E aña cu a pasa, a enfoca riba introducshon cerca e ‘stakeholdernan’ y desaroyo di e rapportnan. Por lesa e rapportnan aki pa medio di e website www.bongobernashonaruba.org. E rapportnan ta describi e modus operandi durante 30 aña di gobernashon riba tereno importante di maneho manera di personal y di administrashon financiero. Tambe a trata e manera con a duna contenido na ‘transparencia’. Dentro di poco lo publica rapport cu ta mustra riba ‘funcshonamento di Parlamento’ y ‘integridad’. For di tur rapport ta resulta cu no a uza bon gobernashon como criteria.
Como cu no tin un cultura di lesa hopi desaroya na Aruba, actualmente ta recapitula e informashon mas importante den video semanal cortico di cada un mas o menos 1 minuut. Ta presenta a videonan aki pa medio di e pagina di Facebook ‘Fundashon Gobernashon di Calidad Aruba@deugdelijkbestuuraruba’ y naturalmente riba e website. E videonan ta clarifica e normanan di bon gobernashon manera a publica 20 aña pasa den e rapport Calidad di e grupo di trabou ‘Deugdelijkheid van Bestuur’ bou di presidencia di e corifeo di AVP, Sr. Mito Croes. Alabes ta duna un bista di e consecuencianan di mal gobernashon manera a tuma luga e ultimo 30 añanan. Intenshon ta pa ciudadano realisa nan mes cu mal gobernashon tin consecuencia negativo considerable pa comunidad y pues pa nan mes. Lo por yega asina leu cu nan lo exigi bon gobernashon di gobierno, irespecto e color politico. Pero…no por tin bon gobernashon tanten cu no reconoce e fayonan cu a caracterisa gobernashon e ultimo 30 añanan y cu pues lo sigui persisti si no ta haci nada pa elimina nan.
Anke atenshon di FGCA te awor tawata dirigi na situashon di mal gobernashon pa asina expone nan y al fin y al cabo elimina nan, su meta principal ta pa yuda realisa bon gobernashon. Lo haci e transformashon ey na e prome simposio na september. Durante tres anochi, varios orador y instancia lo duna un bista global di e situashon na Aruba y e otro paisnan di Reino, e transformashon necesario cu mester tuma lugar, kico nos por spera si di berdad tin bon gobernashon y di ki manera nos mes por/mester contribui na esey. E idioma di comunicashon lo ta Ingles. FGCA y UA ta spera cu e simposio lo contribui na un mayor concientisashon di pueblo di Aruba pa cu calidad di gobernashon y di e propio responsabilidad di cada ciudadano pa contribui na esey.