Dia 4 di juli 2014 e bululu rond di e KB pa motibo di e proyecto di presupuesto ‘deficiente’ al fin y al cabo a conduci na retiro (riba propio iniciativa) di e Ministro di Finansas di Aruba (MinFin) di e tempo ey. Dia 24 di november di mesun aña pa medio di un carta el a entrega su retiro tambe como miembro di partido di AVP. Den e carta ey el a confirma su punto di bista manera el a expone den su carta di 24 di oktober pa prome ministro (PM) tocante e actitud cambiante di Hulanda pa cu su partnernan den Reino y su consecuencianan pa Aruba.

E actitud ‘nobo’ aki di Hulanda ta encera cu e islanan mester scohe entre goberna segun e normanan di bon gobernashon manera Hulanda tambe ta implementa, of sigui riba ‘e rumbo tradishonal di mal gobernashon’. Lo permiti e ultimo escogencia aki, pero sí pafo di reino, siendo independiente por ehempel den un contrucshon di gemenebest.

E ex-MinFin y ex-miembro di partido (JDY) a conseha PM pa refleha riba esaki y di berdad haci un escogencia. Segun e, esaki no por ta dificil pasobra en realidad Aruba no tin mucho opshon. E pregunta ta si nos ta keda hefe di nos propio cas y nos mes ta tuma tur medida necesario nos mes, hasta si esaki lo crea malcontento, pero cu lo ta miho pa nos isla riba termino largo y cu lo ta duradero y husto pa e diferente generashonnan? Of nos ta hinca nos cabes den tera cu e speransa cu e situashon lo mehora di mes? Den e cuadro aki e ta expresa su duda den filosofia di PM cu “harmonia ta tur cos y si tin sosten pa e gobierno, finansas publico automaticamente lo resolve cu e crecemento economico cu e harmonia aki ta ocashona”.

JDY claramente ta scohe pa e opshon cu Aruba mes ta acepta e normanan y ta ehecuta esakinan di berdad en bes cu esaki ta tuma luga dor di intervenshon di Hulanda pa medio di un KB, gobernador of CFT. Sinembargo, e problema cu e ta constata den esaki ta cu gobierno di Aruba no ta ehecuta locual e mes ta palabra., p.e. cu e Acuerdo di Presupuesto Balansa of e ‘meerjarenraming’ (calculo di varios aña). Pesey tambe e ta conseha PM na prome luga cu e mester tene su mes na palabrashon haci. Ademas e ta indica cu mester tuma medida dificil pero cu nan ta necesario pa mantene autonomia di Aruba y pa futuro generashon. Finalmente e ta mustra PM riba relatividad di popularidad. Futuro generashon lo tin un miho imagen di e persona cu a tuma decishon bon y necesario na e momento indica en bes di e persona cu a laga di haci esey y a prefera di lag’e pa otro haci’e pa nos.

Den e cuadro aki e nombrashon di e ex-MinFin y ex-(?)-miembro di partido como ministro plenipotenciario ta hiba na varios pregunta. Ta trata di un nombrashon conciente pa normalisa e relashon tenso cu Hulanda dor di un persona cu a indica di ta compronde y acepta e actitud nobo di Hulanda y cu tin e anhelo di mehora calidad di gobernashon di Aruba? Of ta trata mas bien di nombrashon di un persona cu ta considera capas, como politicologo recien gradua (?), pa purba splica decishon dudoso di gobierno manera e recien pakete di pasco electoral cu ta bin riba un presupuesto cu ya caba tin problema pa realisa? Cualke cu ta e motibo principal, a scohe pa un persona cu ta considera capas pa come pan dushi bou di tur circumstancia cu su coleganan Hulandes.