Tempo cu a sali na cla con serio e situacion economico di Aruba tawata di berdad (na 2014), di biaha a haci un comparacion cu e situacion di Grecia. Pa basta tempo caba Grecia tawata centro di tur atencion. Eynan tambe pa hopi aña ‘politica’ a pinta un imagen floria di situacion di e pais. Pesey, durante hopi tempo por a nombra gran cantidad di empleado publico, por a duna pensiun atractivo y por a hiba un maneho di impuesto ‘suave’. Te ora cu por fin e balon a rementa y e realidad a presenta su mes sin misericordia. A resulta cu Grecia tawatin un debe di Afl. 653 biyon florin o sea Afl. 65.000,- pa cada Griego. No a falta mucho pa bira cla den ki situacion penoso Grecia a hinca su mes aden, for di cual e no por a sali riba propio forsa. Pa comunidad Europeo, di cual Grecia ta forma un parti, e situacion aki tambe tawatin consecuencia serio.

E crisis Griego a afecta e confiansa general den Euro, cu e consecuencia cu balor di e moneda a mengua. Asina e problemanan Griego a menasa stabilidad di e moneda colectivo y tawatin miedo pa un crisis Europeo mas amplio como resultado di e efecto ‘domino’, si e crisis lo pasa pa otro pais Europeo. Pa evita cu mas pais debil di Union Europeo tambe lo cay den crisis, e paisnan europeo y IMF a dicidi pa sali na defensa di Grecia. Na fin di mart 2010 e paisnan Europeo a bay di acuerdo cu un plan di rescate pa Grecia. E ayudo lo consisti di un combinacion di prestamo di IMF y e paisnan Europeo. E condicion tawata cu Grecia mes lo mester trece orden den su propio cas. Den esey, reduccion di su enorme fayonan presupuestal tawata primordial. Esey solamente tawata posibel dor di economisa masha pisa mes riba un gran cantidad di tereno.

E medidanan tawata un golpi masha duro pa economia di Grecia y e pueblo Griego. Na 2010 e sueldonan den sector publico a baha cu un promedio di 15%. Den empresa estatal tawata trata di hasta 30%. A corta pensiun cu 10%. No ta tin fin na aumento di desempleo. Na november e desempleo a yega na 28% di poblacion y e desempleo hubenil hasta 61,4%. Pesey tambe e medidanan di economisacion di gobierno Griego a conduci na protesta feroz di parti di pueblo. No ta por nada tawatin miedo cu Aruba tambe lo yega na un situacion similar.

Sinembargo, no ta necesario pa ‘saca inspiracion’ for di e drama Griego. Den nos propio region tin ehempel cu den varios aspecto ta mas cerca di nos propio situacion. Asina e isla Caribense di Puerto Rico, cu ta liga estrechamente cu Estado Unido di Merca, a acumula den curso di aña un debe di Afl. 130 biyon. Cada habitante di e poblacion total di 3,5 miyon ta carga un parti di e debe aki di Afl. 37.142,85.

Mientrastanto Puerto Rico a bay di acuerdo cu supervision financiero di parti di un ‘Federal Control Board’ (FCB). E instancia aki a ordena e pais pa tuma medida di emergencia pa evita cu gobierno ‘mester cera’ pa motibo di un falta total di placa. Sin e medidanan aki gobierno ta core e riesgo cu dentro di algun luna e no por paga servicio esencial mas manera pensiun, enseñansa, salubridad y siguridad publico. Mester economisa 30% riba gasto di empleado publico, entre otro pa medio di retiro y dia di vacantie obligatorio (sin pago). Mester corta 50% den contrato di gobierno. Riba e reduccionnan di gasto cu ya caba a tuma luga riba tereno di salubridad publico, mester corta otro 30% dor di negocia prijs mas abou di remedi, di plan di cuido y salario di medico. No ta por nada cu un gran cantidad di profesional riba varios tereno a sali for di e pais durante e ultimo añanan pa motibo di e situacion desesperante.

Y mas cerca di nos propio situacion US Virgin Islands cu un poblacion di apenas 105.000 a acumula un debe di Afl. 4,2 biyon, o sea Afl. 40.250,- pa habitante. Mescos cu Puerto Rico e pais aki tambe ta confronta un poblacion cu ta disminui (locual ta haci mas dificil pa paga e debenan), fondo di pensiun cu insuficiente fondo, un historia largo di presta placa pa cubri fayo presupuestal y un desempleo halto. Te ainda US Virgin Island a rechasa supervision di parti di un FCB.

Na Aruba tambe a practica e mesun formato durante decada: acumula debe pa cubri fayo presupuestal mientras cu e ultimo añanan economia y poblacion practicamente (casi) no ta crece. Si al cambio e debenan sí ta crece, e debe-pa-habitante ta aumenta na un nivel insoportable. Asina e debe pa habitante na Aruba pa fin di 2015 a suma na Afl. 36.183,-. Incluso e peso adicional cu gobierno di Aruba a pone riba lomba di pueblo manera e proyectonan di PPP y otro debe cu no ta figura riba presupuesto, pa fin di 2018 e debe pa cada habitante lo suma na mas o menos Afl. 45.000,-. Esey ta basta mas hopi cu e peso individual na Puerto Rico y US Virgin Islands.

Nivel di e debenan di Aruba den relacion cu e Producto Nacional Bruto ta haci prestamo di parti di inversionista hopi riesgoso. Asina mes esaki no a hiba na nivel di interes hopi mas halto manera ta e caso na varios otro pais. Esey a pone nan den un situacion hopi mas dificil pa cumpli cu nan obligacionnan di pago di e interes y e debe. Un motibo importante pa e aumento limita di e tarifa di interes no ta tanto e confiansa di instituto financiero den capacidad di Aruba pa cumpli cu su obligacionnan. Mas bien mester atribui e confiansa ey na e echo cu Aruba ta forma parti di Reino cu Hulanda como ‘partner’ cu financieramente ta hopi fuerte. Pesey tambe mester considera e intervencion reciente di Hulanda na 2014 pa evita cu finansas di Aruba lo sali mas ainda for di man, como un forma di scapa un situacion desesperante. E intervencion tabata e base di e confiansa di inversionista cu Aruba lo keda solvabel. Pa Aruba esaki ta un bon motibo pa nunca sali for di e constelacion di Reino. Si gobierno di Aruba lo nenga eventualmente pa sigui coopera cu e supervision financiero, y/of si un eventual gobierno nobo lo pone un fin na e supervision financiero, of, pio ainda, lo boga pa un status di independencia, dentro di un tempo hopi cortico, Aruba cu su reputacion ya dudoso, lo degrada pa e status di junk(ie) cu consecuencia hopi serio pa comunidad.