Siguiendo conseho di entre otro Fondo Monetario Internacional , e gobierno di coalishon nobo di AVP a enfoca riba expanshon di e industria turistico. Esaki lo crea basta cupo di trabou den un tempo relativamente cortico. E bentahanan fiscal, otorgamento di garantia y e campañanan di promoshon intensivo den exterior a percura ya caba dentro di 4 aña pa un abundancia na inversion den proyecto hotelero y timeshare. E circumstancianan aki a conduci na recalentamento di economia: un gran scarsedad di empleado, escaces na vivienda y un infrastructura inadecua. E recalentamento aki a bira pio na momento cu na aña 1990 bou di e gobernashon nobo di MEP e refineria mericano Coastal a cumpra e refineria anticua di LAGO. E inyecshon di capital na balor di por lo menos Af. 500 miyon pa drecha e refineria y tumamento den servicio di centenares di trahador a percura pa mas actividad economico. Hunto cu e exitonan di e moneda nobo, e propio compañia di aviashon Air Aruba, eliminashon di e monopolio di producto di Corsow cu a trece cu n’e reducshon di nivel di preis, nan a nifica un impulso importante pa e propio confiansa di rubiano. E politiconan tambe a comparti e sentimentonan di orguyo. Nan a haya cu ta nan mes tawata responsabel pa e exitonan. Pesey tambe nan tawata di opinion cu nan a merece un bon recompensa pa nan esfuersonan. Consecuentemente na 1991 y 1997 nan a introduci ley pa adapta nan salario y posishon huridico na nan antoho. Den esey nan a perde realidad completamente for di bista.
Durante e siguiente decadanan e politiconan a sigui reina a base di e imagen ekiboca aki. Nan a goberna completamente segun nan propio parecer, poniendo un banda e conseho- y advertencianan di e instancianan local y internacional. A neglisha instancia di control y parlamento a neglisha su tarea di control. A reparti e placa disponibel entre e miembronan di partido fiel y e sponsornan pa medio di puesto, promoshon y asignashon pa traha caminda, edificio of duna servicio. Y den caso cu no tawatin placa disponibel (mas), a fia placa riba gran escala. Esaki a bay specialmente a costo di e fondonan di pension di APFA y SVB. Den un tempo relativamente corto e maneho di e gobiernonan consecutivo, apesar di un economia florecente, a afecta salud di finansas publico di tal forma cu na diferente ocashon gobierno a mira su mes confronta cu un escaces agudo di placa. Asina mes e momentonan aki no tawata suficiente pa pone e gobiernonan refleha. Al contrario. Na momento cu tawatin algun espacio financiero atrobe, a continua e mal maneho cu mas determinashon ainda. Tambe a neglisha e conseho y advertencianan di e partner mas grandi den reino, referiendo na nos autonomia. “Nos mes por”!
Mientrastanto pa tur hende a bira mas cu cla cu ‘nos autonomia’ tawata un paso mucho leu pa nos politiconan. E redoblashon reciente di e fayo presupuestal y e debe nashonal, cu prome cu esey ya caba tawata mucho halto, a maniobra Aruba den un situashon na unda medida severo ta inevitabel. E speransa di explotashon di un posibel fuente di gas bou di suela (di laman) di Aruba pa cubri e debenan a keda defrauda pa motibo di e desaroyonan actual di preis di crudo. Internacionalmente ta parando explorashon pa fuente nobo pasobra e nivel di preis actual no ta cubri e gastonan halto di explorashon. Pero Hulanda tambe a bisa bon cla cu e tampoco lo cubri e drispidimento di placa sin limite di politica rubiano, specialmente despues di tur e vueltanan di economisashon cu e mes mester a haci. Esey ta nifica cu pueblo di Aruba mes mester cubri completamente e consecuencianan di mal maneho di su politiconan.
Segun Cft, Aruba mester hiba un maneho di economisashon pisa durante e 20 añanan benidero pa baha e debe nacional actual cu mitar te na 40% di e Producto Nacional. Ademas Cft ta premira cu mester subi impuesto cu posiblemente mas cu 10%. Pesey e ta propone pa atrobe introduci un ‘Impuesto di solidaridad’. Sinembargo, aki no ta trata di ningun manera di ‘Impuesto di Solidaridad’, sino di un ‘Impuesto di Mal Gobernashon’.