Durante verano di 1976 e weganan olimpico a tuma luga na Montreal, Canada. E gimnasta Rumano di 14 aña, Nadia Comaneci a percura pa un sensacion pa motibo di su prestacion riba puente cu bara desigual. Como prome gimnasta el a logra e resultado perfecto di 10.0. Al fin y al cabo el a logra shete biaha un 10.0. y en total tres medaya di oro, un di plata y un di bronce. Pa Aruba tambe esaki tawatin su consecuencianan. Alumno fanatico a pone’mi como docente di gymnasia nobis bou di preshon pisa pa por fabor cuminsa cu e deporte di gimnasia olimpico. Mi obhecionnan cu durante mi estudio mi a siña apenas e elementonan basico di gimnasia olimpico no tawatin ningun efecto. Mi MESTER a introduci nan den e deporte. Nunca mi a arepenti. Pa hopi mas mucha Rubiano di locual mi a por pensa, esaki a resulta di ta un deporte fantastico.

E grupo a sigui crece. Prome solamente cu alumno di Colegio Arubano. Despues tambe cu alumno di otro scol. Mientras tanto un colega nobo, esta Glenn Lande, tambe a cuminsa instrui gimnasia olimpico na comienso di añanan ’80. No a tarda mucho pa nos uni forsa. E tempo ey a tumba e sala di deporte di Colegio pa motibo di su estado deplorabel y a cuminsa cu construccion di un sala nobo y grandi di deporte. Mientras tanto nos a haci uzo di e sala di John F. Kennedy. Pero pronto el a resulta mucho chikito pa motibo di e crecemento continuo di gimnasia olimpico.

E sala nobo di Colegio Arubano tambe tawata dispone di material profesional pa gimnasia olimpico. Esey a amplia e posibilidadnan enormemente. Pero…como cu scol mes y otro club deportivo tambe sa uza e sala intensivamente, e docente- y alumnonan di gimnasia olimpico cada les atrobe mester a instala y kita e material extensivo y pisa. Esey a mengua e entusiamo un tiki. Pesey tambe a cuminsa sondea e posibilidad pa un sala propio na unda e material por a keda instala continuamente. Consecuentemente lo por a dedica tur energia na e deporte mes. Ami mes no lo a goza mas di esey. Mi mester a para mi actividadnan pa motibo di artrosis serio. Lomba y articulacionnan no tawata por mas cu e esfuersonan pisa di instruccion. Menos mal varios otro docente di gimnasia a tuma e trabou over.

Na aña 1984 a lanta Club Gimnastico Arubano (CGA) Avanse oficialmente. E crecemento continuo di miembro y e necesidad pa lanta un bond di gimnasia (e.o pa subsidio pa material) a hiba na mas club specialisa: pa chikitin, gimnasia ritmico, etc. Al fin y al cabo por a lanta un bond di gimnasia cu ya caba ta forma parti di Comite Olimpico di Aruba. Asina tambe gimnasta di Aruba por a participa na campeonato internacional cu hopi exito.

Gracias tambe na trabou duro di directiva, entre cual mester menciona Milly Bhageri cu for di e principio di prome les na 1976 ta forma parti di e movimiento di gimnasia olimpico na Aruba, CGA Avanse desde recien por fin ta dispone di su propio sala den e compleho deportivo di famia Bareño na Piedra Plat. Diasabra ultimo a tuma luga e apertura oficial cu un tremendo show. Awor e material (di 20 aña bieu) por keda para. Sinembargo, e interes pa e diferente posibilidadnan di gimnasia ta asina grandi cu riba termina corto mester construi y instala otro sala. Pa esnan cu a inicia e deporte di gimnasia olimpico na Aruba tanto aña pasa, di mes esaki ta un prestacion tremendo. Pa gran parti mester atribui esaki na e gimnastanan (di antes y actual), nan mayornan, e entrenadornan y e miembronan di directiva hopi entusiasma.

Di mes, den henter e historia aki tin un solo ‘pero’! Anke centenares di mucha ta acudi na e club di gimnasia aki, tin miles di mucha na Aruba cu lamentablemente no tin, of tin insuficiente oportunidad pa desaroya nan posibilidadnan di movecion adecuadamente y/of pa canalisa nan energia debidamente. Ya caba pa decada sala di gimnasia na nos isla ta den un estado deplorabel (a pesar cu den bes en cuando ta drecha uno k’e otro) mientras cu e disponibilidad di material di gimnasia y deporte ta insuficiente. Consecuentemente mucha ta siña insufientemente ki posibilidad di movecion tin y cualnan por yama nan atencion pa sigui desaroya. E servicio di lip di parti di gobernante pa e tantisimo bentahanan di participacion na deporte di parti di hubentud no a traduci su mes den un sosten activo, efectivo y sistematico di e base pa tur deporte. Esey ta nifica instruccion di movecion na scol basico y secundario den un infrastructura adecua y cu personal adecua. Otro prioridad politico partidista semper a y ainda ta guli tur e fondonan financiero necesario.