan di e instancianan di control (CAD y CG) structuralmente a bay atras a pesar di tur e petishonnan urgente na gobierno pa contra-aresta e desaroyo aki. Como consecuencia ambos instituto no por a cumpli cu nan obligashonnan legal. Esey tawatin consecuencia serio pa transparencia di e maneho financiero cu a hiba. Por caracterisa tur e formanan aki di negligencia como un nivel serio di mal gobernashon.

Ademas ambos partido grandi a haci nan mes culpabel na evadi e stipulashonnan di destaho publico. Riba dje nan a haci bofon di e normanan di transparencia y nan no a tene nan mes na nan palabrashonnan. E lista di e violashonnan di norma di bon gobernashon ta mas largo ainda. Pues no ta trata di si un partido a practica mal gobernashon si of no, sino mas bien den ki grado. Huridicamente no ta haci mucho diferencia si un persona ta apropia su mes ilegitimamente di Afl. 5000,- of Afl 500,-. Den tur dos caso ta trata di robo. Na mesun manera ningun partido cu a ‘goberna’ Aruba, por libra su mes di a practica mal gobernashon. Riba e website www.deugdelijkbestuuraruba.org ta figura e normanan mas importante di bon gobernashon manera explicita den Raport Calidad. Ta sali na cla cu servicio di lip (ainda) no ta forma parti di e normanan. Asina mes tin speransa cu bon gobernashon por bira un tema politicamente interesante. E traspaso di servicio di lip pa ehecushon concreto sinembargo ta hopi dificil, pero urgente.