E noticia a cay manera un bom. Un ministro cu posiblemente a pidi y ricibi placa pa permiso di trabou. Aparentemente instancia manera Ministerio Publico, Cuerpo Policial, RST, FIOD y otro, ya pa algun tempo tawata investigando e caso aki den tur secrecia. E entradanan den 13 diferente lugar na unda no a lubida ni e cas ni e oficina di e mandatario ta duna un indicashon cu tawatin indicashon fuerte di ‘actividad corupto’.

Di biaha parti di comunidad di Aruba a mustra dede riba un posibel otro ‘victima’ pa investiga. Pa varios aña caba tin duda tocante otorgamento di tereno y permiso. Pero tambe sa mira otro colega-ministro y hasta henter e gabinete como ‘traha di mesun tela’. E imagen aki a haya mas forsa di parti di e contricante principal di semper cu a denomina henter e gabinete como uno corupto. Un asunto di ‘nos conoce otro’?

Pa hopi hende e aparente cambio di Ministerio Publico (MP) tawata hopi alentador. Despues di e casonan fastioso y e tantisimo conflictonan cu a tuma lugar como consecuencia di e keho di Comishon di Berdad na 2002, MP a asumi e posishon cu preferiblemente e no lo mete mas den caso na unda politico di peso tawata envolvi. E bululo politico di e tempo ey tampoco a keda sin afecta MP. Pero e posishon aki a nifica sí cu en realidad politico a bira intocable. A parce cu MP a cera wowo pa ‘corupshon gubernamental’.

Di unda e cambio anto? E tin di ber cu e proceder sin misericordia na hopi parti di mundo na unda no ta exonera exponente politico mas? Ya no ta trata solamente di investigashon di empleado publico insignificativo cu a cera convenio cu comerciante. Hasta ta expone (ex-)presidente sin considerashon pa su persona y, si ta necesario, ta bah’e for di su funschon y ta persigui’e. E (ex-)presidentenan di Brazil y Sur Korea ta e ehempelnan mas recien.

Of tur esaki ta consecencia di e postura nobo di gobierrno di Reino cu a fada completamente di e (consecuencianan di) mal gobernashon y corupshon structural na e islanan y por fin ta cuminsa duna contenido na su deber di garantisa bon gobernashon? Ya caba pa varios decada Hulanda ta na haltura cu su partnernan Caribense no (t)a tuma integridad mucho na serio. No ta por nada un politico importante Hulandes den añanan ’90 a yama nos islanan neishi di bandido sin cu tawatin consecuencia p’e.

Of, mas importante ainda, ta trata di un postura mas recalcitrante di ciudadano Rubiano mes cu ta harta di e pompamento cronico di politico y por fin ta tuma acshon? E ‘revolushon di media’ cu ta haci cu grupo grandi di hende ta intercambia informashon cada bes mas facil, sin ningun duda a hunga un papel di estimulo. E hecho cu informashon pa medio di Facebook tawata un di e motibonan pa cuminsa e investigashon actual di e actividadnan di e ministro di Labor, Asunto Social y Hubentud, ta demostra cu tambe ta trece acusashon serio y funda dilanti.

E pregunta ta si ta trata di un caso solitario dentro di un gabinete integro? Manera probablemente por imagina, ami no ta pertenece na e grupito di hende cu ta kere esey ciegamente. Ya caba durante mas di 2 decada mi a describi den varios articulo cu na mi fuerte opinion e funcshon di ministro en realidad ta un negoshi na unda e firma di minister pa otorgamento di permiso, tereno, etc. tin su prijs. Mas grandi e proyecto of e necesidad, mas halto e prijs. Un cuestion di comishon, manera sa tuma lugar na casi tur pais na mundo.

E daño enorme cu corupshon di parti di gobernante a causa na comunidad na tur parti di mundo a haci cu ciudadano a lanta for di soño, a cuminsa agita y a desenmascara abuso di parti di gobernante. A sali na cla cu gobernante pa motibo di enrekicimento propio (cu na pais grandi sa suma na biyones di florin!) a stagna desaroyo di nan comunidad, a causa pobresa of hasta a hiba nan pais na rand di abismo. Y tur esey na nomber di ‘servicio na interes general’.

No ta por nada cu casi na tur pais na mundo tin un avershon enorme contra politica y cu e desconfiansa pa cu politico tin rais profundo. Y tur parti di mundo e simptomanan ta(wata) mescos: un administrashon financiero deficiente y crecemeto di e debe nashonal te proporshon no-pagable. Locual a haci cu e placa no por destila for di desaroyo di e comunidad. Pero comunidad sí mester paga e tur e debenan, mas interes!

Aruba ta forma un excepshon riba e imagen aki? Di ningun manera cu NO! Pesey ta di sumo importancia cu e proceso actual di ‘expone’ sigui su caminda. Cu comunidad di Aruba saca su inspirashon for di desaroyo na

otro pais di mundo. Cu Reino ta sigui garantisa bon gobernashon locual pa hopi tempo tawata simplemente un promesa morto. Pero specialmente, cu ciudadano Rubiano duna contenido na nan propio responsabilidad dor di uza Facebook y otro medio di comunicashon pa expone directamente y publicamente abuso den cualke forma di parti di gobernante y empleado publico.