A pesar cu entrada a subi substancialmente despues di e prome salida dificil, gobierno atrobe a mira su mes confronta cu reto financiero grandi. E biaha aki tawata nombrashon di cantidad grandi di empleado publico, proyecto costoso cu a faya y e recompensanan tremendo cu politico a apropia despues cu nan a ´soluciona´ e problemanan di Aruba. Tur hunto tawata un atentado mucho grandi riba e forsa di finanzas publico. Na 1993 esaki asta a conduci na un biahe di prome ministro di gobierno di MEP pa Hulanda cu e petishon urgente pa asistencia. Sinembargo, e problema mas grandi a surgi na 2004, ora gobierno di MEP a confronta un fayo financiero di Af. 353,6 miyon.
Tempo cu MEP a tuma e riendanan di gobernashon na 2001, AVP a cera e aña cu un fayo di Af. 28 miyon. MEP a multiplica e fayo aki na 2002 te cu Af. 72,9 miyon y na 2003 asta te Af. 172,4 miyon. E redoblashon di e fayo aki na 2004 simplemente tawata un continuashon di e trend. E pregunta tawata con pa financia esaki. Mercado local no por a genera e placa necesario asina sin mas y pa mercado internashonal Aruba mester di permiso di Conseho di Ministro di Reino según articulo 29 di Statuut. Gobierno di Aruba a premira cu Hulanda lo haci pregunta fastioso cu lo haci e procedura di aprobashon largo y complica. Tumando na cuenta e situashon pesimo di caha di gobierno, el a busca manera creativo pa solushona su problemanan riba termino corto.
Dia 1 di april 2004 ministro di finansas di e tempo ey y directiva di banco RBTT a firma un acuerdo pa un prestamo di US$ 67 miyon, na un balor di emishon di 97,51 % cu un interes di 6,8%. Esaki tawata resultado di negosashon intensivo na unda gobierno a logra cu RBTT lo haci un prestamo internacional y pasa esaki pa pais Aruba bou di e denominashon ´local´. RBTT a premira problema ora di paga bek, como cu Banco Central di Aruba (BCA) lo cualifica esaki como pago na exterior of pago di un préstamo internashonal. Pa esey pais Aruba mester pidi permiso di devisas na BCA. E oraey BCA lo mester exigi un aprobashon di Conseho di Ministro di Reino.
Segun conseho anterior di Departamento di Finansas gobierno mester exigi cumplimento total di parti di RBTT di e acuerdo entrenan dos. Ademas mester pone bon cla na RBTT cu, como bendedor, ta su tarea pa tuma tur paso pa acentua e base huridico. Ni benta di e prestamo local aki na otro partido, ni considerashon economico of di balansa di pago lo por afecta e caracter ´local´ di e prestamo. Segun e conseho esey lo tin como consecuencia cu no por exigi legalmente for di pais Aruba pa pidi permiso di devisas cerca BCA. Al fin y al cabo Aruba a ricibi US$ 65,3 en bes di US$ 67 miyon. E diferencia mester a cubri pa gran parti un recompensa pa RBTT pa su coperashon pa provee gobierno riba termino corto di un prestamo ´local´.
Pa BCA como defensor financiero mester tawata cla cu gobierno a sigui su esfuersonan espasmodico pa denomina e prestamo internashonal como uno ´local´. Den su relato di cuarto di aña (government operations te cu 2008) a administra e prestamo di RBTT como un prestamo internashonal pa Af. 119,5 miyon cash. Sin embargo, den e resumen di préstamo local di gobierno a administra e prestamo aki como recibo cash pa Af. 116,3 miyon. Ademas ta e pregunta si gobierno a cumpli cu e obligashon segun art. V.14 di Constitushon pa legalisa un contrato asina pa medio di un ordenansa nashonal pa e tin valides legal.
Como cu e préstamo tawatin un durashon di 10 aña, pago di e suma completo ta tuma lugar na 2014. Pa gobierno actual di AVP esaki sin duda ta forma un problema grandi, specialmente pasobra no a haci uzo di un ´Sinking Fund´. Esaki lo a obliga gobierno pa reserva tur aña un suma pa e pago final. Ta asombroso cu e gobierno aki, cu su bon lazonan cu Hulanda, no a expone e prestamo internashonal aki di su contricante eterno MEP. Esey automaticamente ta duna e impreshon cu el a sigui e hempel di su predesesor y a financia e gastonan ilimita di e ultimo 4 añanan na mes un manera. Esey lo nifica cu ambos partido lo mester demostra hopi creatividad, no solamente pa nan administrashon, pero tambe pa nan argumentonan pa evadi articulo 29 (structuralmente?!).