Den e matutino Ingles ‘Aruba Today’ di 9 di maart ultimo a resalta un articulo tocante posibel iregularidad dentro di e directiva di un hotel (chikito) local. E vice-presidente anterior lo a concede su mes compensashon halto contra e reglanan vigente. Hunto cu un otro miembro di directiva e lo a haci su mes culpabel tambe na malversashon. Mientrastanto lo a suspende ambos miembro di directiva mientras ta haci un investigashon extenso. Segun e reglanan, tur aña mester entrega un cuenta (audit) for di cual e maneho y administrashon financiero ta sali na cla. Sinembargo, segun ‘Aruba Today’, esaki no a tuma luga e ultimo 5 añanan. E matutino no ta exclui cu a laga di haci esaki intenshonalmente pa preveni cu e iregularidadnan lo sali na cla.

Realidad di Gobierno

For di e rapport ‘Naar deugdelijk openbaar financieel beheer in Aruba’ di Fundashon Gobernashon di Calidad Aruba ta resulta cu gobierno di Aruba durante e ultimo 55 aña (!), NUNCA a entrega e cuenta anual obligatorio pa ley manera debe ser. Solamente bou di preshon pisa di CAft a entrega recientemente pa di prome biaha un cuenta anual (no aproba!) na tempo. NUNCA a cumpli cu e stipulashon di ley pa entrega e cuenta anual aproba pa accountant pa mas tarda 3 luna despues cu aña a termina na Parlamento (normal: 5-10 aña laat!). Durante decada no a cumpli cu hopi exigencia di Ley di Comptabilidad. Controlaria General (ARA) a skirbi den casi tur su rapportnan “por atribui e fayonan cu a constata pa un gran parti na un administrashon deficiente cu ta funcshona malo, un organisashon administrativo deficiente y un control interno practicamente ausente. A base di esaki ARA ta di opinion cu tin un situashon hopi preocupante pa cu e administrashon. No ta cumpli cu e principionan mas elemental di administrashon”.

TUR aña desde 1987 a neglisha e intenshonnan di ARA pa implementa concretamente e proyectonan di mehorashon. A pesar di promesa di varios ministro di finansas cu lo mehora e situashon, esaki a tuma luga te na 2015(!), exclusivamente pa motibo di e preshon fuerte di Caft. A institui Caft despues cu Reino a interveni na 2014 na momento cu a bira cla cu e aumento di debe y pago di interes a conduci na finansas publico insostenibel.

Segun investigashon di ARA, e administrashon financiero deficiente cu ta(wata) caracterisa e administrashon financiero di Pais Aruba, tawata endemico den practicamente tur departamento individual. Como cu investigashon di pati di CAD y ARA sa tuma luga riba escala hopi limita, ta inevitable cu esaki (t)a haci cu comunidad di Aruba a y ainda ta perde hopi placa.

Malversashon na gran escala

Segun ARA e administrashon financiero di 1989 tawata asina malo cu e no tawata duna ningun bista di e situashon financiero di Pais Aruba. Mas di 10 aña despues ARA ta constata cu “e consecuencianan di e negligencia duradero di e problemanan aki awo ta sali na cla, tumando na cuenta e cantidad di caso di fraude y malversashon (grandi) cu awendia ta sali den claridad”. Esaki a sali bon na cla den e veredicto den e caso contra prome ministro den e asunto di Fondo Desaroyo Nobo San Nicolas (FDNSN). No por a prueba culpabilidad, entre otro pasobra no por a prueba eventual malversashon pa motibo di e caos administrativo enorme. Na mesun manera e reducshon substancial di e castigo di e sospechoso den e caso di laboratorio di gobierno, na unda Afl. 10 miyon a ‘desparce’ tawata hopi remarcabel. A dun’e e reducshon ey pa motibo cu no tawatin ningun control efectivo mientras cu esnan ‘mas responsabel’ no a reacshona riba e señalnan cla. Mas reciente tawatin e caso di malversashon di Afl. 1 miyon na Departamento di Enseñansa. Sinembargo, pa motibo di e falta structural y intenshonal di personal na e instancianan di control, e magnitud di e problematica aki no ta conoci y consecuentemente tampoco cuanto daño esaki ta causa na comunidad di Aruba.

Rol di Parlamento

Al fin y al cabo ministro ta responsabel pa e bon marcha di asunto den nan departamento. E ultimo 30 añanan, esaki tawata laga hopi di desea. Parlamento lo mester duna un solushon den esaki, pero aki tambe desde principio control ta un terminologia bashi. Parlamento mes nunca a duna atenshon na e intentonan anual di parti di Conseho Consultativo y ARA pa duna nan derecho di budget mas contendio. Al contrario, tur aña e parlamentarionan ta permiti gobierno pa tuma nan haci, aprobando cu forsa

retroactivo e gastamento ilegal di placa. Di e manera ey en realidad nan mes ta bay di acuerdo cu debilitashon di nan derecho di budget. Ademas Parlamento no a trata rapport investigativo importante di ARA y structuralmente no sa responsabilisa ministro. Hasta e veredictonan significativo den e casonan di FDNSN y Laboratorio no a hiba na ningun acshon di su parti pa mehora e calidad di e administashon financiero.

Koi Kens

Segun ‘Aruba Today’, den e caso di e hotel, posiblemente ta trata di malversashon di minimal decenas di mil di dolar pa aña riba un presupuesto total di apenas algun miyon florin. Sinembargo, esey por ta resulta koy kens compara cu locual e posibel malversashonnan di parti di henter un ehercito di probechador durante 30 aña a base di un presupuesto anual promedio di mas o menos Afl. 1 biyon por a costa comunidad di Aruba…