Manera di custumber, gobierno ta haci hopi buya cu informashon positivo mientras ta sconde e partinan menos positivo bou di tapijt. Asina no ta conoci ainda te ki punto e financiamento di e ‘upgrading’ ya caba ta un echo. Esaki lo tuma luga na mesun manera y pa mesun compañianan cu lo ‘asisiti’ e empresa madre PDVSA pa medio di invershon di parti di e empresanan concerni cu lo ricibi nan pago bek den curso di e siguiente añanan. Sinembargo, e pregunta ta si bou di e circumstancianan actual e diferente compañianan ainda ta dispuesto pa, sin ningun garantia concreto, inverti den un PDVSA cu practicamente ta completamente bashi. Pa e refineria tur frustia na Aruba cu un balor di hero bieu di apenas US$ 125 miyon e situashon ta hopi mas serio. E ta depende pa su crudo completamente di un PDVSA den un situashon financiero hopi problematico. Riba dje e no ta propiedad di CITGO cu mester financia e upgrading. Como tal, e insiguridad y falta di garantia pa un invershon di Afl. 2 biyon aun ta hopi mas grandi.
Apesar di e insiguridad aki AIB, segun gobierno, ta asumi cu ya caba na impuesto riba salario di e trahadornan di CITGO y otro trahador ‘afilia’ lo ricibi Afl. 58,7 miyon na 2017. E suma aki ta crea algun duda. Segun e ultimo cifranan di Banco Central di Aruba (CBA), gobierno a cobra Afl. 247,6 miyon na impuesto riba salario na 2015. E expectativa di gobierno ta cu 2016 lo genera e suma di Afl. 260 miyon, sin un aporte substancial di personal di CITGO. Segun gobierno/CITGO e refineria lo crea empleo adishonal di 3,1% riba e cantidad di personal total di mas o menos 56.000 hende cu tin na Aruba. Esey ta suma na 1750 empleado nobo. Consecuentemente esakinan lo aporta cada un Afl. 58,7 miyon dividi pa 1750, locual ta Afl. 33.500,- na impuesto riba salario. Esaki ta un suma respectable, tumando na cuenta cu segun calculashon di gobierno den su presupuesto di 2017 e salario promedio pa personal di CITGO lo suma na Afl. 52.000,-. A base di e calculashon aki e empleadonan di CITGO al fin y al cabo lo resta Afl. 18.500, den nan man, esta menos cu salario minimo, riba cual ainda mester paga premie di AZV y otro gasto social. Pa personal bon prepara (?) esaki sigur no ta un perspectiva alentador.
Pero tambe for di un otro perspectiva e entradanan calcula pa AIB ta falta credibilidad. Pasobra ta resulta cu 3,1% di e empleadonan Arubana lo percura pa casi 20% di e impuesto riba salario total di mas o menos Afl. 300 miyon cu Aruba ta spera di ricibi. E calculashon aki di AIB ta hopi contrario na esun di CBA cu a asumi cu e aporte di refineria na economia di Aruba por lo pronto lo ta mas bien limita na entrada di impuesto riba salario. Esaki lo suma na Afl. 7 miyon na aña 2016 y Afl. 22 na 2017, pues ni 50% di e calculashonnan di AIB.
Sinembargo, AIB no ta e unico instancia cu ta pinta un otro imagen cu instituto reconoci manera CBA a publica. Pasobra ta parce cu e expectativanan financiero positivo di gobierno tambe a contagia CAft di tal forma cu esaki a cambia su dudanan fuerte cu el a expresa claramente ni un luna pasa di un momento pa otro. Atrobe: segun gobierno, pasobra e observashonnan di Caft te dia di awe tampoco ta publico! Segun gobierno, CAft a duna su sosten na e presupuesto definitivo di 2017. Aparentemente e aclarashonnan cu el a exigi tocante locual el a cualifica como cifra hopi ‘irealista’, awor sí aparentement ta genera e confiansa necesario. Esaki lo por haci posibel pa CAft duna gobierno di Aruba e OK pa busca un prestamo nobo pa cubri e prestamo di Afl. 414 miyon cu ta caduca na 2017, mas e fayo presupuestal.
Tanto pa gobierno di Aruba como pa comunidad e posibel cambio grandi aki di CAft en principio lo por nifica bon noticia. Anke gobierno di Aruba na ningun manera ta cumpli cu su palabrashonnan en cuanto reducshon di su gasto di mas grandi (esta di personal) y consecuentemente no ta cumpli cu e exigencia di finansas publico duradero, e ta logra di cumpli sí (anke sea teoricamente) cu e norma di fayo presupuestal cu a acorda den ley (LAft). Ta di spera cu pa gobierno di Hulanda esaki ta suficiente motibo pa inscribi riba un prestamo pa Aruba a base di un interes hopi mas abou. Por lo menos e lo por duna algun espacio atrobe di hala rosea un tiki mas trankil dentro di e cuadro di obligashonnan gigantesco di interes cu e gobierno actual a hinca den scochi di pueblo di Aruba.