Manera ya caba ta e caso na hopi pais, na Aruba tambe ciudadano tin tiki of asta nada mas di confiansa den politica. Esey tin motibo simpel. E polarisashon continuo entre partido, e inhusticia den actitud di gobierno, departamento di gobierno cu ta presta bou di nivel, aumento di gasto di interes y debe y consecuentemente aumento di gasto di gobierno ta apenas algun tema cu ciudadano ta confronta ya caba pa decada y cu ta parce di ta empeorando cada bes mas. Como cu hopi biaha ta reina e impreshon cu nos (mester) considera tur esey normal, mi a purba di duna un aporte pa medio di articulo na un proceso di concientisashon pa haci cla cu en realidad esey no ta nada normal, cu aparentemente propio interes ta determina mayoria parti di e actitud politico y cu e cultura politico reinante ta un obstaculo grandi pa un desaroyo saludabel di Aruba.
Mayoria di articulo a profundisa riba e gran cantidad di violashon (conciente) di principio di bon gobernashon y a mustra riba e incompetencia di acshon gubernamental. A trata e fracaso di nos organo politico mas halto, es ta parlamento, ademas di e abuso cu ta haci di e ideal democratico. Pa esnan cu kier mira tur articulo tras di otro un biaha mas, e website www.harmoniaruba.org por duna solushon. A presenta tur articulo di e ultimo 7 luna segun tema den e capitulo ‘Politica na Aruba’ bou di e tab di ‘Comunidad’. E website tambe ta duna acceso na e bukinan ‘Bon gobernshon & e realidad politico’ di aña 2001 y ’25 Jaar Status Aparte, een politiek paradijs’ cu a publica na 2011. For di e bukinan ta bira cla cu ya poco despues di introducshon di Status Aparte nos politiconan siguramente no a tuma e interes general di Aruba como nan guia principal, pero tambe cu no ta solamente politico ta culpabel di tur cos cu a bay malo na Aruba. E pasividad y de bes en cuando asta e colaborashon di medio di comunicashon den caso di actitud incorecto di gobierno, e oportunismo di parti di dunador di trabou y sindicato y e exigencianan exagera di ciudadano pa privilegio di ‘nan’ partido tambe a duna un aporte importante na e situashon actual. Riba dje, e ultimo 30 añanan, masha tiki hende a tribi di ranca orea di e elite na mando. Na hopi pais democratico esey ta un falta grandi. No ta por nada Martin Luther King a comenta al respecto cu ‘e no tin miedo di e gritamento di esnan hambra pa placa, e immoralnan ni e criminalnan. Locual e ta teme ta e silencio di esnan di bon curazon’.
Mientras cu economia ta produci bon y ta financia e sistema di faboritismo, ningun hende ta precupa y tur cos ta sigui manera semper. Pero na momento cu a yega bom di caha publico y ya no por haci un apelashon sin mas riba e prestamistanan, mester cambia di actitud. Por ehempel, mester tene cuenta cu exigencia nobo. Hopi biaha nan ta hopi simpel. Ta trata cu mester goberna segun bon norma y pues norma cu a adopta bastante general na mundo occidente cu e consecuencia cu ta maneha placa na un manera responsbabel. Asina politikeria cu placa di pueblo ta bira dificil. Mas malo e situashon ta, mas dificil e solushonnan y mas lo afecta bienestar di comunidad. Si al fin y al cabo ciudadano mester entrega mas y mas pa un cantidad creciente di servicio y asta ta mira un reducshon di nan entrada y seguridad di trabou, nan disponibilidad pa considera actitud incorecto di gobierno como ‘normal’, lo reduci rapidamente. Pa gobierno esaki ta un problema, pa comuidad esaki por nifica e comienso di bon gobernashon.
Cada bes mas frecuente por scucha cu politico ‘di berdad’ y partido politico no tin ni e boluntad, ni e capacidad pa goberna nos pais debidamente. Como consecuencia hopi hende ta mira un ‘zakenkabinet’, consistiendo di experto ribe diferente tereno cu ta maneha e pais sin tene cuenta cu exigencia personal y comercial di fanatico di partido y sposor. Na luga di e parlamentarionan di custumber lo por tin representante di sindicato, dunador di trabou y Ngo cu conocemento financiero y huridico cu, como sifuera un Dialogo Social institutionalisa, ta duna contenido na maneho di pais pa medio di discushon intensivo y continuo. Pero tin mas variashon, cada un cu posibilidad nobo, pero cada un tambe cu interogashon y problema nobo. E problema principal ta cu cualke sistema nobo ta rekeri un cambio di Constitushon. Ta dificil pa logra un mayoria p’esaki si cambio ta nifica cu politico lo perde poder of asta nan trabou.
Pero por hopi mas facil tambe. Si politico cuminsa por fin na tuma e espirito y e letra di e sistema democratico y ley na serio sin comete fraude, ya por logra hopi. Si riba dje lo analisa funcionamento di servicio di gobierno y fundashon na un manera critico, y lo mehora nan den sentido di eficiencia y eficasidad, tambe lo por logra bentaha grandi. Den esey nos organonan di conseho y control ta hopi capas pa duna un man. Si nos gobernantenan, bou di guia di un comunidad critico, lo tuma eseynan finalmente na serio, lo resulta cu ‘conseho y metemento di afo’ dentro di poco tempo ya no lo ta necesario mas.