Masha danki!
Na Gobierno, Parlamento y comunidad di Hulanda
Pa medio di Su Excelencia sr. Gobernador di Aruba
Aruba, 28 di september 2020
Apreciado Conseho di Ministro, miembro di Tweede Kamer y comunidad di Hulanda
Desde 6 luna pasa, Aruba a keda confronta cu e consecuencianan di e pandemia di Covid. Pa motibo di e lock down, turismo como e unico pilar economico na Aruba, a cay completamente den otro. Esaki a reduci nos economia cu mas o menos 30%. Masha hopi hende tawata core e riesgo pa perde nan trabou. Afortunadamente, como partner den Reino, Aruba a ricibi for di comienso di e crisis, incondicionalmente ayudo humanitario y logistico y riba tereno di salud di Hulanda.
Prestamo
Ademas, Hulanda a duna Aruba prestamo sin interes (como sosten pa presupuesto) pa cubri su obligashonnan pa cu su empleadonan publico y servicio importante di gobierno. Esaki a yuda gobierno tambe pa subsidia empresa pa mantene nan trahadornan mas tanto posibel den servicio. Asina SVB y AZV por a sigui cumpli den liña grandi cu nan tareanan na bienestar di comunidad. Sin e ayudo humanitario, di salud y di presupuesto ey di Hulanda, Aruba lo a sucumbi hopi tempo caba!
Invershon regala
Riba dje, Hulanda a mara su mes na duna e islanan CAS (Corsow, Aruba y Sint Maarten) sosten adishonal den forma di invershon den enseñansa y cuido y pa fortifica resistencia di economia, realisa finansas publico sostenible y concretisa reformashon necesario riba tereno di gobernashon. Ta trata di invershon hopi necesario cu nos propio gobiernonan a laga di haci durante decada! E suma total cu Hulanda ta pone disponible pa e tres islanan hunto ta monta na Afl. 1 biyon (mil miyon) florin.
Termino largo
Mirando e desaroyo precupante di e pandemia di Covid, ta bon posible cu e ayudo aki lo mester cubri un tempo basta largo di minimo 2-3 aña. Esaki lo rekeri durante e añanan 2020 te sigur 2022 un ayudo presupuestario di minimo 2 biyon (2 mil miyon) florin cu ta bin riba e invershon cu Hulanda ta dispuesto pa inverti. Aruba no por financia e suma aki di ningun manera riba su mes. Pa tur e motibonan aki menshona, ta na su luga pa comunidad di Aruba gradici gobierno, parlamento y pueblo di Hulanda inmensamente pa nan sosten hopi aprecia pa pueblo di Aruba.
Supervishon
Pa garantisa cu lo uza tur e placa cu Hulanda lo fia y regala Aruba den e añanan benidero na un manera eficiente y efectivo, Hulanda lo institui un Entidad Caribense di Reforma (comparable cu ‘Zelfstandig Bestuursorgaan’ -ZBO- na Hulanda) pa guia e proyecto importante y necesario di reformashon extenso na Aruba. Manera gobierno di Aruba mes a admiti den su Nota di Reformashon di 15 di juni 2020: “no por sigui pospone reforma”! Anteriormente, e supervishon di CAft den combinashon cu e preshon di Hulanda, a logra realisa un reducshon di e fayonan presupuestal di Aruba for di mas di Afl. 400 miyon na 2014, te na practicamente Afl. 0 na 2019. Esey ta nifica un reducshon promedio di e deficit presupuestal pa aña di Afl. 80 miyon. Algo hopi impresionante den e practica politico di Aruba! Pues, a resulta cu gobierno di Aruba ta susceptibel pa e guia positivo aki. Pesey nos ta convenci cu, a base di e condishonnan nobo di Hulanda pa e siguiente fiansanan, por fin e siguiente gobiernonan di Aruba lo duna su promesanan mas contenido cu acshon concreto.
Reforma necesario
Tumando na cuenta cu e situashon financiero desastroso di Aruba tambe ta consecuencia di mas di 30 aña di malgobernashon structural, nos ta di acuerdo cu ‘reforma riba tereno di gobierno’ mester ta un enfoke importante. Nos ta spera cu e condishonnan no-negociable di parti di Hulanda riba e tereno aki, lo resulta den un mehorashon drastico y necesario di esaki. Pesey tambe: masha danki di antemano!
Atentamente,
Firmante:
* Por fabor, tene na cuenta cu despues di firma e petishon, bo lo ricibi un email di Civist na unda mester confirma e firma. Danki!