Den e revista rubiano Exclusivo #122 a expone un entrevista cu ‘kandidaat-notaris’ mr. Chamila Tromp. Den e entrevista el a plantea cu e ordenansa nashonal Notarisambt ta limita e cantidad di notario te na cuatro. Segun mr. Tromp e limitashon aki ‘no ta cuadra mas pa e temporada cu nos ta biba aden’. Esaki lo conduci na tempo di espera hopi largo pa cliente y posibelmente menos calidad di servicio pa motibo di mucho trabou p’e notario. Lo elimina e desbentahanan aki si lo caba cu e quotum actual y habri mercado pa mas notario, mescos cu ya caba ta e caso cu abogado. Cu e punto di bista aki, mr. Tromp ta pone un tema importante na discushon.

Varios profeshon huridico manera notario, abogado y deurwaarder, profeshon medico manera dokter di cas, specialista y boticario, profeshon financiero manera accountant y contador y profeshon di construcshon manera arkitecto y landmeter, ta pertenece na e categoria di ‘profeshon liber’. Esnan di profeshon liber tin un calificashon di profeshon specifico y ta presta nan servicio intelectual-ideal ‘bou di propio responsabilidad, na un manera profesional y independiente na esun cu a duna e encargo y/of na comunidad en general’.

Tumando na cuenta e interes general di e profeshonnan liber y e necesidad pa proteha ciudadano contra mal practica, ta regula e profeshonnan liber. Admishon p’e profeshon ta mara na cierto condishon. Tin un registro publico di esnan cu a admiti como profeshonal liber y (den teoria!) tin control riba calidad di ehecushon di e profeshon. E regulashon aki tin un base legal, mientras cu contenido y control concreto ta den man di un Ordu of Camber. Ehecushon di e profeshon ta someti na un estatuto di profeshon. Intenshon di e estatuto di profeshon aki ta pa garantisa of promove e profesionalidad, e calidad y e relashon di confiansa cu esun cu ta duna e encargo, e cliente of e paciente. Si no cumpli cu e estatuto di profeshon, esaki por conduci na sancshon y al fin y al cabo na kita e competencia pa sigui eherce e profeshon (Wikipedia).

E terminologia di ‘profeshon liber’ ta duna e impreshon cu ta trata di empresario na unda competencia saludabel ta determina e exito y consecuentemente e entrada. Nada ta menos berdad. Manera mr. Tromp ta indica, legalmente a determina un cantidad maximo di notario cu mester ehecuta tur e cantidad di trabou den oficina hopi druk. Haciendo esey, gobierno, den eventual dialogo cu notario, en realidad a crea un monopolio. E iniciativa di mr. Tromp basicamente tin e intenshon pa considera si e puntonan di salida cu e tempo ey tawata vigente, awendia tin e mesun balor ainda.

Lo anterior no ta conta solamente pa notario,sino tambe pa dokter di cas y specialista. Den esey no ta gobierno a determina un quotum specifico, sino e Organo di Ehecushon AZV. Esaki ta determina cuanto dokter di cas y specialista tin mester a base di e cantidad di habitante. Siguientemente e cantidad determina aki ta cay bou di nan sistematologia di compensashon. E compensashonnan aki ta den careda di varios shen mil florin te cu Afl. 1 miyon pa aña. Pa ‘profeshonal liber’ cu ta haci uzo di un monopolia institutionalisa cu ta garantisa e entradanan aki te cu e edad di pension, esaki ta un acuerdo atractivo. E pregunta ta te ki punto esaki ta saludabel.

Ba basta tempo caba tin keho den comunidad pa motibo di e tempo di espera hopi largo, specialmente serca specialista. Cita cu por tuma lugar te despues di 2-4 luna no ta forma ningun excepshon. Den oficina asina ocupa e servicio cu ta duna por ta inferior di calidad y consecuentemente ta mas facil pa comete eror. Den practica a resulta dificil pa busca cuenta cerca e medico concerni den caso di posibel eror. Pero despues di esey sa ta dificil pa pashent pa busca un alternativa. Habri e ‘mercado’ pa medico por establece nan mes libremente ta parce di ta un paso logico. Pero posiblemente esey ta mucho facil pensa.

Pa mayoria di pashent ta dificil pa calcula si nan medico (t)a duna un servicio di bon calidad. Pashente tin e desbentaha adishonal cu Aruba ta hopi chikito. Specialista mester atende y opera un cierto cantidad minimo di pashent pa aña pa por garantisa un nivel profesional y abilidad adecua. Si nan no logra e cantidad ey, e pashent tin menos garantia cu e medico ta dispone di e abilidad necesario. Mas dokter di cas y specialista tin y pues mas escogencia tin p’e pashent, mas grandi e posibilidad ta cu e no ta haya e trato cualitativo cu e ta exigi. Di e manera ey e bentaha cu kier a logra posiblemente a cambia pa un desbentaha. Pa Aruba ta existi e riesgo adishonal cu medico lo scohe pa muda pa otro pais si nan entrada baha pa motibo di mas competencia. Hopi biaha ta ofrece e miho mediconan e miho puestonan. Esey tambe por tin efecto negativo pa pashente.

Esaki por clarifica cu no por trata tur profeshon liber na mesun manera. Un discushon habri al respecto por clarifica hopi. Den cierto sector profeshonal e principio di mercado habri por tin un efecto purificador mientras den un sector mas monopolisa un control efectivo di un instituto di control independiente por duna e calidad di e sector profeshonal concerni y pues di nan clientenan e estimulo necesario. Ta trata e ora ey mas bien di coregi e fayonan den e sistema existente.