Na luna di maart ultimo, Landsrecherche, RST y Cuerpo di Polis di Aruba a haci un entrada hudicial entre otro na cas di ministro di asunto social y labor. Motibo tawata e sospecho cu e ministro, hunto cu colaborador, a acepta regalo, promesa y/of servicio pa motibo cu el a duna excenshon di e prueba di mercado di labor. E lunanan despues, cu excepshon di algun detenshon, no a tende mucho mas tocante progreso di e investigashon. Posiblemente esey a haci cu e ministro en cuestion (cu a keda suspendi) aparentemente a conclui cu ya no tawatin peliger p’e mas. El a aparece na un encuentro di campaña di un ministro colega, a presenta su mes (en vano) como candidato riba lista di elecshon di su partido, a presenta un familiar como remplasante y al fin y al cabo a duna un conseho pa vota pa e mesun colega-ministro. Te ora cu na comienso di e siman aki a deten’e riba acusashon di corupshon administrativo y a encarcel’e. Tumando na cuenta e gran cantidad di caso (mas di 2000 ‘dossiers’) y e red ramifica cu a pone den otro, no por exclui cu mas departamento di gobierno y/of colega tawata envolvi. Esaki lo por ta un indicashon di un red organisa dentro y haciendo uzo di e organisashon gubernamental. Si esey ta e caso, anto lo ta trata di un delito hopi mas serio.

Pero esey no tawata e unico caso cu a pidi atenshon. E aumento recien y direpente di e sueldo minimo no solamente a hiba na protesta di ATIA y Camara di Comercio, cu a alega cu no a scucha nan den esaki. SER tambe a keda informa pa medio di e medionan di comunicashon cu a aumenta e sueldo minimo cu forsa retroactivo. Mas serio tawata su ponencia cu e proceso pa aumenta sueldo minimo no a cana e caminda legal. E ministro concerni a haci uzo di un conseho (negativo!) na 2016 y a aplik’e pa e ley di ordenansa en cuestion. Esey no ta conforme ley y pues ta ilegal. E pregunta ta si e firma di Gobernador ta legitima e ley aki. Casi na mesun momento a bin sali na cla cu ministro di finansas a tuma e decishon pa ofrece empleado cu contract di varios aña un posishon fiho den gobierno. Pero e dos ‘vakministernan’ tawatin mas asunto cuestionabel.

E ministro pa asunto economico durante e ultimo debate politico di Camara di Comercio a trece padilanti cu economia ta produci bon. E ta contradeci e opinion basa riba cifra di Banco Central cu economia di Aruba ta produci masha modesto mes. Segun e ministro di finansas, Aruba por resolve su problemanan financiero na un manera autonomo. Nos pais por regla su mesun finansas dor di instala su ‘Camara di Presupuesto’ desde otro aña. Den esey e ta lubida cu e aña aki atrobe e no ta logra entrega e presupuesto na tempo y cu ta dudoso si e nivel di realismo di e presupuesto aki lo supera esun anterior. Pa e mundo politico di Aruba un ‘propio’ (pues no-independiente) Camara di Presupuesto ta trece como bentaha cu gobierno, mescos cu antes, no mester sigui e ‘consehonan’. Asina e por sigui hiba Aruba den un abismo. Ta di spera cu e raportahe di e di dos cuartal di aña cu Caft lo publica pronto, lo duna mas claridad tocante e situashon real di Aruba. Mientrastanto ta bira cada bes mas dificil pa e ministro di finansas logra finansia tur cos, specialmente awor den tempo di elecshon den cual su coleganan fervientemente ta purba parti mangel cu placa cu no tey. Riba dje e mester duna un splicashon aceptabel pa motiva pakico ya pa varios luna e ta sinta riba e raport tocante e proyecto tan famoso di ‘Bo Aruba’. Esey ta duna e impreshon cu tin informashon cu miho no sali na cla prome cu elecshon.

Mientrastanto e pregunta ta keda ki dia CITGO por fin lo produci algo pa Aruba. Ya caba a pasa mas di un aña despues di e momento cu e refineria lo cuminsa percura pa un aumento importante di empleo y entrada di impuesto. Ta parce cu cada bes mas hende aparentemente ta realisa nan mes cu no por spera mucho di un acuerdo cu na prome instancia a inicia cu un persona cu mientrastanto ta encarcela na Merca pa motibo di corupshon. Posiblemente e tawata representa e empresa madre cu en realidad ta bancarota pa motibo di…corupshon na gran escala. Esaki ta bira mas complica como cu doño (es ta e pais concerni mes) tambe ta rumbo pa un abismo pa motibo di …corupshon y un gobernashon cuestionabel. Pa ningun pais esaki ta un partner atractivo. Den esey ningun hende mester ta asombra si e grupito cu a logra e acuerdo cu Citgo pa medio di negociashon secreto, al fin y al cabo lo percura pa Aruba perde minimal (!) Afl. 600 miyon pa motibo di su garantia. No por spera mucho cos bon di hende cu den cierto sentido tambe tawata responsabel pa e contrato di hedging cu a resulta den un pago inecesario di centenares di miyon florin pa crudo pa WEB. Tempo lo siña nos!