Pa hopi votador adelanto financiero ta e forma principal di propio interes. Mehorashon di entrada y penshun pa medio di un puesto den gobierno, adkisishon di tereno, ganashi extra cu otorgamento garantisa di proyecto of otro privilegio ta instrumento hopi uza. Ta reparti e gastonan adishonal cu esaki ta trece cu n’e pa gobierno, riba henter pueblo. Tur hende, incluso e minoria cu tawata en contra di e gobierno nobo, ta paga pa e bentahanan cu -(parti di) e mayoria nobo-ta apropia su mes di dje. Den practica esey kier men cu otronan ta paga e bentahanan y cu ta cobra e otronan tambe pa paga e gastonan. Di e manera aki e mehorashon di prosperidad di un grupito di oportunista ta bay a costo di e prosperidad di e pueblo cu cada bes mas tin menos pa gasta.
Asina e legion di empleado publico na Aruba a hincha te na un tamaño insostenibel. A pesar cu no tin placa p’e, un acshon directo pa un solushon riba termino corto ta resulta dificil: empleado publico mes ta ehecuta e sistema y asina nan por percura cu nan ta ‘indispensabel’. Politico cu ta depende grandemente di e mesun empleadonan publico pa keda na poder, ta prefera di no kima nan dede. Pesey ta uza e pretexto di posibel consecuencia social pa esnan concerni y comunidad pa papia e falta di acshon pa reduci e aparato gubernamental bon. Di e manera ey ta haci un apelashon riba emoshon di pueblo cu pa mayoria parti ya caba ta gana hopi menos cu e empleadonan publico concerni.
Manera ya caba a trece padilanti, e razon di ‘e mayoria’ di votador den hopi caso no ta basa riba considerashon di moralidad y racionalidad. No solamente durante campaña electoral, pero tambe durante e periodo di gobernashon despues, politica ta laga di apela riba e ‘racionalidad’ di pueblo dor di haci uzo na un manera sabi di emoshon di su publico. En realidad, politica ta asumi cu pueblo no tin suficiente conocemento pa yuda pensa y dicidi riba asunto ‘compleho’. E conocemento necesario y e inteligencia cu nan ta atribui e votadornan pa haci e elecshon partidista preciso, aparentemente no ta bay asina leu cu e tin algun balor pa maneho di pais. E consecuencia ta, cu politica ta sali for di e punto di bista cu e mayoria cu el a ricibi, ta nifica un carta blanco pa sigui actua. Asina e ta legitima su tradishon pa mantene gran parti di su acshonnan for di bista di pueblo. Al fin y al cabo ta un grupito hopi chikito so cu tin conocemento completo di tur asunto y consecuentemente tin tur poder y libertad di acshon pa haci locual e ta pensa ta bon. Asina ta parce cu trabou pa interes general pa un ‘gobierno di mayoria’ a bira labor pa propio interes pa actitud di un minoria chikito.
Asina mes e falta grandi di racionalidad den escogencia di votador ni sikiera ta e problema di mas grandi di e realidad democratico. E complehidad di specialmente economia y finansas nashonal awendia ta di tal indole cu masha tiki hende por visualisa completamente e implicashonnan di acshon di gobierno riba e terenonan ey. Politico no ta dispone solamente di e informashon necesario, pero tambe di suficiente ‘know-how’(pa medio di nan propio instancianan di gobierno) pa mira e consecuencianan real di nan acshonnan. Pues ta muestra di poco moralidad si nan ta hiba un maneho cu al fin y al cabo ta afecta bienestar den forma di un reducshon di forsa di compra di mayoria di pueblo na un manera serio. Pasobra nan ta abusa di ignorancia di e publico grandi dor di present’e un realidad cu nan no por realisa. E mentira ey y su consecuencianan den mayoria di caso solamente ta sali na cla despues cu e politiconan concerni ya caba a baha na awa.
E falta di moralidad di politico y e ignorancia completo combina cu e prioridad halto pa propio interes di parti di votador, specialmente pa democracia hoben sin mucho experencia ta genera e problemanan mas grandi. E consecuencianan pa mayoria di pueblo na beneficio di un minoria chikito ta hopi mas serio cu hopi ta pensa.