Por mira mesun falta desesperante di placa riba tereno di enseñansa. Pesey tambe Beatrixschool, Julianaschool y Colegio Frere Bonifacius tin basta aña cera como cu no tin placa pa reparashon. Pasobra ta malgasta esey na localidad di emergencia na unda awendia ta ricibi e alumnonan di e scolnan ey. Den tur departamento di gobierno, e falta cronico di placa ta hunga un papel limitativo importante.
Asina mes, e ultimo gabinete di AVP t’e na ultimo momento prome cu elecshon, a sigui presenta un imagen como sifuera nada serio tawata tuma luga. Segun e partido, Aruba lo por cumpli sin ningun problema na e exigencianan di CAft pa cu presupuesto. Nada tawata mas leu di berdad!
CITGO como ‘solushon’
Por destila masha facil mes for di e aventura cu CITGO con desesperante e situashon financiero di Aruba ta durante e ultimo añanan. Pasobra, ¿con mas por splica cu a pone e unico speransa pa e salbashon financiero di Aruba den ponemento den funcshon di e masa di hero bieu tur frustia y ya caba completamente deprecia? Esaki a anula den tur sentido e principal slogan y proyecto di show internashonal di gabinete di AVP, esta ‘un Aruba berde’! Asta e Chinonan, cu placa na granel pa cumpra e ultimo cos na tur caminda na mundo, a laga e refineria un banda, a pesar cu e ta un di e poconan na mundo cu por refina e crudo diki Venezolano. Esey ta hopi remarcable pasobra pa motibo di su problemanan ecologico serio, China tin un prohibishon p’e mes refina e crudo aki, cu cual Venezuela ta paga su debenan enorme na China.
Pero nos gobierno tawata sa miho y a cuminsa negocia cu un compañia di estado Venezolano di e pais cu ya caba, sin misericordia, a causa bancarota of problema financiero serio di varios empresa Arubano y Antiano (Tiara Air, Insel Air, Aruba Airlines, hunto cu cantidad di otro empresa di aviashon internashonal). A cuminsa e prome negociashonnan cu un persona di cual tawatin basta duda. En berdad, poco despues Husticia Mericano a sentencia e persona aki pa motibo di corupshon na gran escala. Asina mes a sigui negocia, awor cu remplasante cu recientemente tambe a encarcela pa motibo di corupshon na gran escala. Nan a encabesa un empresa cu ta propiedad di e compañia di estado cu ya caba pa basta aña no por cumpli debidamente na su obligashonnan y cu cada bes mas ta den problema mas serio. Atrobe, pa motibo di…corupshon na gran escala! Mientras cu e ultimo añanan internacionalmente ta critica e gobierno di e pais cu ta doño di e compañia di estado concerni fuertemente pa motibo di e circumstancianan dictatorial y e corupshon endemico cu a hiba e pueblo di e pais mas rico di mundo na crudo, t’e na rand di morto pa motibo di hamber. Den e hendenan ey, e empresanan ey y e gobierno ey di e pais ey, e ultimo gabinete di AVP a hinca su mayor speransa pa salba Aruba di un abismo financiero!
Engaño di pueblo
Bou di e circumstancianan aki a spera di pueblo cu e lo sigui kere ciegamente den nan ‘salbadornan’ di gobierno. Indudablemente nan tawatin solamente bon intenshon pa nos. Pasobra durante e negociashonnan cu tur e ‘malbadonan Venezolano’, di mes nan tawata y/of a keda puramente moral di mente y nan a defende exclusivamente e interesnan di Aruba. Pues no!
Minimal por a duda di nan expertico di negoshi for di e echo cu varios di nan tambe tawata co-responsabel pa e fiasco cu e hedging di WEB. Esey a costa pueblo di Aruba inecesariamente mas o menos Afl. 300 miyon. Nan fayonan moral y riba tereno di negoshi tambe ta sali na cla for di e echo cu bou di tur e circumstancianan ariba menciona a firma un acuerdo ultra secreto pa supuestamente habri e refineria. E deal aki, den caso cu e ta ‘faya’ ta pone un obligashon adishonal di minimo Afl. 600 miyon riba lomba di pueblo, cu ya caba ta confronta un debe di biyones cu pago di interes gigantesco pa motibo di malgobernashon durante decada.
Pues ta parce cu te cu recien, gobernante ainda ta sali for di e punto di bista cu realmente tur hende na Aruba ta completamente kens. Riba dje ta bira cada bes mas cla con leu nan ta dispuesto di bay pa engaña pueblo riba un escala asina grandi y cu consecuencia asina serio. E pregunta ta kico pueblo por haci pa proteha su mes contra actitud asina cu ta parce asta criminal di parti di su gobierno.
Reflecshon
Anke e gobierno actual ta hunga bunita cu su promesanan pa cu bon gobernashon y integridad, mester warda si di berdad ta transforma e promesanan ey den acshon efectivo. Esey ta depende grandemente di e preshon di parti di ciudadano riba gobernante. Y por haci esey solamente si tin un bista completo di e manera con realmente a goberna Aruba y e consecuencianan. ¿Ta sigui considera e consecuencianan ey como inevitable di nos politica di patronahe tradishonal? Den caso afirmativo, nos ta sucumbi y ta sigui, manera semper, cu orden di dia cu ta bira cada bes mas desesperante? Of nos ta cuminsa por fin na acepta cu tipo di gobernashon asina ta inaceptabel/criminal y pa nos no sigui comporta nos mes manera lamchi manso? E escogencia entre esakinan ta determina pa gran parti e solushonnan cu nos mes mester aporta pa nos problemanan actual.