Un partido grandi a inventa un solushon facil: cada candidato cu kier a subi lista mester a pone minimal Afl. 60.000,- den caha di partido. Nan por a fia e placa ey di un banco amigo. Segun e posishon riba lista tawata mas halto, mester a deposita mas placa. Asina e partido a acumula hopi mas di Afl. 1 miyon di parti di su propio candidatonan. E tempo ey, esey tawata un bon comienso.
E sistema aki tawatin varios bentaha. E partido a sigura su mes di candidato hopi motiva cu lo traha duro pa nan partido sali ganá. Ademas, e candidatonan tawata haci todo por todo pa sigura nan mas di mas voto posibel pa termina lo mas halto posibel. Un posishon favorable sa duna mas garantia pa gana e invershon bek cu dobel interes.
Un resultado di elecshon positivo a nifica cu por a cobra. Sa nombra candidato cu no a keda elegi pa ocupa un puesto di ministro of parlamentario den hunta di comisario bon paga di empresa y fundashon estatal. Asina nan a percura tambe cu e empresa of fundashon a sigui un curso cu lo ta na bienestar di e partido. Tereno y otro privilegio tambe tawata mas facil accesibel pa nan.
Candidato cu na prome instancia no a logra suficiente voto pa un puesto di minister pero sí tawata bon posishona pa bira parlamentario tawatin e siguridad di un salario fiho cu lo cubri nan invershon dentro di un tempo razonabel. Como cu hopi di nan a experencia e tempo di espera ey como mucho largo, nan a aumenta nan salario y pensiun na comienso di añanan ’90 na un manera bergonsoso.
Candidato cu a bira ministro tawata sigur di un recompensa directo y amplio pa nan invershon y esfuersonan. Cada acto gubernamental na unda un permiso pa un invershonista tawata envolvi, por a genera un bon comishon. Frecuentemente sa firma solamente pa un permiso despues cu a paga pa e firma necesario di e ministro concerni.
Di mes mester a ofrece instrumento pa convence votador pa asina logra e votonan necesario pa e victoria electoral. Dunamento di puesto den e aparato gubernamental, promoshon di empleado publico pa funcshon mas halto cu hopi aña di forsa retroactivo, otorgamento di tereno y proyecto fuera di e proceduranan normal a resulta motivashon importante pa votador.
Y pa esnan cu tawata dispuesto pa coba mas hundo den nan cartera pa duna e campaña mas forsa di convicshon, tawatin posibilidad pa deshaci di debe di impuesto y premie obligatorio. No ta por nada cu a mantene e caos administrativo stabil y cu hasta a neglicia/obstaculisa e intentonan pa simplifica of mehora e sistema di impuesto. Pa Aruba esaki a nifica un perdida substancial di finansas.
Pero e negoshi di berdad sa tuma luga riba e nivel di proyecto. Mas grandi y mas caro, mas miho. Sistematicamente a laga di inverti placa na mantenshon di infrastructura y edificio. Aki e ganashi tawata minimal. E placa grandi pa esun cu por a defini realisashon di e proyectonan grandi cu su firma sa bin di proyecto multimiyonario cu alabes tawatin un balor propagandista.
Si ta bon, tin politico y fanatico di partido cu lo sinti nan mes indigna pa lo anterior. Den caso asina lo ta bon si nan lo bin dilanti y duna un aclarashon razonable con bin cu (a pesar di e literalmente centenares di conseho y advertencia di instancia di conseho y control local y internashonal):
1- tin un aparato di personal gubernamental excesivamente grandi cu continuamente ta genera problema financiero aparentemente insolushonable pa Arubal;
2- gobierno di Aruba a neglicia su administrashon financiero y a laga di/obstaculisa reforma di impuesto necesario y
3- a entama/realisa cantidad di proyecto na unda a viola un gran cantidad di stipulashon legal.
Esun cu ta capas pa splica cu a haci tur esaki concientemente na beneficio di e interes general di comunidad di Aruba, mester a sali for di un neishi hopi bon mes.