Segun e 23 consehonan di Conseho Consultativo (CC) disponibel (digitalmente) tocante e presupuestonan ‘normal’ y supletorio desde 2003, a entrega solamente 4 na tempo na CC. Despues di su analisis y huicio nan por a keda entrega prome cu e fecha stipula pa nos Constitushon na Parlamento. E otro 19 (esta 83%) a entrega mucho lat.
Tres di e presupuestonan entrega na tempo ta para na nomber di gobierno di MEP, esta na 2004, 2005 y 2008. Segun e huicio di CC e presupuesto di 2004 pa gran parti tawata un copia di 2003. Tawata falta hopi informashon mientras cu e realismo tawata deficiente. Ademas e no tawata cumpli cu e exigencianan di bon gobernashon. Segun CC e presupuesto di 2005 tawata un copia exacto di 2004 y a constata hopi fayo di contenido. CC tawata precupa pa e aumento grandi di debe y pues tambe di e gastonan di interes. CC a adverti specialmente pa e asina yama prestamo bullet. Esakinan ta prestamo cu na fin di e periodo di prestamo mester paga bek completamente den un solo tiro mientras ta paga ‘solamente’ interes durante e tempo cu e prestamo ta core. Esakinan lo forma un peso mucho grandi pa Aruba. Pesey tambe CC a conseha pa spar y reserva e placa den un asina yama ‘Sinking Find’.
Na mesun manera e presupuesto di 2008 tampoco por a conta cu aprobashon di CC. Mescos cu e presupuestonan di 2006 y 2007 e aclarashonnan no tawata mas cu “un colecshon di contribushon di varios departamento, di diferente estilo y calidad, cu a uni na otro con cu para keda y cu aparentemente a corta, locual a haci cu e contenido no ta cla of no tin pia ni cabes”. Segun CC e secuencia di tratamento di presupuesto tawata afecta e ‘derecho di budget’ di parlamentario. Sinembargo, esaki tawata lo menos cu por a precupa parlamentario den curso di decada.
E unico presupuesto cu gobierno di AVP a entrega na tempo tawata e ultimo, esta di aña 2017, gracias na e preshon fuerto di CAft. Mescos cu presupuesto anterior desde comienso di e gobernashon di AVP, CC no ta atribui mucho realismo na e presupuesto aki. Gobierno ta calcula e crecemento mucho rosado, e entradanan lo sali menos, e gastonan mas halto, resultando den un aumento considerabel di e fayo presupuestal.
Sinembargo, colmo de los colmos tawata e presupuesto na comienso di e gabinete actual di AVP cu a entrega bou di responsabilidad di e recien nombra ministro plenipotenciario. Entrega di e proyecto di presupuesto pa 2014 na CC a tuma luga 10 luna lat. E huicio di CC tocante calidad di e presupuesto tawata destructivo. Pa motibo constitushonal, tecnica legal y di comptabilidad a considera e proyecto di presupuesto como inferior. Como tal el a afecta directamente e ‘derecho di budget’ di Parlamento. Pesey tambe CC ta recomenda pa no ofrece e proyecto aki na parlamento pa su aprobashon tanten cu no a tene tur e consehonan di CC na cuenta.
Pero gabinete di Mike Eman-2 a neglisha e huicio aki y a presenta e proyecto di presupuesto sin cambio na parlamento. Manera di custumber mayoria di parlamento a aprob’e y despues a pas’e pa gobernador legalis’e. Pa gobernador, esaki, den combinashon cu e advertencianan serio di e ‘Raport di Pais’ di Fondo Monetario Internashonal di 2013, tawata suficiente motibo pa no dorna e proyecto di presupuesto cu su firma. Pa prome biaha, mayoria di parlamento a protesta pa motibo cu a afecta su ‘derecho di budget’. Esaki tawata masha hipocrito, pasobra durante 30 aña nunca e violashonnan contra constitushon pa motibo di entrega lat di presupuesto te asta 2 biaha pa aña a causa ningun tipo di precupashon di e parlamentarionan. Ademas parlamentario nunca a protesta contra e echo cu durante casi 30 aña nunca a entrega cuenta anual. Segun Ley di Comptabilidad esaki ta necesario pa por evalua presupuesto adecuadamente. Consecuentemente cuenta anual tambe ta di gran importancia pa e ‘derecho di budget’ di Parlamento.
Analisis di tur e raportnan ta saca na cla cu CC ta ripiti aña aden aña afo conseho urgente pa coregi fayo serio (constitutional, tecnica lega, di comptabilidad, redacshonal y otro) mientras cu gobernante no ta siña
di e consehonan, cu parlamentario no ta interesa den e consehonan y cu ta sigui sin strobashon cu e tradishon di presupuesto di semper. Ademas, e advertencianan durante hopi aña pa cu acumulashon iresponsabel di debe combina cu aumento di gasto di interes tawata dirihi na hende sordo. Cu otro palabra, tratamento di presupuesto no ta nada mas cu un popenkast cu tin e meta pa duna e apariencia cu ta traha seriamente na defensa di bienestar general.