Su probabel partner di gobernashon POR tambe ta dedica hopi atenshon na realisashon concreto di bon gobernashon. Entre otro a haci bon uzo di e recomendashonnan di raport Calidad y di e ideanan di Fundashon Gobernashon di Calidad Aruba. Finalmente e partido mas chikito den Parlamento, esta ReD, cu a lanta primordialmente pa combati mal gobernashon y realisa bon gobernashon, tambe ta un posibel partner di gobernashon.
Considerando tur esaki, ta prome biaha cu bon gobernashon ta asina prominente den atenshon politico. No por ta otro tampoco. Pasobra e situashon penibel actual di Aruba simplemente ta consecuencia di mal gobernashon durante e ultimo 30 añanan. Tur partido cu a goberna Aruba, di un of otro manera a contribui n’esaki. E aparente concientisashon di e mundo politico cu ‘no por sigui asina mas’ y cu mester cambia e timon drasticamente, ta un cambio necesario den pensamento.
Sinembargo, ta trata apenas di e prome paso. Pasobra no ta suficiente pa por fin reconoce cu pa asina hopi tempo caba cos a bay malo y cu awor si tin yen di bon intenshon. Por gana e confiansa den comunidad cu por fin tin bon gobernashon solamente, si en berdad ta tuma paso concreto den e direcshon ey.
Asina e futuro partnernan den gobierno lo mester tene nan mes na nan expreshonnan cu mester limita e cantidad di minister na un pais asina chikito manera Aruba y cu asina hopi reto financiero, na maximo 7, irespecto e posibel exigencianan politico di partner pa mas puesto pa nan partido. Pero tambe e fenomeno di coordinador cu a sali completamente for di man mester mara pa awor y semper na limitashon, pues pa medio di ley! POR ta propone pa pone un maximo di 10 coordinador pa minister. E cantidad aki, specialmente den e situashon actual, ta completamente exagera. Mas bien POR lo mester saca su les for di e ministerio di mas pisa (esta Finansas) cu a ehecuta su maneho pa mayoria parti cu 4 coordinador. Lo ta di aplaudi si e partidonan lo limita nan mes na un cantidad di 2 pa maximo 4 coordinador (capacita!) pa cada ministro. Si tin keho tocante e calidad di departamento, esey no mester conduci na nombrashon di personal nobo banda di ministro, sino na un limpiesa den e departamentonan di locual no ta funcshona debidamente. Tambe e fenomeno di consehero y consulent cu a sconde durante decada bou di e capa di ‘Bienes y Servicio’ y cu a cobra suma fabuloso pa nan ‘servicio’, lo mester pertenece na pasado. E gobierno nobo por saca hopi honor (y placa) for di esaki.
Pero no ta trata solamente di cantidad, sino tambe di calidad. Asina e ministernan mester tin un historia di servicio sin ningun mancha. Un pasado dudoso of un curiculo vitae atacha mester ta suficiente motibo, a pesar di eventual ‘sosten di votador’, pa no reclama un asiento di ministro. Esey desde e puro comienso lo afecta seriamente e credibilidad di henter e gobierno y su bon intenshonnan. Mescos ta conta pa e coordinadornan. Tanten cu otro regla ta conta pa nan y strafblad no ta forma ningun obstaculo pa nan nombrashon, tin suficiente motibo pa duda di e bon intenshonnan di gobernante.
Pero gobierno por realisa e cambio di cultura positivo di mas grandi pa locual ta su personal si e lo pone, den combinashon cu ehecushon concreto di e kerntakenanalyse y di HBRA (Herziening Bezoldiging Regeling Aruba), nombrashon (y retiro) ademas di e renumerashon di personal di gobierno completamente den man di un organo independiente. Esaki di ningun manera por laga e color politico di personal nobo hunga un rol den nan nombrashon. E necesidad dentro den e departamentonan, e disponibilidad di e medionan y e capacidadnan di e solicitante, por ta e unico criterianan. Cu e ‘cambio simpel’ aki riba e tereno di mas problematico di e aparato gubernamental, e gobierno nobo lo pone un prome paso formidabel pa expone bon cla cu e ta serio cu su intenshon pa pone Aruba riba e bon caminda.