Regularmente e gobiernonan consecutivo despues di inicio di Status Aparte a para indexering di salario di ambtenaar cu e pretexto cu no tin placa. En realidad gobierno cu tur siguridad a ricibi suficiente placa extra pa mantene forsa di compra di su personal. Pero ela prefera di hinca gran parti di e placa aki den nombrashon y promoshon politico y otro forma di drispidimento. Amigo di partido cu a haya un puesto of promoshon di regalo a come e aumento potencial di forsa di compra di ambtenaar.

E practica tradishonal pa nombra of promove miembro fiel di partido den servicio di gobierno na unda hopi biaha hende incapacita a bin ocupa puesto mucho halto cu salario mucho halto tawatin efecto hopi negativo pa ambiente den oficina. A demotiva esnan capacita cu ya tawatey caba locual a conduci na reducshon di productividad. Riba dje parti di e fielnan di partido si a ricibi un toelage di 25% riba nan salario como indexering. Pa e ambtenaarnan ´legitimo´ cu no a ricibi e toelage aki, esaki tawata un situashon inhusto. E maneho di gobierno aki no tawatin solamente como resultado cu mester a parti e bolo cu hopi mas hende, pero tambe na un manera deshonesto den parti desigual. E sindicatonan tawata na haltura pero no a haci nada.

Gobierno tawatin e reto pa financia e maneho di personal absurdo aki. Como cu no tawatin placa pa indexering normal, a busca solushon na un manera cu no lo tin consecuencia pa presupuesto. Asina a introduci ATV (ArbeidsTijdVerkorting) cu a reduci e productividad cu ya caba tawata abou, mas ainda. Tambe a aumenta considerablemente, y aki aya asta a redobla, tarifa di servicio di gobierno. A aumenta impuesto di importashon y a introduci BBO. Henter e pueblo trahador mester a carga e consecuencianan di e maneho di personal partidista di gobierno.

Pa sindicato tur esaki ainda no tawata suficiente motibo pa defende e trahadornan ´legitimo´ di Aruba. Critica modesto di sindicato pa cu maneho general di gobierno semper por a conta cu reacshon fuerte di gobernante. Durante e ultimo gobernashon di MEP regularmente a acusa sindicato di ta conspira cu partido di oposishon contra maneho di gobierno. Como consecuencia e sindicatonan rapidamente a para nan intentonan. Como defensa di nan actitud nan sa trece dilanti cu nan no ta mete den politica. En realidad nan a laga di carga nan responsabilidad pa sali na defensa di interes di nan miembrecia. Nan a sigui enfoca nan mes unicamente riba indexering. Consecuentemente e trahadornan den sector priva cu ya caba tawatin menos entrada y seguridad cu ambtenaar mester paga e placa necesario pa indexering di ambtenaar.

Gobierno di MEP tambe a acusa e organisashonnan di doño di trabou cu nan tawata practica politica y conspira cu oposishon contra gobierno, como cu nan tawata adverti gobierno cu su maneho lo perhudica desaroyo di Aruba. Por lo general e organisashonnan tawata simplemente ripiti e advertencianan cu instancia local y internashonal a duna caba. Pa e gobernantenan esaki tawata inaceptabel y nan a keda denigra e voceronan di e organisashonnan aki pa añanan largo. Ta straño si cu a pesar di tur e advertencianan aki di e organisashonnan di doño di trabao, politica a sigui ricibi sosten financiero pisa for di empresa pa nan campaña electoral. Esey por nifica cu nan tawata sostene e maneho of cu tawata trata di simpel oportunismo.

E gremionan a indica aña tras aña cu nan kier aporta na maneho general di gobierno pa asina guia desaroyo di Aruba den un miho direcshon. Asina mes e politiconan na poder te cu recien semper a rechasa nan petishon. Na aña 2003 nan a disuadi e idea pa un ´dialogo nashonal´ segun ehempel di e asina yama ´poldermodel´ na Hulanda. Gobierno di e tempo ey tawatin miedo pa un ´gremiocracia´ (un estado maneha pa e gremionan), pues un amenasa pa e famiacracia cu te cu e tempo ey tawata manda na Aruba. Solamente a envolve e gremionan na momento cu gobierno mes no tawata mira ningun salida mas pa su problemanan y tawata busca partner pa absorbe e golpinan.

Gobierno di AVP a cambia e maneho pa cu e gremionan drasticamente. Poco despues di su instalashon na 2009 a busca coperashon estrecho cu nan. Cohuntamente a tuma un gran cantidad di decishon importante y dificil, por ehempel riba tereno di penshun, cu por a conta cu un sosten grandi. E uniconan cu a protesta contra e procedimento aki tawata parlamentario cu a sinti nan mes exlui.

Mientrastanto ta conoci cu e maneho financiero iresponsabel di e gobiernonan desde Status Aparte te cu awor lo tin consecuencia serio pa pueblo durante e decadanan benidero. E falta completo di e funcshon di control di parlamento a contribui n´esaki. Ta hopi dudoso si gobernante y parlamentario riba termino corto lo por asimila e cambio di mentalidad cu ta necesario pa drecha asunto. Pesey tambe ta necesario pa e gremionan bandona nan pasividad y maneho di aceptashon di antes pa cu actuashon incorecto di gobierno. Nan no mester sigui simplemente cu nan aporte di e ultimo añanan na maneho general riba nivel di pais, pero asta expande esey. Al fin y al cabo ta nan ta representa e gruponan mas importante di pais Aruba cu mester paga tur consecuencia di (mal)maneho di gobierno.