Desde cu hotel nobo a etablece nan mes despues di 1986, sigui pa apertura di Coastal, Aruba a conoce varios aña di crecemento fuerte. Esey a causa cu mas y mas hende y instancia a cuminsa precupa pa e limitenan di crecemento cu lo ta sustenibel pa Aruba. E terminologia ‘capacidad di carga’ a bin na moda. E cantidad grandi di ‘empleado nobo’ den specialmente sector di construcshon y sector hotelero a exigi un expanshon grandi di infrastructura, desde cas y scol te cu re atenshon pa e capacidad di carga. Mientrastanto e efectonan di e crecemento cu ta influencia e ‘capacidad di carga’ ta sigui ainda.

Asina e problematica di trafico ta sali cada bes mas for di man. Tur dia mas o menos 65.000 medio di transporte ta yena e careteranan. A pesar cu e remplaso di cruzada pa rotondo a percura pa mehorashon, e filanan creciente durante cada bes mas ora di dia ta indica claramente pa unda nos ta bay. E pregunta ta si e careteranan nobo cu a planea lo duna suficiente solushon, tumando na cuenta cu tur aña e cantidad di auto ta crece cu mas o menos 1800.

Pa e poco naturalesa cu a resta e aumento aki tambe ta problematico. No solamente naturalesa fresco mester duna paso na asfalto cayente, pero alabes naturalesa mester absorba mas y mas desperdicio di zeta. Pasobra pa laga tur 65.000 auto, bus, truck y makinaria pisa funcshona bon den e clima cayente yen di stof, mester remplasa zeta di motor dos bes pa aña. Pa cada motor ta trata cada bes di un promedio di casi 4 liter (1 gallon), o sea 8 liter pa aña pa motor. Hunto cu otro tipo di zeta di desperdicio (manera zeta di transmishon, pa haci limpi, etc.) esey ta nifica un cantidad di zeta di desperdicio di mas o menos 600.000 liter pa aña. Prome cu cierre di Valero un compañia specialisa tawata recoge e zeta di desperdicio di tur garashi grandi pa hiba p’e refineria. ‘Empresa chikito’ bou di palo tawata basha nan zeta sin mas den cunucu. Nos por adivina solamente locual ta pasando awor cu e gran cantidad di zeta di desperdicio despues di cierre di Valero.

E aumento grandi cu por spera na San Nicolas pa motibo di construcshon di hotel nobo di 500-1000 camber y e posibel expanshon di e compleho di Tierra del Sol cu 200 camber lo cambia e situashon na lugar turistico importante mas drastico ainda. E cantidad grandi di hende na Baby Beach riba practicamente tur dia di siman ta core peliger pa ser mas cu duplica. E cantidad di turista cu diariamente ta bishita e lugarnan principal di interes ta stroba otro cada bes mas y ta genera un cantidad creciente di accidente fatal. E ampliashon grandi aki di camber lo causa otro ola di imigrante pasobra Aruba mes no tin suficiente trahador p’e ramo aki. Solamente si duna e empleadonan publico cu ta di mas curso pa traha den e hotelnan nobo aki. Sinembargo, e diferencia grandi di salario y condishon secundario di trabou ta garantisa cu esaki lo ta un speransa imaginario.

E empleadonan nobo y nan famia lo pone preshon adishonal riba e infrastructura existente. E experencia cu hotel nobo casi no ta aporta na caha di gobierno ta nifica cu mester paga e expanshon necesario for di propio medio. Pa un gobierno cu ya caba ta bashi, esaki lo resulta un tarea imposibel (sin prestamo adishonal). Consecuencia ta cu e careteranan existente y e cantidad limita di lugar di interes turistico lo haya mas preshon.

Di e manera aki Aruba ta bira menos atractivo pa turista. Asina ta viola e paz y trankilidad cu a haci Aruba asina popular. Pues e pregunta ta si e maneho aki no ta pone fin na e atracshon cu Aruba tin y consecuentemente na su posibilidadnan pa sobrebibi den un ambiente di competencia den nos region cada bes mas fuerte.

Pero tambe pa pueblo di Aruba e maneho aki tin consecuencia cu sin mas ta perhudicial. Sa mira e efectonan diario di bomboshi en general, e filanan, polushon, criminalidad creciente, etc. como consecuencia logico di ‘desaroyo’. Pero por a evita nan si desde un comienso a determina ki desaroyo tawata necesario pa cumpli cu e necesidadnan di e pueblo existente. Sinembargo, e gobiernonan consecutivo di tur dos color politico sistematicamente a neglisha of no tawatin e capacidad necesario pa determina maneho riba termino largo na unda a tene cuenta cu mas faceta posibel y nan consecuencia.

Ta parce atrobe cu pa motibo di e debe enorme di Aruba, gobierno ta scohe pa entama proyecto cueste lo ke cueste pa purba stimula economia. Den esey ta neglisha e consecuencianan final pa pais y pues su pueblo. Tanto pa pueblo local como pa su fuente di entrada principal, indudablemente esaki lo tin consecuencia negativo tanto riba termino corto como largo.

.