Poco despues di e derota electoral di AVP na 2001, Plataforma Accion Aruba Dushi Tera, un organisashon capa di entidad no-gubernamental, a entrega un proposishon na Parlamento nobo pa instala un comishon. Esaki mester a investiga posibel acto coruptivo di e gobierno anterior di manera independiente. Na januari 2002, esaki a conduci na un moshon den cual a pidi gobierno pa instala un comishon di berdad. Su tarea tawata pa investiga algun proyecto di gobierno cu a ehecuta durante e gobernashon anterior. Pasobra den comunidad tawatin bastante duda tocante integridad den esakinan. Motibo di tur esaki tawata e manifestashonnan grandi cu a tuma luga durante e añanan anterior, entre otro contra e proyecto di Racetrack. A culpa e gobierno concerni di malgobernashon. Ademas, entre otro Controlaria General a publica documento cu a indica cu tawata falta transparencia den toma di decishon y ehecushon di algun proyecto.

Encuesta parlamentario

Pesey tambe a pidi varios biaha pa institui encuesta parlamentario, entre otro pa trece claridad en cuanto e proyecto di Radisson Hotel. For di comunidad tambe a sali petishon den e direcshon ey. Dia 5 di juni 2001, Aruba Trade & Industry Association (ATIA) a suplica Parlamento den un carta habri pa hiba un encuesta parlamentario tocante maneho di personal di parti di e gobierno en cuestion. Casi un aña despues, ATIA a haci otro petishon pa encuesta parlamentario tocante e siguiente casonan: Beta Hotel, Plantation Bay, Eagle Beach Hotel, e caso Fuentes, Trias Resort y e proyecto di Racetrack. Sindicato SEPA a sugeri pa hiba un encuesta parlamentario tocante e caso di Bushiri.

Como cu a propone un cantidad grandi di caso pa investiga mientras cu un encuesta parlamentario ta designa pa un caso specifico, a bira necesario pa duna Parlamento conseho al respecto. Esey tawata un di e tareanan di Comishon di Berdad (CdB) cu a keda instala. E atenshon principal di CdB tawata integridad di gobierno y combatimento di criminalidad. Esaki tawata di gran importancia como cu na hopi pais corupshon ta mara na crimen organisa, locual ta hopi dañino pa democracia. Di ningun manera esaki tawata algo di fantasia, manera a resalta for di e rapport Koerten di parti di Servicio di Seguridad di Aruba. Segun nos Servicio di Seguridad, tawatin lazo estrecho entre criminal di droga y gobernante.

Modus operandi

CdB a investiga un gran cantidad di proyecto, entre nan garantia di hotel, e problematica di Interbank cu CSS y FCCA, e asunto di ‘lucht- en zeebrieven’, Air Aruba, e proyecto di radar, expanshon di haf y aeropuerto, Setar, e proyectonan di ATES y Bushiri Hotel, racetrack, parke di avestruz y ‘dividend-special’. Pero a duna e Plan Desaroyo Nobo San Nicolaas (PDNSN) e atenshon principal.

Coperashon di e director di Servicio Central di Accountant di e tempo ey y secretario di Conseho Consultativo a determina grandemente calidad di e raport. E modus operandi dudoso di gobernante den colaborashon cu nan ‘partnernan di negoshi’ a resulta claramente for di e raport aki. Specialmente e investigashon di PDNSN a demostra esaki (mira: https://deugdelijkbestuuraruba.org/wp-content/uploads/2016/10/Een-kwestie-van-mentaliteit-Comishon-di-Berdad-Groot-1.pdf). Al fin y al cabo e raport a conduci na denuncia di parti di CdB contra 8 persona, incluso un ministro. A sentencia tur pa motibo di corupshon. Manera tawata di spera, segun e partido concerni tawata trata di persecushon politico.

Historia ta ripiti

Recientemente Controlaria General a publica e raport Bo Aruba. E conclushonnan principal tawata cu di ningun manera no tawatin un plan di structura integral locual a trece riesgo cu cos por sali for di man. Ademas e falta grandi di informashon ta haci cu hopi proyecto ta incontrolable. Di mes esaki ta hiba na e riesgo cu no ta uza e medionan na un manera drechi y/of efectivo. Consecuentemente e

riesgo ta grandi cu e forma di proceder cu a hiba lo tin consecuencia financiero negativo grandi pa Aruba. Esey ta pa motibo di e gran cantidad di placa envolvi. Mientrastanto a gasta Afl. 1 biyon di e Afl. 1,6 biyon cu a proyecta. Compara cu esaki, e casi Afl. 50 miyon cu tawata envolvi den e PDNSN tawata simplente peanuts (5%).

Anke e raport di ARA tocante Bo Aruba, den comparashon cu su raport tocante PDNSN, ta hopi limita y superficial, ta parce cu tin varios similaridad entre e forma di proceder den tempo di PDNSN. Esey ta asombroso. En bista di e casonan legal cu basta consecuencia emoshonal pa esnan envolvi, lo a spera cu lo a siña algo y cu lo a procede cu hopi mas cuidou. Ta parce cu nada di esey a tuma luga. Al contrario! Pasobra e partido concerni ta duna e impreshon fuerte di a actua na un manera dudoso dor di a aparentemente kita un gran cantidad di documentashon digital y ‘duro’ tocante tur tipo di proyecto di e ultimo añanan for di conocemento di e gabinete actual. Di e forma aki posiblemente el a hinca su mes den otro aventura penal. Pasobra for di e veredicto ‘Computergegevens FCCA NJ 1997/574’ ta resulta cu kitamento di cargador di informashon cu ta pertenece parcial- of completamente na un otro (den e caso aki FCCA, of den caso hipotetico, di gobierno), por resulta den persecuashon penal. E veredicto aki mester ta conoci cerca gobernante di e gabinete anterior.

Les

Pa e gobierno actual esaki ta nifica cu mas cu nunca e mester pone orden den e desorden y cu e mester sigui e criterianan di bon gobernashon y e stipulashonnan di ley di Comptabilidad (cu por cierto mester actualisa) na pie de la letra y de su espirito. Specialmente tumando na cuenta cu varios di su propio ministernan tawata directamene responsabel y/of envolvi den mayoria di e proyectonan menshona/investiga. Pesey tambe e mester hunga carta habri y mester completa eventual investigashon cu mehorashon concreto. Sigui postpone esaki ta nifica cu ta sigui mantene un ambiente fertil pa gobernante sigui comporta na un manera criminal.