Patronahe politico
Como cu tawata trata di un invershon basta halto, mi a acerca Hulanda pa asistencia financiero. E representante di Hulanda di e tempo ey a declara cu e proyecto tawata excelente pa Aruba. Ademas e tawata un proyecto relativamente barata cu Aruba lo por y pues lo mester financia for di su propio medionan. Segun e, si Hulanda lo financia e proyecto, Hulanda lo asumi e responsabilidad di Aruba. Mientrastanto Aruba lo sigui sin problema cu su mal maneho financiero, entre otro pa medio di su nombrashon di personal. Hulanda no kier a coopera n’esey.
Placa bou di mesa
Den e mesun periodo mi tawatin un encuentro cu un funcionario halto di Aruba mes. El a pidi informashon tocante desaroyo di e proyecto. Despues di a dun’e e ultimo avansenan tecnico y financiero, el a puntra’mi “si nos a tene cuenta cu placa pa ministro”. Riba mi petishon pa mas splicashon, el a clarifica cu “e ministro solamente lo aproba e proyecto pa medio di su firma si lo pag’e p’esaki”. Riba mi observashon cu tawata trata di un proyecto pa comunidad sin ningun lucro financiero di nos parti, el a contesta cu esey no ta forma ningun prioridad pa e ministro duna su firma. Pa mi, esey tawata fin di mi participashon na e proyecto. Bou di ningun circumstancia mi tawata dispuesto pa contribui na enrikecimento propio di un ministro. No tawatin sentido pa entrega un keho pasobra tawata mi palabra contra esun di un funcionario halto. Pasobra e ministro mes a keda pafo di e combersahon. E tawata mucho ocupa cu firmamento di permiso cu tawata cay bou di su responsabilidad.
Dudoso
Pero esey no tawata tur. E ministro concerni tawata e prome di a ricibi un KB for di Hulanda pa motibo di su acshonnan dudoso como ministro di husticia. No ta por nada raport Koerten di Servicio di Inteligencia di Aruba (AVD) a dedica atenshon na dje. Pa motibo di e desconfiansa entre e ministro ey y AVD, e ultimo aki a mira su mes obliga pa deposita tur su documentonan bou di protecshon militar na Corsow.
Guia ehemplar?
Sinembrago, dentro di e mundo politico, aparentemente e ta figura como guia ehemplar. Pesey a dicidi pa dun’e honor dor di presta su nomber na un boulevard importante. Pa hopi hende cu sa mihor, esaki ta un bofta duro den nan cara y e di tantisimo muestra di arogancia politico. Pasobra aparentemente ainda e mundo politico ta sali for di punto di bista cu nan por tuma haci henter comunidad sin cu esaki ta protesta. Pesey tambe, e gabinete nobo, cu a pone bon gobernashon y integridad como su puntonan di enfoke mas importante di su maneho, di ningun manera por honra e intenshon di e gabinete anterior pa dunamento di nomber di e ex-ministro concerni na e boulevard.
Maneho
Mientrastanto mas y mas ciudadano ta compronde cu ‘politica’, durante decada, a perhudica Aruba masha. Solamente pa e motibo aki nos ta haya nos mes den un situashon financiero hopi serio. Esey no ta afecta solamente nos tur awor, pero tambe nos yiu- y nietonan. Pesey tambe no por pasa (mas)
cu nos lo honra politico cu a duna un aporte n’esaki, cu nan nomber pa un caminda, corda pa un boulevard asina importante.
Proposishon
Pesey mi proposishon pa no presta nomber di politico mas pa caminda publico (importante), edificio of plaza. Cu excepshon si por prueba contundentemente y sin contra-argumento cu e persona ey di berdad a hunga un papel 
sumamente positivo pa desaroyo di Aruba. Pesey lo por duna e boulevard en cuestion miho e nomber di BonBini Boulevard. Esaki lo ta muestra di nos hospitalidad na esnan cu a caba di ateriza y cu di berdad ta duna un aporte importante na nos economia.
Di mes, mi no ta dje negativo ey pa, den caso cu ‘politica’ta keda insisti pa un muestra di honor, pa dun’e esey tambe. Pesey mi di dos proposishon pa realisa un estatua cu ta mustra claramente kico 30 aña di Status Aparte a trece pa nos: un Aruba blo bashi!