Durante e 4 añanan siguiente, e gobierno nobo di AVP a traha energicamente na diseño y ehecushon di proyecto grandi. A drecha a fondo bario y edificio hopi descuida, caya principal di Playa a haya un cara nobo, a mehora y profundisa e lazonan cu Hulanda, a delibera intensivamente cu partner social tocante cambio drastico y ampliamente a pone atenshon na un maneho pa produci energía duradero (berde). En breve, tur caminda actividad inovativo tawata tuma lugar.Poco poco comunidad a entusiasma cu e maneho nobo.
Claro cu no tur cos tawata perfecto. Proyecto a dura mas largo cu premira. Consecuentemente e gastonan tambe a sali for di man. Aki aya tawatin duda den sentido (y e gastonan envolvi) di cierto proyecto. Comunidad tawatin problema cu e elemento di show na unda a expone cada actividad di cada minister na un manera masha extenso y aburidor den e medionan di comunicashon. Y tampoco cumplimento cu e tradishon pa atribui cada problema cu a presenta su mes aña aden aña afo na e gobierno anterior di MEP a cay den bon tera.
Mientras cu hopi pais desde 2008 a experiencia problema financiero pisa y mester a economisa masha hopi cu consecuencia serio pa pueblo, gobierno di Aruba a scohe concientemente pa un maneho di inversion riba escala grandi pa stimula economia. Un economia florecente lo cubri e debenan di mes den un futuro. No solamente a purba di mantene y asta expande empleo, pero tambe lo mehora calidad di bida di tur rubiano den e tempo dificil aki.
Sin ambargo, un grupo creciente di hende a cuminsa puntra nan mes cu ki placa Aruba tawata paga su brio nobo. Tawata cla cu a traha na un manera hopi abundante cu prestamo. Pero tawata desconoci den ki grado esaki sa tuma lugar ni cualnan tawata e consecuencianan riba termino largo. Gobierno na ningun manera a anticipa esaki. Ademas e complimentnan regular di parti di ruman grandi Hulanda pa maneho di gobierno di Aruba y e raportnan di IMF y otro instancia similar, skirbi den terminologia encubri, a percura pa masha tiki hende precupa.
Poco despues di elecshon di september 2013 a bira cla cu en realidad gobierno a yega na fin di su capacidadnan financiero. Un cantidad creciente di fundashon a indica cu gobierno no tawata cumpli mas cu otorgashon di subsidio. Ministro di finansas a pone bon cla cu gobierno lo paga solamente un parti di su obligashonnan na AZV y como broche di oro empleado cu contract a ricibi e noticia cu nan no mester acudi mas na trabou desde e dia, siman of luna siguiente. Tur minister mester a economisa masha hopi mes y a costa hopi esfuerso pa entrega presupuesto 9 luna despues di e termino constitutional na parlamento. Ta te ora cu gobernador a nenga di legalisa presupuesto pa medio di su firma a bira cla con serio e problema ta.
Mientras tanto ´Commissie Financieel Toezicht (Cft)´ a duna presupuesto di 2014 un cualificashon negativo despues di un control superficial. Un investigashon mas profundo cu ´conseho´ pa un maneho di saneashon lo nific acasi sigur cu comunidad di Aruba lo confronta tempo dificil.
Automáticamente e pregunta ta surgi con serio di berdad nos situashon financiero ta y ki consecuencia esaki tin; den ki grado e gobierno(nan) actual y (anterior) di color politico alternativo a hiba un maneho financiero (i)responsabel cu a conduci na e situashon aki; te ki grado partido politico ainda tin credibilidad pa nan mes busca solushon pa e situashon actual; of y den caso afirmativo na ki manera nos sistema parlamentario legal ta contribui na e politica tradishonal di patronahe. Ademas lo duna atenshon na e teima preferi di tur politico rubiano, esta e pregunta si Hulanda ta viola autonomia di Aruba. Den un serie di articulo lo profundisa e diferente temanan menciona. Ta di spera cu ta bira cla cu mester un cambio drastico den e rumbo actual. Ya caba pa decada a resulta cu diseño y ehecushon di maneho nacional(casi) exclusivamente na politico ta hiba na un caminda sin salida.