Mantenshon di patronahe politico den maneho di personal
Pa gobierno esaki ta un pilder amargo. Pasobra e ta nifica cu por fin e mester ehectua concretamente tur advertencia y conseho di parti di SER, RvA, ARA y tur otro comishon di investigashon cu el a ricibi y neglisha durante mas di trinta aña, aña aden aña afo. Tawata trata di advertencia pa no sigui laga e aparato gubernamental crece sin limite. Segun e National Commission on Public Finance na 2006, un crecemento procentual limita ya caba dentro di poco aña(2009) lo hiba na un surplus den presupuesto di Afl. 25 miyon. A neglisha e recomendashon aki locual a conduci na un fayo presupuestal di Afl. 157,5 miyon na 2009.
Mantenshon di e caos administrativo
Ya caba for di su prome cuenta anual pa aña 1987, ARA a adverti pa e caos total den e administrashon financiero di Aruba. Algun aña despues el a mustra cu e caos aki ta duna tur espacio pa fraude y malversashon cu ta costa Aruba hopi placa. El a duna cantidad di recomendashon pa mehora esaki. Aña aden, aña afo. Te dia di awe sin resultado como cu recientemente a descubri malversashon di mas o menos Afl. 1 miyon den e departamento di Enseñansa pa Empleo. Sinembargo, pa un CAD ‘handicap’ (cu mucho tiki personal cualifica), investigashon mas extenso di tur departamento di gobierno te ainda ta imposibel.
Mantenshon di un sistema di impuesto anticua
SER, RvA, ARA, Commissie van Lennep, Banco Central y IMF, tur a mustra riba e necesidad pa modernisa e sistema di impuesto anticua y compleho. E sistema aki ta laga hopi espacio pa evadi impuesto cu ta haci cu Aruba ta perde hopi placa. Un sistema nobo, basa riba impuesto indirecto, ta hopi mas honesto como cu ilegal y turista tambe ta paga. CAft a calcula cu esaki lo genera structuralmente tur aña mas o menos Afl. 100 miyon EXTRA (!) pa Aruba. Asina mes, politica a scohe pa laga tur cos manera tawata. Di e manera aki el a laga espacio pa sponsor grandi di campaña pa probecha di e posibilidadnan extenso di evashon di impuesto (fraude fiscal). Asina nan por cobra nan financiamento di campaña bek.
Mantenshon di actuashon sospechoso den caso di proyecto
Desde comienso di Status Aparte, ‘actitud sospechoso’ sa tuma luga cu proyecto na unda gobierno ta envolvi. A peca contra regla di destaho, contra varios stipulashon di ley di Comptabilidad y casi semper tawatin exceso grandi (y inexplicable) di gasto. Tur esaki aparentemente…’na beneficio di comunidad’. E raport ‘Een kwestie van mentaliteit’ di Comishon di Berdad na 2002, cu a keda produci pa gran parti pa ex-director di CAD y secretaria di RvA (cu hopi experticio al respecto!), como unico instancia ta describi detayadamente con e coperashon entre gobernante y empresa ta organisa pa sakea pais Aruba financieramente. E modus operandi aki ta bon conoci den e organonan di gobierno, pero nan ta mantene un silencio hermetico bou di e pretexto di deber di secrecia. A pesar cu hopi biaha sa trata di acto ilegal, sa ‘lubida’ e deber mas importante ainda di denuncia ‘pa evita problema.’
Daño biyonario
Pero…mester paga (= financia) sí tur e infracshonnan aki di e criterianan di bon gobernashon. Personal di mas posiblemente ta costa Afl. 200 miyon inecesariamente. E cantidad di robo y otro tipo di malversashon manera evashon di impuesto ta costa comunidad mas di Afl. 100 miyon. Pero tambe y proyectonan sospechoso y costoso y otro tipo di acshon di gobierno sa costa pagador di impuesto di Aruba masha hopi placa mes. Asina Aruba a caba di paga e debe di Afl. 200 miyon na Sace sin cu el a ricibi mucho a cambio. Fin di 2017 a bin un fin na e perdida enorme di minimal Afl. 300 miyon como consecencia di e Hedge-deal. E prome proyecto di dump a costa Afl. 28 miyon mientras cu e empresa a funcshona apenas algun luna. Pesey tambe tin planea un proyecto di dump nobo y hopi mas costoso. Ya caba e tres proyectonan aki so a costa nos Afl. 0,5 biyon (= 500 miyon) florin, y manera esakinan tin decenas di otro. E recien proyecto Bo Aruba a costa Afl. 1 biyon, pero a laga hopi interogatorio cerca ARA.
Bista total
Un calculashon global di e enbergadura di e daño cu politica a causa na Aruba ta hiba na e suma di mas o menos Afl. 450 miyon pa aña. Esey ta incluso parti di e pagonan di interes pa motibo di e debenan cu a contrae pa cubri entre otro gasto coriente (salario di personal). Na 2016 esakinan tawata forma 1/3 parti di e presupuesto total di Aruba. Den esey a calcula solamente parti di tur elemento di malgobernashon. Tampoco a tene cuenta cu e consecuencianan economico di placa drispidi cu no a uza pa invershon necesario. Pesey tambe un bista mas completo lo sali mas halto y lo por consumi te asta 50% di presupuesto. Cu otro palabra, durante e ultimo 30 añanan, Aruba a derocha biyones di florin.
Sembra bon pa cosecha bon
Pues, e ‘maneho’ (= siembra) cu gobierno consecutivo a hiba desde 1986 te cu fin di 2017, ta e unico causa di e debenan enorme (= cosecha) cu Aruba ta confronta. Simplemente no por a spera otro resultado. Bou di e circumstancianan aki, entrada extra (di impuesto) of ayudo financiero no ta yuda pa nada. Nan lo sigui cubri e gastonan como consecuencia di mal gobernashon. Si Aruba kier sali for di su problemanan, e no tin otro alternativa cu deshaci completamente y definitivamente di tur metodo tradishonal di politikeria. Den curso di algun aña, esaki lo genera centenares di miyon florin. Na mesun momento, mester aplica e criterianan di bon gobernashon sin ningun tardansa y sin distincshon di persona. Ta di spera cu esaki no ta un tarea mucho dificil pa e gabinete actual.