Durante elecshon reciente un partido politico grandi a ricibi Afl. 10 miyon pa su campaña eletoral di parti di un empresa financiero importante pa medio di fundashon Klaas Vaak. A ricibi e aporte ey entre otro como gradicimento pa e entradanan grandi cu e empresa (t)a ricibi como cobransa na gasto di administrashon como resultado di e penshun obligatorio empresarial cu a introduci poco prome. Y/of pa e interes cu lo cobra pa e prestamonan grandi cu e lo por ofrece gobierno cu e placa di premie cu (t)a ricibi. Y/of pa e posibel coperashon di gobierno pa yuda suavisa e stipulashonnan severo di invershon na Aruba. Esey lo permiti empresa financiero grandi pa inverti mas placa den exterior en bes di e obligashon di cumpra bono riesgoso di un gobierno cu ta practicamente bancarota.

Tanto pa e empresa como pa gobierno esaki ta un situashon cu tur dos ta sali gana: e gastonan di administrashon y e pago di interes di parti di gobierno ta nifica un compensashon garantisa pa e empresa pa e aporte cu el a duna na caha di campaña. Pa gobierno esaki ta nifica un ampliashon bonbini y casi sin limite di e posibilidadnan pa fia placa riba mercado local. Asina mes esaki no ta e unico contribushon cu ta crea interogatorio. Na mesun manera contribushon na fundashon di (partido) politico di parti di un inversionista rico di exterior, cu husticia mericano a sentencia pa motibo di corupshon, lo por causa hopi duda tocante integridad di esnan cu a ricibi su contribushonnan.

E pregunta grandi ta si aki ta trata di echo of ficshon. Pa un gobierno cu ta haci todo lo posibel pa stroba ponemento di e ley di ‘Financiamento di partido politico’ riba e agenda politico, claramente ta trata di ficshon maligno. E ausencia di ley cu ta obliga transparencia den contribushon pa campaña politico y e esfuersonan transparente di e gobiernonan consecutivo di diferente color politico pa no pone e tema aki riba e agenda politico, ta haci cla cu ningun partido politico ta interesa pa duna transparencia den su financiamento cu frecuentemente sa tuma luga pa medio di fundashon. Asina ta mantene e inversionistanan pafo di bista mientras cu no por culpa politico di conflicto di interes of pio.

E repugna grandi di politico Rubiano pa cu financiamento di partido politico ta sali na cla for di e echo cu apesar cu prome ministro di e tempo ey, Sr. Nel Oduber (MEP) y lider di oposishon sr. Henny Eman (AVP) na 1993 a priminti unanime- y solemnemente pa regla e ley di Financiamento di partido politico obligatoriamente, asta pa medio di Statuut, nan promesa por escrito na Hulanda a resulta di ta un promesa morto. Apenas 7 aña despues e gobierno (di AVP) di e tempo ey a ripiti e hazaña aki dor di pone e palabrashonnan cu sindicato, manera acorda den Protoco 2000, completamente un banda. Na mesun manera partido MEP cu despues di esey a haya e oportunidad pa efectua e acuerdo aki, no a mustra ningun interes. Como consecuencia e posibilidad di comunidad pa averigua si partido politico ta corupto, a keda un ficshon.

E pregunta grandi ta si gobierno di Aruba por persevera den e posishon aki. En realidad Aruba ta e unico pais den Reino cu no conoce Ley di Financiamento di partido politico. E coperashon cu e gobiernonan semper a ricibi di nan Parlamento tampoco por sigui persisti, maske cuanto nos parlamento ta enfoca na funcshona na agrado di nan gobierno. Ta parce cu tur e ‘dealnan’cu (t)a resulta di financiamento (ilegitimo) di partido politico a contribui na gran escala na e practica di proyecto dudoso cu a causa comunidad Rubiano hopi daño den e ultimo 3 decadanan. Consecuentemente e responsabilidad cu parlamentario lo mester carga pa cu comunidad tambe ta resulta di ta ficticio.

Pero Hulanda tampoco por sigui laba su mannan den inocencia. Mescos cu Hulanda, segun e veredicto den e ‘caso Murray’ ta carga un responsabilidad adishonal na realisashon di derecho humano den Reino, na mesun manera e ta carga tambe un responsabilidad na realisashon di bon gobernashon. Si ta asina cla cu ta perhudica interes general na un manera asina vergonsoso pa motibo di mal gobernashon sistematico, Hulanda no por keda sinta mira na banda a base di e pretexto di pais autonomo den su Reino. Hulanda por bari e menasa di si partnernan Caribense, cu lo keha Hulanda riba e plataforma internashonal pa motibo di ‘recolonisashon’, facilmente for di mesa a base di documentashon ampliamente disponibel tocante mal maneho gubernamental sistematico. Sinembargo, introducshon concreto di e Ley pa Financiamento di partido politico ta apenas e prome paso anke sea indispensabel, pa destroza e ficshon di bon gobernashon na Aruba.